Ve Na Ayol a Ve u Eren Tom ken Tar u Ecuador

YANGE i lu toron gumor ugen ken tar u Italia ahumbe ityô. Iti i gumor ne ér Bruno. Yange bee kôleeji, hemba yan ikyaren a mba ken klase na cii, nahan anmgbianev nav man atica na lu kumbur a na ér a yem makeranta u vesen. Nahan kpa, anyom a karen ken ijime la, gumor ne tsegha iyol na sha ci u Yehova, tôndozwa ér una hemba veren ishima u eren ishima i Aôndo ken uma na cii. Nahan lu nyi tsua u erene? A kaa ér: “Yange m pase Yehova ken msen mer me kure iceghzwa yam a na, una lu kwagh u hiihii ken uma wam. Shi m pase un mer m soo u gban teman a tema ga, m soo mer me eren ityom kposo kposo ken mcivir na.”

 Anyom nga kar kpuaa yô, Bruno yem ken tar u Ecuador, veghertar u ken Imbusutariyan i Amerika. A kaa wener: “Yehova ungwa msen wam je hemba a hemba er yange m ver ishima la.” Za nyer yô, kpiligh un iyol u nengen er agumaior agen kpa mough ken ityar igen va ken tar la sha u va seer eren Yehova tom nahan.

AGUMAIOR A A ‘KAR YEHOVA’ YÔ

Bruno, kua agumaior agen udubu imôngo ve er kwagh u Yehova a kaa ne, ér: “Karem nen ase sha kwagh ne, . . . tsô Mea bugh ne aan a Sha, Mea haa ne iveren.” (Mal. 3:10) Mdoo u Yehova a doo ve ishima la mgbegha ve u ‘karen Yehova,’ ve na shighe ve man tahav vev kua inyaregh vev sha u suen tom u Tartor, ken tar u kwagh a hembe gban sha mbapasenkwagh la.

Mbapasenkwagh mban nyôr ken tar ne ica lu a gba ga je tsô, ve nenge ér “sunda ngee je, kpa mbasundan yô, mba di kpeghee tsô.” (Mat. 9:37) U tesen ikyav yô, anmgbian u kwase ugen ken tar u Jamani, u i yer un ér Jaqueline yô, lu za eren tom ken tar ne. Tom ne maa un iyol kpishi, nahan a nger afishi a ken tar u Ecuador washika, a kaa ér: “M pase kwagh ken tar u Ecuador hemba anyom ahar kpuaa tseegh, kpa m ngu henen Bibilo a iorov 13, mba unyiin mba ve mkombo hanma shighe. Kwagh ne doom kpishi!” Anmgbian u kwase ugen mough ken tar u Kanada, mba yer iti na ér, Chantal, a kaa ér: “Ken inyom i 2008 la, m yem hen ijiir igen ken tar u Ecuador, i i lu ikyua a zegemnger yô. Tiônnongo lu hen ijiir ne môm tseegh, kpa hegen ne, atôônanongo nga hen ijiir ne atar, shi upania kpa mba hen ijiir ne hegen hemba iorov 30. Ka mea nenge ior mba hev vea vesen ken mimi nahan i doom je i zua ga!” Shi a kaa ér: “Semberee ne m yem m  ngu hen gar ugen u a lu sha Iwo i í yer ér Andes la. Ior mba hen gar la hemba 75,000, kpa tiônnongo ngu her môm tseegh. Ior mba hen gar ne ka ve kegh ato a loho u Bibilo kpen kpen! Saan mo iyol ken tom wam u pasen kwagh ne kpishi.”

MBAMTAVER MBA VE LU KEN TOM NE LA

U yemen ken tar ugen za pasen kwagh ker la, ka kwagh u taver kpishi. Agumaior agen je yô, yange tagher a mbamtaver cii ve ve mase moughon ye. Anmgbian u kwase ugen ken tar u Amerika, u i yer un ér Kayla yô, nger ér: “Mnenge u anmgbianev mbagenev ken tiônnongo wam lu a mi sha kwagh ne la nam iyolkpen. Lu taver ve er i hii ve m tsough u za eren tom pania ken tar ugen yô. Ashighe agen kwagh ne yange a zam iyol, m pine iyol yam mer, ‘Kwagh u m tsough u eren ne ka u vough je kpa?’” Nahan cii kpa, Kayla mough yem ken tar la. A kaa wener: “M er msen hen Yehova tsung, shi m lam vea anmgbianev mba nomso man mba kasev mba vian ken jijingi, nahan kwagh ne wasem u nengen mer Yehova veren mba ve kegh iyol u eren un tom la doo doo.”

