Bibilo tese ér ka sha inja shin hange hange u soon iyol you sha gbenda u vough. Dooshima ne wa u wan iyol you ikyo shi nan iyol you icivir shi nengen wer u gba kwagh. (Mateu 10:31) Er Bibilo ma i sue ieren i or soon iyol i nan tseegh la yô, i er nahan ga, kpa i gema i nenge kwagh u or soon iyol i nan ne sha gbenda u vough.

Ka an i gbe u nana doo se ishima hiihii?

1. Gba u Aôndo una doo se ishima hiihii. Bibilo tese ér tindi u tamen yô, ka: “Ter Aôndo wou A̱ doo u ishima sha ishima you cii.”—Marku 12:28-30; Duteronomi 6:5.

2. Tindi u tamen u sha uhar yô, ka: “Or u nan we ndor a we yô, nana̱ doo u ishima er we iyol you nahan.”—Marku 12:31; Levitiku 19:18.

3. Er Bibilo i we tindi jighilii ér u soo iyol you ga nahan kpa, tindi u “Or u nan we ndor a we yô, nana̱ doo u ishima er we iyol you nahan” la tese ér, gba u u soo iyol you shi u naan iyol you icivir, aluer u er nahan yô, a lu kwagh u vough man u sha injaa kpaa.

Ka an yange nan doo Yesu ishima hiihii?

Yesu yange tese ér Aôndo doo un ishima man orwanndor kua iyol na, sha gbenda u vough shi kaa a mbahenen nav ér ve dondo ikyav na ne.—Yohane 13:34, 35.

1. Yange Yehova Aôndo doo un ishima hiihii shi na iyol na cii u eren Un tom. “Tar u̱ fa er Ter A doom ishima, man shi M eren er Ter A wem kwagh yô.”—Yohane 14:31.

2. Yange orwanndor doo Yesu ishima, nahan tese kwagh ne sha u wan mbamgbe mba mbagenev ikyo je yô, na uma na sha ci ve je kpaa.—Mateu 20:28.

3. Yange tese ér iyol na doo un ishima sha gbenda u vough, sha u tôôn shighe memen, shi yan kwagh, shi lun vea mbadondon un man mba lu u vea va lu mbahenen nav la.—Marku 6:31, 32; Luka 5:29; Yohane 2:1, 2; 12:2.

Aluer mbagenev hemba doon we ishima yô, kwagh ne una pande icivir you shin msaanyol wou wee?

Ei, sha ci u i gba se sha ibeen i Aôndo, u ieren na i vesen i lu dooshima u tangen iyol la ga. (Genese 1:27; 1 Yohane 4:8) Kwagh ne tese ér i gba se sha gbenda u se tesen mbagenev dooshima yô. U soon iyol you la ka kwaghbo ga, kpa aluer se hemba soon Aôndo a akaa agen cii shi se hemba veren ishima u eren akaa a dedoo a mbagenev yô, a hemba saan se iyol cii. Er Bibilo i kaa nahan, “U nan a na kwagh hembe saan iyol a u ngohol a ngohol kwagh.”—Aerenakaa 20:35.

Nyian ne ior kpishi ka ve senge ér aluer u hemba soon iyol you yô, a saan we iyol. Hen a ve yô, kwagh u “iyol you i doo u ishima” la kar tile sha ityough ki “or u nan we ndor a we yô, nana̱ doo u ishima” la. Nahan kpa, akaa a a er sha ayange ase ne tese ér, or ka nana dondon kwaghwan u sha kwaghfan u ken Bibilo la yô, nan lu gbong gbong shi i saan nan iyol. Kwaghwan ne kaa ér: “Ma or nana̱ de keren kwagh u doon sha ci u nan iyol i nan tsô ga, kpa i̱ lu kwagh u doon orgen kpaa.”—1 Mbakorinte 10:24.