1, 2. а) Сиз Җеннетде нәхили берекетлери алмак ислейәрсиңиз? (Макаланың башындакы сурата середиң). б) Биз тәзе дүнйәде нәхили рухы берекетлериң эеси боларыс?

«ХАКЫКЫ ЯШАЙЫШ». Бу җүмле бизe ер йүзүнде болҗак эбеди яшайшы гөз өңүне гетирмәге көмек эдйәр (1 Тимотеос 6:12, 19-нҗы аятлары окаң). Биз леззет ве канагат берйән эбеди яшайша гарашярыс. Элбетде, хер гүн ирден тураныңда беден, дуйгы ве акыл тайдан сагдын болмагы хәзир гөз өңүне гетирип билмейәрис (Иш. 35:5, 6). Эмма доган-гарындашларың, дост-ярларың ве дирелен адамлар билен гүррүңдеш болмагың нәхили якымлы болҗакдыгы хакында ойланып гөрелиң (Яхя 5:28, 29; Рес. иш. 24:15). Биз тәзе дүнйәде ылым-билими, айдым-сазы, гурлушык ишлерини өвренип, укыпларымызы өсдүрерис.

² Биз, эсасанам, рухы берекетлери алмага сабырсызлык билен гарашярыс. Ехованың адыны мукаддес этмек ве онуң хөкүмдарлыгыны голдамак улы хормат дәлми нәме?! (Мат. 6:9, 10). Ехованың адамзат ве ер бабатдакы ниетиниң амала ашяндыгыны гөрмек  нәхили толгундырыҗы болар! Тәзе дүнйәде биз кем-кемден кәмиллиге етип, Ехова билен достлугымызы хас-да беркидерис (Зеб. 73:28; Якуп 4:8).

3. Биз нәмә тайярлык гөрмели?

³ Биз бол берекетлериң эеси болҗакдыгымыза ынанып билерис, себәби Иса «Худай үчин әхли задың мүмкиндигини» айтды (Мат. 19:25, 26). Биз тәзе дүнйәде — Иса Месихиң Мүңйыллык хөкүмдарлыгында — эбеди яшайша «эе болар ялы» хәзирден тайярлык гөрмели. Биз залым дүнйәниң соңуна гарашып, тәзе дүнйәде яшамак үчин нәдип хәзирден тайярлык гөрмели?

4. Тәзе дүнйәде яшамага нәдип тайярлык гөрмелидигини мысал аркалы дүшүндириң.

⁴ Биз тәзе дүнйәде яшамак үчин нәме этмели? Айдалы, биз башга юрда гөчмекчи болярыс. Биз оңа нәхили тайярлык гөрерис? Илки билен, биз ол ердәки яшайшы гөз өңүне гетирип, ерли халк ялы яшап башларыс. Башгача айданыңда, ол ериң дилини, дәп-дессурыны ве милли нахарларыны өвренерис. Тәзе дүнйәде яшамак үчин бизем хәзирден тайярлык гөрмели ве өзүмизи шол ерде яшаян ялы алып бармалы. Гелиң, муны гөз өңүне гетирелиң!

5, 6. Гураманың гөркезмесине табын болмаклык бизи тәзе дүнйә нәдип тайярлаяр?

⁵ Тәзе дүнйәде адамлардыр перишделер Худайың хөкүмдарлыгыны долы голдарлар. Ол Шейтаның гол астындакы дүнйәден, гөр, нәхили тапавутланар! Кәбир адамларың гарашсыз ве өздиенли болмагының нетиҗеси нәхили болды? Адамларың Худайың гөркезмесинден йүз өврендиги себәпли ер йүзүнде хорлуклар ве бетбагтчылыклар боляр (Ер. 10:23). Биз әхли адамларың Ехованың хөкүмдарлыгына табын болҗак дөврүне сабырсызлык билен гарашярыс!

⁶ Биз тәзе дүнйәде Ехованың гөркезмесине эерип, ер йүзүни гүлзарлыга өврерис, дирелен адамлара билим берерис ве Ехованың адамзат бабатдакы ислегини амала ашырарыс. Эмма бизе халамаян ишимиз табшырылса нәме? Биз гөркезмә эерип, берлен юмшы хөвес билен ерине етирерисми? Бизиң көпүмиз «Хава!» дийип җогап берерис. Онда биз гурамамызың берйән гөркезмесине шу вагтдан гулак асмалы дәлми нәме?! Биз гөркезмә йүрекден табын болсак, тәзе дүнйәде-де Ехованың хөкүмдарлыгына табын боларыс.

7, 8. а) Биз нәме үчин доганлар билен эгинме-эгин ишлешмели? б) Кәбир месихчилер нәхили өзгеришлери этдилер? в) Биз тәзе дүнйә бабатда нәмә ынамлы болуп билерис?