Mbagenev kpishi ka i taver ve u henen zwa ugen. Anmgbian u kwase ugen ken tar u Ireland, u lu henen zwa ugen yô, mba yer iti na ér Siobhan, a kaa ér: “Yange mea fatyô u ôron kwagh u m soo u ôron la ga nahan, i vihin je. M hen u wan ishima shi veren ishima zulee shighe u m lu henen zwa ne la, shi yange mea gba kpa, m ta asenge sha mi di tsô.” Anmgbian u kwase ugen ken tar u Estonia, u i yer un ér Anna yô, kaa ér: “U henen zwa u Ishpania la yange hemba taver mo a u wan ishima a iceenyolough man ihyuundu kua m-ban u ikwa i duen mngerem ma tseen la. Ashighe agen yange i lum er m de u henen zwa ne nahan. Ishima de u vihin mo sha akaa a yange m ôr shami ga la, m gema m ver ishima sha akaa a yange m ôron shami la.”

Shi ka i taver kpishi u or undun tsombor u nan kua azende a nan za lun ijiir igen. Anmgbian ugen ken tar u Amerika, u i yer un ér Jonathan yô, kaa ér: “Yange m nyôron a nyôr hen ijiir ne nahan maa, iyol hii u kpen mo sha ci u m kera lu imôngo a azende a am man tsombor wam ga. Kpa er m lu henen Bibilo sha tseeneke wam zulee shi duen kwaghpasen yô, hii u lun mo guda. Ica i gbe ga yô, m zua a akaa a doon mo ken kwaghpasen shi m zua a azende a he ken tiônnongo kpaa, nahan kwagh ne wasem u hiden lun a iember.”

Shi mtaver ugen yô, ka mlu u hen tar u or yem ker la. Mlu u tar u or yem ker la fe zuan sha mlu u tar u nan la ga. Anmgbian ugen ken tar u Kanada, mba yer un  ér Beau, a kaa ér: “Shighe u m lu ken tar wam la, m zuan a usu man mngerem hanma shighe, kpa heen yô, akaa ne nga fe lun ga.” Ibanave man ior mba fan takerada ga dumbur ken ityar i lun a kwagh ave ga la kpishi, kua m-ban u akaahendan a injaa. Anmgbian u kwase ugen u ken tar u Austria, u i yer un ér Ines yô, yange hen u wan ishima a mbamlu mban sha u veren ishima sha aeren a dedoo a ior mba hen tar la. A kaa ér: “Ve fa u wan or ikyo shi mba inja kundu kundu shi mba wasen ior shi mba hiden a iyol ijime kpaa. Hemban cii je yô, sar ve tsung u henen kwagh u Aôndo.”

VE ZUA A ‘IVEREN JE NEER HAA INYA’

Er agumaior ne a de akaa a kar ve kpishi sha er vea er tom ken tar u Ecuador nahan kpa, Yehova na ve hanma kwagh u kwagh a gbe ve a mi cii, ‘je hemba kwagh u ve sen’ shin ve ver ishima u zuan a mi la ica je. (Ef. 3:20) Ve nenge ér ve zua a ‘iveren je neer haa inya.’ (Mal. 3:10) Ve pase er i lu ve ken ishima sha kwagh u tom ve u pasen kwagh la, ér:

Bruno: “Yange m hii tom wam u pasen kwagh la ken tar u Ecuador heen, hen haregh u i yer ér Amazon la. Shighe kar yô, m wase tom u seer maan afishi a branci a ken tar u Ecuador la. Hegen m ngu eren tom shin Betel. Shighe u m lu ken tar u Italia la, m tsua mer me ver Yehova hiihii ken uma wam, nahan ngu wasen mo u kuren awashima wam u m lu a mi mer me er ityom kposo kposo ken mcivir na la.”

