ʻOku mafolalahia ʻa e māvahevahe fakapolitikalé ʻi he ngaahi puleʻangá ʻi māmani lahi. Fakatatau ki ha savea ʻi he 2022 ʻa e Senitā Fakatotolo Pew, “ko e pēseti ʻe 65 ʻo e kakai lalahi ʻi he ngaahi fonua ʻe 19 naʻe fai hono saveaʻí ʻoku nau pehē ʻoku ʻi ai ʻa e ngaahi taʻefelotoi lahi ʻaupito ʻi he kakai ʻi honau fonuá ʻa ia ʻoku nau poupou ki he ngaahi paati fakapolitikale kehekehe.”

 Kuó ke fakatokangaʻi ʻa e fakautuutu ʻa e māvahevahe fakapolitikalé ʻi he feituʻu ʻokú ke nofo aí? Ko e hā hono ʻuhingá? ʻOku ʻi ai ha fakaleleiʻanga? Tau sio angé ki he meʻa ʻoku leaʻaki ʻe he Tohi Tapú.

 Naʻe tomuʻa tala ʻe he Tohi Tapú ʻi hotau taimí, ʻoku lave ki ai ko e “ngaahi ʻaho fakaʻosí,” ko e kakai tokolahi te nau maʻu ʻa e ngaahi tōʻonga te ne ʻai ke faingataʻa ke maʻu ʻa e fāʻūtahá.

•   “ʻI he ngaahi ʻaho fakaʻosí ʻe ʻi heni ai ʻa e ngaahi taimi fakalilifu ʻa ia ʻe faingataʻa ke fekuki mo ia. He ko e tangatá te nau hoko ko e kau ʻofa kiate kinautolu pē, . . . lotolotokehe.”​—2 Tīmote 3:1-3.

 ʻOku fāinga ʻa e ngaahi puleʻangá ke lele lelei, neongo ʻa e ngaahi feinga lelei taha ʻoku fai ʻe he kakai tokolahi. Ko e kakai ʻoku nau maʻu ʻa e ngaahi fakakaukau fakafepakí ʻoku nau vakai ʻoku faingataʻa pea aʻu ʻo taʻemalava ke ngāue fakataha ke fakaleleiʻi ʻa e ngaahi palopalemá. Ko e olá ʻoku fakamoʻoniʻi ia ʻe he meʻa naʻe leaʻaki ʻe he Tohi Tapú ʻi ha vahaʻa taimi fuoloa.

•   ‘ʻI he pule ha tangata ki ha tangata ko e kovi pē ʻokú ne ʻomi kiate iá.’​—Tangata Malanga 8:9.

 Kae kehe, ‘oku ‘omai ‘e he Tohi Tapú ha fakaleleiʻanga​—ko ha puleʻanga ʻoku taki ‘e ha tokotaha te ne toʻo atu ʻa e ngaahi palopalema ʻoku mafolalahia ʻi he sōsaietí ʻi he ʻahó ni.

 ʻOku fakahaaʻi ʻi he Tohi Tapú ha taki ʻoku taau makehe: ko Sīsū Kalaisi. Kuo maʻu ʻe Sīsū ʻa e mālohi, ko e mafai pea mo e holi ke ʻomai ʻa e fāʻūtaha mo e melino ki he kotoa ʻa e faʻahinga ʻo e tangatá.

•   “ʻI hono ngaahi ʻahó ʻe tupu ʻāfaʻafa ai ʻa e māʻoniʻoní, pea ko e melinó ʻe hulu fau.”​—Saame 72:7.

•    “Ko e ngaahi puleʻangá kotoa te nau tauhi kiate ia.”​—Saame 72:11.

 Ko Sīsū ʻa e pule lelei tahá koeʻuhi ʻokú ne tokanga fekauʻaki mo e kakaí pea loto ke tokoniʻi kinautolu, tautefito ki he faʻahinga ʻoku ngaohikoviá.

•   “Te ne fakahaofi ʻa e masiva ʻoku tangi ki ha tokoní, pehē foki ki he tokotaha māʻulaló mo ha taha pē ʻoku ʻikai hano tokoní. Te ne fakaʻofaʻia ʻi he māʻulaló mo e masivá, pea ko e moʻui ʻa e kau masivá te ne fakahaofi. Te ne fakahaofi kinautolu mei he fakafeʻātungiá pea mei he fakamālohí.”​—Saame 72:12-14.

 Ako lahi ange fekauʻaki mo e Puleʻanga ʻo e ʻOtuá, ko e puleʻanga fakahēvani ʻoku taki ai ʻa Sīsuú. Kumi ki he founga ʻe lava ke ke maʻu ʻaonga ai mei he puleʻangá pea poupou ki ai.

•   Sio ʻi he vitiō Ko e Hā ʻa e Puleʻanga ʻo e ʻOtuá?

•   Lau ʻa e kupu “Puleʻanga ʻo e ʻOtuá​—Ko ha Founga-Pule Faitotonu.”