⁷ Биз диңе бир Ехованың гөркезмесине гулак асмак билен чәкленмән, эйсем, доганлар билен эгинме-эгин ишлешсек, тәзе дүнйә тайярлык гөрерис. Шонда биз тәзе дүнйәде хем доганлара хөвес билен гулак асып, табшырылан юмушлары ыхласлы ерине етирерис (Еврейлер 13:17-ни окаң). Ысрайыллылар Вада эдилен диярда ер пайларыны дүшен биҗесине гөрә алярдылар (Сан. 26:52—56; Еш. 14:1, 2). Бизем тәзе дүнйәде ер пайымызың ниреден берилҗекдигини билмейәрис. Эмма биз хәзирден доганлар билен  ишлешмеги өвренсек, ниреде яшасак-да Ехова гуллук этмекден шатлык тапярыс.

⁸ Биз Ехованың гурамасы билен эгинме-эгин ишлешип, берлен юмушлары ыхласлы ерине етирсек, Патышалыгың раятлары болмага мынасып боларыс. Эмма вагтың гечмеги билен, бизиң ягдайымыз өзгерип билер. Меселем, АБШ-да ерлешйән Бейтелде гуллук эден кәбир доган-уялары гуллугың башга гөрнүшине белледилер. Муңа гарамаздан, олар бол берекет алып, шатлык тапярлар. Өң этрап гөзегчиси болуп гуллук эден месихчилер гаррылык ве башга себәплере гөрә, инди пионер болуп гуллук эдйәрлер. Эгер бизем канагатлы болуп, Аллатагаладан көмек сорасак ве ыхласлы гуллук этсек, кын гүнлерде-де берекет алып, шатлыгымызы йитирмерис (Сүлейманың тымсаллары 10:22-ни окаң). Гелеҗек барада нәме дийсе болар? Элбетде, бизиң хер биримиз тәзе дүнйәде гөвнүмизе яраян ерде яшамак ислейәрис. Эмма бизиң ер пайымыз башга ерден берилсе нәме? Биз ниреде яшасак-да, нәхили борҗы ерине етирсек-де, миннетдарлык билен эдйән ишимизден шатлык тапарыс (Нех. 8:10).

9, 10. а) Тәзе дүнйәде бизе сабырлылык нәме үчин герек? б) Биз нәдип сабырлы болуп билерис?

⁹ Тәзе дүнйәде бизе сабырлылык хәсиети герек болар. Меселем, биз доган-гарындашларымызың дирелмегине гарашарыс. Айдалы, доган-уяларың хоссарлары ве дост-ярлары дирелйәр, йөне сизиң якынларыңыз энтек диреленок. Шонда сиз сабырлы болуп, оларың шатлыгына гошуларсыңызмы? (Рим. 12:15). Биз хәзирден Ехованың вадаларының ерине етмегине сабырлы гарашсак, Җеннетде-де сабыр-такатлы боларыс (Ваг. 7:8).

¹⁰ Биз шу гүнлер Мукаддес Язгылардакы хакыкат билиминиң долы ачылмагына сабырлы гарашмак билен, тәзе дүнйә тайярлык гөрйәрис. Биз хакыкаты сабыр-такатлы ве ыхлас билен өвренйәрисми? Эгер хәзирден шейле этсек, тәзе дүнйәде Ехованың берҗек када-канунларына сабырлы гарашарыс (Сүл. тым. 4:18; Яхя 16:12).

11. Ехова бизе адамлар билен нәхили гатнашыкда болмагы өвредйәр ве мунуң тәзе дүнйәде нәме пейдасы бар?

¹¹ Бизе тәзе дүнйәде гечиримлилик хәсиети хем герек болар. Иса Месихиң Мүңйыллык хөкүмдарлыгында дирелен догры ве эгри адамлар эрбет эндиклерини деррев дүзедип билмезлер (Рес. иш. 24:15). Шонда биз олара гечиримлилик эдерисми? Биз тәзе дүнйә тайярлык гөрмек үчин хәзирден адамлар билен говы гатнашыкда болмалы ве олары багышламагы өвренмели (Колоселилер 3:12—14-нҗи аятлары окаң).

12. Хәзирки ве гелҗекки яшайшың бири-бири билен багланышыгыны дүшүндириң.

¹² Биз тәзе дүнйәде гөвнүмизе яран зады ислендик вагты алып билерис өйтмели дәл. Биз сөйгүден долы Ехованың хөкүмдарлыгына табын болмагың пейда гетирйәндигине гөз етирсек, хемише канагатлы боларыс ве шатлыгымызы йитирмерис. Шонуң үчин биз Ехова яраян хәсиетлери хәзирден өсдүрмели. Эгер биз өзүмизи тәзе дүнйәниң раятлары ялы алып барсак, онда  эбеди яшамак үчин герекли хәсиетлери өсдүрерис ве «гелҗекки дүнйә» умыдымызы беркидерис (Евр. 2:5; 11:1). Шейле-де биз тәзе дүнйәде говы шертлерде яшамага сабырсызлык билен гарашяндыгымызы гөркезерис. Хава, биз Худайың вада берен тәзе дүнйәсине тайярлык гөрерис.

