Moreri 9:1-18
9 Ka jalo, ke ne ka akanya thata ka seno mme ka swetsa ka gore basiami le ba ba botlhale, mmogo le ditiro tsa bone ba mo diatleng tsa Modimo wa boammaaruri.+ Batho ga ba itse sepe ka lorato le ka letlhoo tse di nnileng teng pele ga bone.
2 Botlhe ba na le phelelo e e tshwanang,+ basiami le badirabosula,+ ba ba molemo le ba ba itshekileng le ba ba itshekologileng, ba ba ntshang ditlhabelo le ba ba sa ntsheng ditlhabelo. Yo o molemo o tshwana fela le moleofi; yo o dirang maikano o tshwana fela le yo o tshabang go dira maikano.
3 Seno ke selo se se ngomolang pelo se se diregang mo lefatsheng:* E re ka botlhe ba na le phelelo e e tshwanang,+ dipelo tsa batho di tletse bosula; e bile go na le botsenwa mo dipelong tsa bone fa ba sa ntse ba tshela, go tswa foo ba a swa!*
4 Go na le tsholofelo ka ope fela yo o sa ntseng a tshela, ka gonne ntša e e tshelang e botoka go na le tau e e suleng.+
5 Gonne batshedi ba a itse gore ba tla swa,+ mme baswi bone ga ba itse sepe gotlhelele,+ e bile ga ba tlhole ba na le tuelo epe, ka gonne dilo tsotlhe tse di ka gopolwang ka bone di lebetswe.*+
6 Gape, lorato lwa bone le letlhoo la bone le lefufa la bone di setse di nyeletse, e bile ga ba tlhole ba na le seabe sepe mo go se se dirwang mo lefatsheng.*+
7 Tsamaya, o je dijo tsa gago ka boitumelo o bo o nwe beine ya gago ka pelo e e itumetseng,+ ka gonne Modimo wa boammaaruri o setse a itumeletse ditiro tsa gago.+
8 E kete diaparo tsa gago di ka nna di le ditshweu* ka metlha, e bile o se ka wa tlogela go itshasa leokwane mo tlhogong.+
9 Itumelele botshelo le mosadi wa gago yo o mo ratang+ malatsi otlhe a botshelo jwa gago jwa lefela, a Modimo a go a neileng mo lefatsheng, malatsi otlhe a gago a lefela, ka gonne seo ke tuelo* ya gago mo botshelong le mo tirong ya gago e o e dirang ka natla mo lefatsheng.*+
10 Sepe fela se o kgonang go se dira,* se dire ka maatla a gago otlhe, ka gonne ga go na tiro kgotsa go dira dithulaganyo kgotsa kitso kgotsa botlhale kwa Lebitleng,*+ kwa o yang gone.
11 Ke ne ka bona selo se sengwe gape mo lefatsheng,* gore ba ba bofefo ga se ka metlha ba fenyang mo lobelong, ba ba maatla ga ba fenye ntwa,+ ba ba botlhale ga se ka metlha ba nnang le dijo, ba ba botlhale ga se ka metlha ba nnang le dikhumo,+ e bile ba ba nang le kitso ga se ka metlha ba atlegang,+ ka gonne botlhe ba diragalelwa ke dilo tse ba sa di lebelelang ka nako e ba sa e lebelelang.*
12 Gonne motho ga a itse gore o tla welwa ke mathata leng.+ Fela jaaka ditlhapi di tshwarwa ka letlowa le dinonyane di tshwarwa ka serai, ka tsela e e tshwanang batho ba tshwarwa ka nako ya masetlapelo, fa a ba wela ka tshoganyetso.
13 Gape ke ne ka ela tlhoko sekai seno se se kgatlhang sa botlhale jo bo mo lefatsheng:*
14 Go ne go na le motse o monnye o o nang le batho ba le mmalwa; mme kgosi nngwe e e maatla e ne ya tla go o tlhasela, mme ya o lalela e bo e aga lobota lo logolo go o dikologa.
15 Mo motseng oo, go ne go na le monna mongwe wa mohumanegi mme gone a le botlhale, mme o ne a boloka motse oo ka botlhale jwa gagwe. Le fa go ntse jalo, ga go na ope yo o neng a gakologelwa monna yoo wa mohumanegi.+
16 Mme ke ne ka ipolelela go re: ‘Botlhale bo botoka go na le maatla;+ le fa go ntse jalo, botlhale jwa mohumanegi bo a nyadiwa, le mafoko a gagwe ga a tsewe tsia.’+
17 Go botoka go reetsa mafoko a a buelwang kwa tlase a ba ba botlhale go na le go reetsa go goa ga motho yo o laolang dieleele.
18 Botlhale bo botoka go na le dibetsa tsa ntwa, mme moleofi a le mongwe fela a ka senya molemo o mogolo.+
Dintlha Tse di Kwa Tlase
^ Seheb., “ka fa tlase ga letsatsi.”
^ Seheb., “mme morago ga moo ba ya kwa baswing!”
^ Seheb., “ka gonne go ba gakologelwa go lebetswe.”
^ Seheb., “ka fa tlase ga letsatsi.”
^ Go tewa diaparo tse dintle tse di bontshang boitumelo, e seng diaparo tsa khutsafalo.
^ Seheb., “ka fa tlase ga letsatsi.”
^ Kgotsa “kabelo.”
^ Seheb., “Sepe fela se seatla sa gago se se bonang go se dira.”
^ Kgotsa “Sheole.” Bona Ditlhaloso Tsa Mafoko.
^ Seheb., “ka fa tlase ga letsatsi.”
^ Kgotsa “tiragalo e e sa bonelwang pele.”
^ Seheb., “ka fa tlase ga letsatsi.”
