ʻOku lavangofua ke lōmekina kitautolu ʻi he taimi ʻoku fāinga ai ha kaumeʻa mo e palopalema fakaʻatamaí. Ka ʻe lava ke tau fakahāhā ʻa e lahi ʻetau tokangá ʻaki ʻa e tokoniʻi hotau kaumeʻá ke fekuki mo ha palopalema fakaʻatamai fakalotomamahi. Anga-fēfē?

“Vave ki he fanongo.”​—SĒMISI 1:19.

Ko e taha ʻo e ngaahi founga lelei taha ke tokoni ai ki ho kaumeʻá ko e fanongo ʻi he taimi ʻokú ne loto ai ke talanoá. ʻOua te ke ongoʻi kuo pau ke ke fai ha tali ki he meʻa kotoa ʻokú ne leaʻakí. Fakamālō ki he meʻa ʻokú ne leaʻakí, pea feinga ke hanganaki manavaʻofa. ʻAi ke ʻataʻatā hoʻo fakakaukaú, pea fakaʻehiʻehi mei he fakavave ke fai ha fakamulitukú pe hoko ʻo faifakamāú. Manatuʻi te ne leaʻaki nai ʻa e ngaahi meʻa ʻoku ʻikai ke ne ʻuhingaʻi pea toki fakaʻiseʻisa ai ʻamui.​—Siope 6:2, 3.

“Lea fakanonga.”​—1 TESALONAIKA 5:14.

ʻE ongoʻi loto-moʻua nai ho kaumeʻá pe ʻokú ne fāinga nai mo e ongoʻi ʻoku ʻikai hano mahuʻingá. ʻI hono fakapapauʻi ange kiate ia ʻokú ke tokanga fekauʻaki mo iá, ʻe lava ke hoko ʻo fakafiemālie mo fakalototoʻa, neongo kapau ʻoku ʻikai te ke ʻilo ʻa e meʻa ʻoku totonu ke leaʻakí.

“Ko ha kaumeʻa moʻoni ʻokú ne ʻofa ʻi he taimi kotoa pē.”​—PALŌVEEPI 17:17.

Fai ʻa e tokoni ʻaonga. ʻI he ʻikai fakamahalo ʻokú ke ʻiloʻi ʻa e founga ke tokoni aí, ʻeke ʻa e meʻa ʻe lava ke ke faí. Kapau ʻoku faingataʻa ki ho kaumeʻá ke fakahaaʻi ʻa e meʻa ʻokú ne fiemaʻú, feinga ke fokotuʻu  ange ha meʻa ʻaonga ʻe lava ke mo fai fakataha, hangē ko e ʻalu ʻo luelue. Pe ʻe lava ke ke tala ange te ke tokoni ʻi hono fai ʻene fakataú, fakamaʻa pe ko ha toe ngāue kehe.​—Kalētia 6:2.

“Mou kātaki.”​—1 TESALONAIKA 5:14.

Heʻikai nai ke mateuteu maʻu pē ho kaumeʻá ke talanoa. Fakapapauʻi ki ho kaumeʻá te ke fiefia ke fanongo ʻi he taimi ʻokú ne ongoʻi ai ʻokú ne fie talanoá. Koeʻuhi ko ʻene puké, ʻe leaʻaki pe fai nai ʻe ho kaumeʻá ha meʻa ʻe fakalotomamahi kiate koe. Te ne kaniseli nai ha palani naʻá mo fai pe te ne ʻita. Hoko ʻo kātaki pea mahinoʻi ia ʻi hoʻo ʻoatu ʻa e poupou ʻokú ne fiemaʻú.​—Palōveepi 18:24.

“ʻOku ou fakapapauʻi ko ha kaumeʻa au ʻe lava ke ne falala ki ai. Neongo ʻoku ʻikai ke u maʻu ʻa e fakaleleiʻanga ki heʻene ngaahi palopalemá, ʻoku ou feinga maʻu pē ke fanongo ki he meʻa ʻokú ne leaʻakí. ʻI he taimi ʻe niʻihi ko e meʻa pē ʻokú ne fiemaʻú ko ha telinga fiefanongo ke ʻai ia ke ne ongoʻi lelei ange.”​—Farrah, a ko hono kaumeʻá ʻoku fāinga mo e mahaki uʻakai tamakí mo e loto-moʻuá pea mo e loto-taʻotaʻomiá.

“Ko e taha ʻo hoku ngaahi kaumeʻá ʻokú ne anga-lelei ʻaupito mo fakakaukau pau. Naʻá ne fakaafeʻi au ki hono ʻapí ki ha houa kai ifo. ʻI ha ʻatimosifia māfana mo ʻofa pehē, naʻe malava ai ke u talanoa fekauʻaki mo ʻeku ngaahi ongoʻí. Naʻe fakalototoʻa moʻoni ia kiate au!”​—Ha-eun, ʻoku fāinga mo e mahaki loto-taʻotaʻomiá.

“Ko e kātakí ʻoku mātuʻaki mahuʻinga. ʻI he taimi ʻoku fai ai ʻe hoku uaifí ha meʻa ʻoku fakalotomamahi kiate au, ʻoku ou fakamanatu hifo kiate au ko ha fakaʻilonga ia ʻo ʻene puké, ʻo ʻikai ko hono tuʻunga moʻoni ʻi lotó. ʻOku tokoni eni ke u fakaʻehiʻehi ai mei he hoko ʻo ʻitá pea ke fakaʻatuʻi ange kiate ia.”​—Jacob, ʻa ia ko hono uaifí ʻokú ne fāinga mo e mahaki loto-taʻotaʻomiá.

“Ko hoku uaifí kuó ne hoko ko ha poupou mo ha fakafiemālie lahi kiate au. ʻI he taimi ʻoku lōmekina ai au ʻe he loto-moʻuá, ʻoku ʻikai ʻaupito ke ne fakamālohiʻi au ke u fai ha meʻa ʻoku ʻikai ke u ongoʻi ʻoku ou fie fai. ʻI he taimi ʻe niʻihi ʻoku ʻuhinga iá heʻikai ke ne fai ʻa e meʻa ʻokú ne saiʻia ke faí. Ko ʻene laumālie feilaulauʻi-kitá mo e nima-homó ʻoku mahuʻinga taʻehanotatau.”​—Enrico, ʻokú ne puke ʻi he loto-moʻuá.