13. Тәзе дүнйәде нәмәни биринҗи орунда гоймалы?

¹³ Гелиң, хакыкы яшайша тайяр болмагың ене-де бир усулына середелиң. Тәзе дүнйәде иймит ве яшайша герекли затлар бол болса-да, биз, эсасан-да, рухы ишлерден леззет аларыс (Мат. 5:3). Биз Ехованың ислегини ерине етирмеги биринҗи орунда гоюп, шатлык тапарыс (Зеб. 37:4). Шу гүнлер биз рухы затлары биринҗи орунда гойсак, гелеҗеге тайынлык гөрерис (Матта 6:19—21-нҗи аятлары окаң).

14. Яш месихчилер нәхили максатлары гоюп билер?

¹⁴ Рухы ишлер нәдип шатлыгымыза шатлык гошуп билер? Онуң бир усулы — рухы максатлары гоймак. Эгер сиз яш ве Ехова ыхласлы гуллук этмек ислейән болсаңыз, долы вагтлы гуллук барадакы макалалары окап, максат гоюп билерсиңиз *. Шейле-де энчеме йылдан бәри долы вагтлы гуллук эдйән доган-уялар билен гүррүңдеш болмалы ве вагыз ишини биринҗи орунда гоймалы. Шонда шу гүнлер топлан теҗрибәңизи тәзе дүнйәде хем уланып билерсиңиз.

15. Патышалыгың вагызчылары нәхили рухы максатлары гоймалы?

¹⁵ Патышалыгың вагызчылары нәхили рухы максатлары гоймалы? Меселем, биз вагзың кәбир гөрнүшлеринде өкделешмеги ве Мукаддес Язгыларың када-канунларына дүшүнип, олары долы ерине етирмеги максат эдинип билерис. Шейле-де биз йыгнакда лабызлы окамага, чыкыш этмәге ве мазмунлы җогап бермәге тагалла эдйәрисми? Белки-де, сиз башга-да максатлар гоймак барада пикирленйәнсиңиз? Биз рухы максатлары гоюп, табшырылан юмушлары ыхласлы ерине етирмек билен, тәзе дүнйә тайярлык гөрйәрис.

16. Ехова гуллук этмек нәме үчин бизи багтлы эдйәр?

¹⁶ Кәбир адамлар тәзе дүнйә тайярлык гөрмеги пайхассыз хасаплаярлар. Эмма бу догры дәл! Биз Ехова гуллук эдип, дурмушың манысына дүшүнйәрис. Эмма биз кимдир бириниң меҗбур эдйәндиги үчин я-да агыр мушакгатдан халас болмак максады билен гуллук этмейәрис. Аллатагала адамзады Өзүне сежде этмек үчин ярадансоң, биз Оңа гуллук этмекден көп шатлык тапярыс. Биз бу дүнйәниң адамларындан тапавутлыкда, сөйгүден долы Ехованың гөркезмесине эерип, багтлы яшаярыс (Зебур 63:1—3-нҗи аятлары окаң). Эгер биз Ехова йүрекден гуллук этсек, диңе бир тәзе дүнйәде дәл, хәзирем берекет аларыс. Бизиң кәбиримиз энчеме йылдан бәри бол берекетлери алярыс! Бизиң хер биримиз хич бир задың шейле шатлык бермейәндигине гөз етирдик! (Зеб. 1:1—3; Иш. 58:13, 14).

17. Биз тәзе дүнйәде нәмәни биринҗи орунда гоярыс?

¹⁷ Худайың вада берен тәзе дүнйәсинде хер бир адам говы гөрйән ишлеринден леззет алар. Адамзады чекйән зәхметинден леззет алмак үчин ярадан Аллатагалла бизе шатлык тапмага мүмкинчилик дөретмезми нәме?! (Ваг. 2:24). Мукаддес Язгыларда Ехованың «әхли дирилери ислеглери боюнча доюрҗакдыгы» айдыляр (Зеб. 145:16). Элбетде, биз шу гүнлер дынч алып, шатлык тапярыс, йөне Ехова билен достлугымызы беркитсек, яшайышдан леззет хем аларыс. Шейтмек билен, биз Җеннетде хас-да багтлы боларыс. Шол себәпли биз Патышалыгы биринҗи орунда гоймалы ве Ехованың хәзирки берйән рухы берекетлерине назарымызы дикип, өз бәхбидимизе чапмалы дәл (Мат. 6:33).

18. Җеннете нәдип тайярлык гөрмели?

¹⁸ Тәзе дүнйәде гарашылмадык берекетлер эчилер. Гелиң, хакыкы яшайыша етмек үчин хәзирден тайярлык гөрелиң, Худая ярамлы хәсиетлери өсдүрелиң, ыхласлы вагыз эделиң ве рухы максатлары гоюп, шатлык тапалың. Ехованың вадаларына иман эдип, тәзе дүнйә сабырсызлык билен гарашалың!