IWASEN SHA CI U TSOMBOR | TOM U MBAMAREN
Kwagh u Mbayev a Hanseeti u Kighir Ave sha Jingi La—Vegher u sha 1: Doo u Wan Wam Una Lu a Hanseeti u Kighir Ave sha Jingi Laa?
Mbayev kpishi mba a hanseeti u kighir ave sha jingi la. * Mbagenev kpishi ka vea lu tswen ken iyou yô, ve eren akaa sha Intanet a hanseeti ve. Aluer u de wan wou nan ngu a hanseeti u kighir ave sha jingi la yô, ka akaabo a nyi hanseeti la una fatyô u van ve a mini? Gema ka sha igbenda i nyi nahan hanseeti shon una wase ve? Ka ahwa a me nahan i doo u wanye nana er kwagh a hanseeti ken iyange?
Kwagh u i gbe u u fa yô
Igbenda i Hanseeti Ne Una Wase Yô
Una kura mbayev, shi ishima ia nyian mbamaren ga. Kwase ugen iti na ér Bethany, ngu a ônov uhar mba ve lu agumaior yô. A kaa ér: “Tar u se lu ker ne u cier iyol kpishi. Nahan gba hange hange u mbayev vea lu a gbenda u lamen a mbamaren vev hanma ijiir i ve lu cii.”
Kpa ka cii la ga. Kwase ugen u un kpa a lu a ônov yô, iti na ér Catherine, a kaa ér, “app mbagenev mba, mba aluer u wa ve sha hanseeti wou kua u wan wou yô, u fatyô u fan kwagh u nan hanma ijiir i nan lu cii. Aluer nan ngu nahan mato yô, nana lu yevese a mato kpishi shin kpishi ga kpa, u fa.”
Una wase mbayev u henen makeranta. Ngô ugen iti na ér Marie, a kaa ér, “atica ka a tindin mbayev a mbaasaimenti ken loho sha hanseeti gayô sha Intanet, mbayev di kpa ve lamen a atica a ve sha igbenda ne.”
Akaabo a Hanseeti Ne Una Va a Mi Yô
Wanye ka nan zer kighir hanseeti gbem. Agumaior ka a kighir hanseeti ahwa imôngo ken iyange. Jighilii yô, mbamaren kpa ka ve vihi shighe kpishi u kighir hanseeti shighe u ve lu lamen a mbayev vev sha hanseeti yô. Orgen u a we ior kwagh yô kaa ér icombor igen kpishi hingir er “ka mbavannya mba ve due ajiir kposo kposo ve va lu hen ijiir i môm nahan. Hanma or ka nan kenger shin hanseeti u nan hanma shighe cii.” *
Ufoto mba ijimbagh. I tôv sha kwagh ne yô, i nenge ér hanma uwer cii agumaior a ka a ker u nengen ufoto mba ijimbagh la ka a hemba ngeen. Man kwagh ne kpilighyol ga, sha ci u ka i lu ican ga u zuan a ufoto mbara sha hanseeti mba i ze sha Intanet a mi la. Ter ugen u a lu a ônov mba wan akondo uhar yô, iti na ér William, a kaa ér, “mbamaren ka ve na yô, mbayev ve zua a gbenda u nengen hanma inja foto u ijimbagh, hanma ijiir i ve lu cii.”
Mbagenev ka ve har ishima ve cii sha hanseeti. Ior kpishi hanseeti ya ve ishima. Hanseeti ve ka una saa yô, ve kaa ér ishima nyian ve, shin hingir ve ken ishima tumbuluu, shin doo ve iyol ga je kpaa. Mbamaren mbagenev kaa ér mbayev vev ka vea kighir hanseeti yô, mba nengen ve mbamaren a ice sha ityou ga. Kwase ugen iti na ér Carmen, a kaa ér, “Ashighe agen ka mea soo u lamen a wan wam u nomso shighe u a lu kighir hanseeti yô, a hide a dughum ashe, gayô a ôr kwagh a mo sha icihi, sha ci u ka a soo ér or a za un iyol ga.”