Beau: “M hemba ngun kôôsôô a Yehova, er m lu ken tar u Ecuador ne, sha ci u ka m na shighe wam cii, sha u eren ityom i ken jijingi. Heela tseegh ga, Yehova seer veren mo, nahan m er kwagh u a saren mo hanma shighe yô, m zende m za sha ajiir a doon ashe kpishi.”

Anna: “Yange m hen mer er m lu kwav yô, me fatyô u eren tom er kwasemishen nahan ga. Kpa hegen m fa er i lu u me fatyô yô. Yehova verem doo doo, nahan saan mo iyol u geman ior hingir mbahenen, shi maan Ayou a Tartor shi kôron azende a he.”

Elke: “Shighe u m lu ken tar wam, ken tar u Austria la, ashighe kpishi yange m sôn Yehova mer a nam or môm tseegh u me henen Bibilo a nan yô. Heen ne, m ngu henen Bibilo a iorov 15! Ka mea nenge mba m henen Bibilo a ve la vea lu saan saan nahan kwagh ne a nam mkom kpishi.”

Joel: “Ka kwagh u saan iyol tsung u zan ken tar u ú fe u ga, za civir Yehova. Ka u hen u suur sha a na kpishi, shi ka wea nengen er a lu veren iniôngon you la nahan, i saan we iyol kpen kpen! Ken inyom i hiihii i m mough ken tar u Amerika m va heen ne, annongo u m lu her ne lu a mbapasenkwagh 6 tseegh, kpa hegen ngu a mbapasenkwagh 21. Iorov 110 yange ve va M-umbur.”

WE YE?

Ne anmgbianev mba nomso man mba kasev mba ne lu agumaior yô, mbamlu enev na ne ian i za pasen kwagh ken tar ugen, ape kwagh a hembe gban sha anmgbianev mba pasen kwagh u Tartor la kpa? Nahan kpa, a gba u or a wa ago iyol tsembelee ve nana er zegekwagh er ngun nahan ye. Kwagh u hemban cii yô, saa Yehova man mba ve we ndor a nan vea doo nan ishima ve nana er kwagh nahan ye. Aluer u ngu a imba dooshima ne, shi u ngu a tahav mbu za pasen kwagh ken tar ugen yô, er msen hen Yehova kpoghuloo sha kwagh ne. Shi lam a mbamaren ou man mbatamen mba ken tiônnongo sha isharen you ne. Alaghga ú nenge wer we kpa u fatyô u civir Yehova sha gbenda u injaa u nan mkom ne.

[Mkaanem ma sha peeji 3 la]

“M er msen hen Yehova tsung, shi m lam vea anmgbianev mba nomso man mba kasev mba vian ken jijingi, nahan kwagh ne wasem u nengen mer Yehova veren mba ve kegh iyol u eren un tom la doo doo.”​—Kayla, anmgbian u kwase u a mough ken tar u Amerika yô

[Ngeren u kiriki/​Foto u sha peeji 6]

Er u wa iyol i za pasen kwagh ken tar ugen yô

• Lu a ieren i henen Bibilo kpoghuloo

• Hide time sha Tom Wase ú Tartor u November, 2011, peeji 5-7.

• Lam a mbagenev mba ve vande pasen kwagh ken tar ugen la

• Tôv fa yiase man adini u ior i tar u ú soo u zan ker la

• Hen zwa u i lamen hen ijiir i u soo u za pasen kwagh la sha er u fatyô u pasen kwagh ker yô

[Ngeren u kiriki/​Foto u sha peeji 6]

Mbagenev mba ve lu pasen kwagh ken tar ugen yô, ka ve zua a inyaregh ki kuren mbamgbe vev sha u . . .

• eren tom ken tar ve iwer kpuaa hanma inyom

• geman ya ve shin kpenga ve nan haya

• eren tom u zuan a inyaregh sha Intanet

[Ufoto mba sha peeji 4, 5 la]

1 Jaqueline mough ken tar u Jamani

2 Bruno mough ken tar u Italia

3 Beau mough ken tar u Kanada

4 Siobhan mough ken tar u Ireland

5 Joel mough ken tar u Amerika

6 Jonathan mough ken tar u Amerika

7 Anna mough ken tar u Estonia

8 Elke mough ken tar u Austria

9 Chantal mough ken tar u Kanada

10 Ines mough ken tar u Austria