Ei, Bibilo jimin cii gba zwa môm. Shin er ashighe agen ka i lu inja er Bibilo ôr kwagh shi i hide i nyiman iyol i i nahan kpa, aluer u dondo akaawan a a lu shin heen ne yô, u hemba kaven kwagh u Bibilo i lu ôron la tsembelee:

1.   Time sha kwagh u avur a a kase ijiir la a lu ôron la. Hanma takerada cii aluer u ngu ôron u, man u tsua a tsua ajiir u ngu ôron yô, a lu u inja vough er or u nan gber u la nan ôr akaa agen, nan hide nan nyiman a nahan.

2.   Fa mnenge u or u nan nger kwagh shon la. Alaghga mba yange ve nenge kwagh er sha ashe ve la vea pase kwagh shon vough, kpa hanmô ve nana pase sha asember a nan kposo, shi mbagenev vea pase vighe vighe er mbagen nahan ga.

3.   Lu a yiase man aeren a ityôô a ior mba i er kwagh ve la ken ishima.

4.   Fa kwagh u ishember i til sha mi la, aluer i tile sha ityough ki kwagh ugen shin ka kwagh shon u i yer la kpôô kpôô yô.

5.   Fa wer ashighe agen or ka nan er kwagh sha uwegh ku nan jighilii ga, kpa i kaa ér ka nan nan er kwagh shon ye. *

6.   Nenge ken Bibilo i i gem i vough yô.

7.   De nôngon wer u kôôm kwagh u Bibilo i er la a zua sha mbamhen shin atesen a kwaghaôndo a a lu shami ga la ga.

 Akaa a i tese ikyav sha mi heen ne tese er akaawan a i ter sha heen ne aa wase u u zuan a iwanger sha akaa agen a i nger ken Bibilo, a i lu inja er a gba zwa môm ga la yô.

Kwaghwan u sha 1: Avur a a kase la

  Aluer Aôndo yange mem tom sha iyange i sha utaankaruhar la yô, er nan ve shi i kaa ér ngu eren tom here? Kwagh u i pase ken takerada u Genese sha kwagh u igbetar la tese ér, ape i kaa ér “sha iyange i sha utaankaruhar la, [Aôndo] mem tom Na u A er cii” la, lu tom u gban akaa a shin tar, a se nengen a mi sha ashe bong la, Aôndo yange mem u ye. (Genese 2:​2-4) Nahan kpa, kwagh u Yesu yange kaa ér Aôndo “ngu eren tom her” la nyiman kwagh ne ga, sha ci u yange lu ôron kwagh u ityom i Aôndo igen. (Yohane 5:17) Ityom ne wa mne u a ne i nger Bibilo shi a lu kuran uumace shi koson ve la kpa ker.​—Pasalmi 20:6; 105:5; 2 Peteru 1:21.

Kwaghwan u sha 2 man 3: Mnenge u orngeren man yiase

  Ka han Yesu yange bugh orapirashe la ashe? Takerada u Luka kaa ér Yesu yange bugh orgen ashe shighe u “za mgbôghom a Yeriko yô,” takerada u Mateu di gema ter mbaapirashe uhar shi kaa ér kwagh ne yange er zum u Yesu lu “duen ken Yeriko yô.” (Luka 18:​35-43; Mateu 20:​29-34) Iorov mbauhar mban cii yange ve nger kwagh ne er hanmô ve nan nenge yô, shi hanmô ve nan sue kwagh u orgen la nan nger yô. Sha kwagh u iyenge i mbaapirashe mbara yô, Mateu pase jighilii ér yange lu iorov uhar, Luka di hemba veren ishima sha u môm ken a ve, u Yesu lu lamen a na jighilii la. Gema ijiir i kwagh ne yange er la yô, mbatôvon sha akaa a shin inya kav nahan ér, sha shighe u Yesu la, gar u Yeriko lu ker avegher ahar, vegher u môm la lu gar u Mbayuda u tse, gema gba ica a vegher ugen, u lu gar u Mbaromanu u he la je kuma er kilomita môm man tiôn nahan. A̱ shi nan kpa Yesu lu her atô u agar a ahar ne zum u a er ivande ne la.