Akaabo agen. Mba ve kighir hanseeti mba zan sha Intanet a mi la ka ve tagher a mbamzeyol mbagenev sha app mba lamen a ior la, er ilyoho i ayongo man ilyoho i idyaa nahan. Shi mba ve kighir hanseeti mban la ka ve zua a iangev mbigenev sha ci u gbenda u ka ve tema shin ve lian kera shin ve yav inya shighe u ve lu kighir hanseeti la ka u doo ga, shi ka ve yaven tugh tsembelee ga. Agumaior agen ka a lamen a ior sha “ghost app.” App ne ngu inja er ka u bo ga, ka kakuletô nahan. Kpa ka a gema a yer akaa a agumaior ne a soo ér mbamaren vev ve nenge a mi ga yô.
Orgen u a lu a wan u kwase u hian yô, iti na ér Daniel, a ôr kwagh u a nenge a mi ken hanseeti u kighir ave sha jingi la jighilii yô, wener: “Hanseeti u kighir ave sha jingi la ngu a bugh or ian i nengen a hanma kwagh u a lu sha Intanet yô, u bo kua u dedoo cii.”
Mbampin mba i doo u u pine iyol you yô
‘Saa wan wam una lu a hanseeti u kighir ave sha jingi laa?’
Bibilo kaa ér: “Orfankwagh yô, ka nan ver ishima sha zende u nan.” (Anzaakaa 14:15) Sha nahan yô, pine ase iyol you wer:
‘Doo u wan wam una lu a hanseeti u kighir ave sha jingi la sha ci u wasen un u kuran iyol na shin sha atôakyaa agene? M hen sha igbenda i aluer ngu a mi yô, una wase un la, kua sha akaabo a una fatyô u van un a mi la kpa? Me fatyô u nan un hanseeti ugen u a ze sha Intanet ga yôô?
Ter ugen iti na ér Todd, a kaa ér, “hegen kpa u fatyô u zuan a uhanseeti mba ve ze sha Intanet ga la ken kasua yamen. Shi ve taver ishe ga. Aluer wan wou nan ngu a mi yô, u fatyô u fan kwagh u nan sha u tindin nan a loho gayô yilan nan lamen vea nan.”
‘Wan wam una fatyô u eren kwagh a hanseeti sha inja je kpa?’
Bibilo kaa ér: “Ishima i orfankwagh ka i za a nan ken iyan” shin sha gbenda u vough. (Orpasenkwagh 10:2) Sha nahan yô, pine ase iyol you wer:
‘Ka nyi m nenge a mi ken wan wam i tesen mo ér ngu a mimi iyolo? Lamen a mo wang wang je kpa? Ôron mo kwagh u mimi hanma shighe je kpa? Ikyav i tesen yô, pasen mo mba ve lu azende a na laa? Ka una nengen Televishen, shin una eren akaa sha tableeti shin sha kômputa nahan, a kôr iyol na tsaha kpa? Ngô ugen iti na ér Serena, a kaa ér “hanseeti u kighir ave sha jingi la ngu a inja kpen kpen, kpa gema ka kwaghbo. Hen sha akaa a alaghga u na wan wou nana hingir u eren shighe u nan lu iyev la.”
‘Me fatyô u tesen wan wam u eren kwagh a hanseeti sha inja je kpa?’
Bibilo kaa ér: “Tese wanye gbenda u nana za yô.” (Anzaakaa 22:6) Sha nahan yô, pine ase iyol you wer:
‘M fa kwagh u hanseeti kuma u me wase wan wam u kaven akaa a aa fatyô u van un a zayol la shi palegh a kpa? M fa u dughun akaa agen sha hanseeti kera sha er me fatyô u kuran wan wam je kpa? Me er nan ve me wase wan wam una fa u eren akaa a i doo u un a er a hanseeti la, shi palegh akaa a a doo u una er ga laa?’ Daniel, ter u se vande ôron kwagh na la kaa ér, “kwagh er vihi yô, mbamaren mbagenev ka ve na wanye hanseeti u kighir ave sha jingi la, maa cuku kwagh a kera gba ve u fan kwagh u wan ve la nan lu eren a mi la ga.
Fa wer: Saa a tese mbayev ve vea fa u eren kwagh a hanseeti u kighir ave sha jijingi la sha inja ye. Takeda ugen (Indistractable) kaa ér, “mbaanar mban ka ve mee or je nan hingir u eren akaa a ma nan er ga yô. Mbayev asev vea fatyô u hendan a imeen la ga, hemban je yô shighe u mbamaren vev ve lu nengen akaa a ve eren sha hanseeti la ga yô.”