Kwaghwan u sha 4: Fa kwagh u ishember i til sha mi la, aluer i tile sha ityough ki kwagh ugen shin ka kwagh u i yer la kpôô kpôô yô

  A va tim tar u se tem sha u ne keraa? Bibilo ôr ken Orpasenkwagh 1:4 ér “tar yô, [ua lu] gbem sha won,” man alaghga mbagenev vea nenge ér kwagh ne nyiman kwagh u i kaa ér “asemaakaa aa hia kera man tar” la. (2 Peteru 3:10) Nahan kpa, ka a ter ishember i “tar” la sha ajiir agen ken Bibilo yô, i lu kwagh u tar u se tem sha u ne jighilii i ôron ye. Ajiir agen di yô, ishember i “tar” la ka i tile sha ityough ki uumace mba sha tar cii. (Genese 1:1; 11:1) Kwagh u i nger ken 2 Peteru 3:10 ér a va tim “tar” kera la, inja na yô ér, ka u a va nande tar u se tem sha u ne kera sha usu ga, kpa ka “mtim u mba ve vende Aôndo la” i lu ôron ye.​—2 Peteru 3:7.

Kwaghwan u sha 5: Kwagh u or nan er sha uwegh ku nan jighilii ga, kpa i kaa ér ka nan nan er yô

  Shighe u Yesu za ken Kapernahum la, lu torutya la iyolna va zamber a na shin yange tindi a tindi ioro? Mateu 8:​5, 6 kaa ér torutya la yange va hen Yesu iyolna. Luka 7:3 di gema kaa ér torutya la yange tindi mbatamen mba Mbayuda hen Yesu, ve za zamber a na sha ci na. Alaghga a lu inja er Bibilo nyiman iyol i i heen nahan, kpa kwagh ne wanger, gadia ka torutya ne iyolna yange tsua u za zamber a Yesu ve tindi mbatamen mbara ér ve za lam sha ci na ye.

Kwaghwan u sha 6: Nenge ken Bibilo i i gem i vough yô

  Se cii se mba mbaasoraboo? Bibilo tese ér se cica se ya dyako u isholibo hen Adam, orumace u hiihii la. (Mbaromanu 5:12) Gbenda u i gem avur a Bibilo agen ken Ubibilo mbagenev la nôngo u nyiman kwagh ne, sha ci u i kaa ér or u dedoo yô, nan “ngu a isholibo ga” shin “nan er isholibo ga.” (1 Yohane 3:​6, The Bible in Basic English; King James Version) Kpa ken zwa Grika u yange i hii ngeren Bibilo ker la, i nger ishember i ken 1 Yohane 3:​6, i i gem ér “isholibo” la sha gbenda u pasen kwagh u a lu eren zan ave yô, er i lamen ken zwa shon la. Isholibo i i mar se ker, i se lu a tahav mbu yangen ga ne, i kaha kposo a isholibo i or nan er sha apera, sha u peren atindi a Aôndo kwa kimbir kimbir la. Sha nahan yô, i gema ivur ne ken Ubibilo mbagenev sha gbenda u been a anyiman la kera; i gema ér, “nan eren isholibo ga” shin “isholibo i eren ya tor ken a nan ga.”​​—Icighan Bibilo; Phillips.

Kwaghwan u sha 7: Ka Bibilo i lu tamenkwagh ye, ka ityesen i kwaghaôndo ga

  Yesu ngu kwaghmôm vea Aôndo shin Aôndo hemba Yesu? Yesu yange kaa shighe ugen la ér: “Mo a Ter ka kwagh môm,” man ka inja er kwagh ne nyiman mkaanem nam ma yange kaa ér “Ter hembam” la nahan. (Yohane 10:30; 14:28) U se kav inja i mkaanem man vough yô, a gba u se time se fa kwagh u Bibilo i er jighilii sha kwagh u Yehova vea Yesu la, a u nôngon ser se kôôm avur la a zua sha ityesen i Triniti, i i dugh ken Bibilo ga la. Bibilo tese ér Yehova ka Ter u Yesu, kua Aôndo u Yesu, shi Yesu civir un je kpaa. (Mateu 4:10; Marku 15:34; Yohane 17:3; 20:17; 2 Mbakorinte 1:3) Yesu ngu kwaghmôm a Aôndo ga.

 Aluer u ôr avur agen henpe i nger mkaanem ma Yesu yange ôr ér “mo a Ter ka kwagh môm” la yô, u nenge er Yesu yange lu ôron lu kwagh u mlu u un lu vea Ter na Yehova Aôndo kôôsôô, ve lu eren tom imôngo sha u kuren awashima u Ter na la yô. Yesu shi yange va kaa ér: ‘Ter ngu ken a mo, man mo kpaa m ngu ken Ter.’ (Yohane 10:38) Yesu yange soo ér mbahenen nav kpa ve lu kôôsôô vea Ter, er un nahan, sha ci u yange er msen hen Aôndo sha kwagh ve, kaa ér: “Icivir i U nem la, M na ve, sha u ve̱ lu kwagh môm er se se lu kwagh môm nahan. Mo ken a ve, man We di ken a Mo.”​—Yohane 17:​22, 23.