దేవుని ఇష్టం ఏంటి?
మనం పరదైసు భూమ్మీద ఎప్పటికీ శాంతి సంతోషాలతో జీవించాలని దేవుడు కోరుకుంటున్నాడు!
‘అది ఎప్పటికైనా నిజమౌతుందా?’ అని మీకు అనిపించవచ్చు. దేవుని రాజ్యం దాన్ని నిజం చేస్తుందని బైబిలు చెప్తుంది. ఆ రాజ్యం గురించి, మనుషుల విషయంలో దేవుని ఉద్దేశం గురించి అందరూ తెలుసుకోవాలనేది ఆయన ఇష్టం.—కీర్తన 37:11, 29; యెషయా 9:7.
మనం బాగుండాలని దేవుడు కోరుకుంటున్నాడు.
ఒక మంచి తండ్రి తన పిల్లలు బాగుండాలని కోరుకున్నట్టే, మన పరలోక తండ్రి కూడా మనం నిరంతరం సంతోషంగా ఉండాలని కోరుకుంటున్నాడు. (యెషయా 48:17, 18) “దేవుని ఇష్టాన్ని చేసే వ్యక్తి నిరంతరం జీవిస్తాడు” అని ఆయన మాటిచ్చాడు.—1 యోహాను 2:17.
మనం తన మార్గాల్లో నడవాలని దేవుడు కోరుకుంటున్నాడు.
మనం ‘ఆయన త్రోవల్లో నడిచేలా తన మార్గాల గురించి మనకు నేర్పించాలని’ సృష్టికర్త కోరుకుంటున్నాడు. (యెషయా 2:2, 3) తన ఇష్టాన్ని ప్రపంచమంతటా తెలియజేయడానికి దేవుడు “తన పేరు కోసం” కొంతమంది ప్రజల్ని ఎంచుకున్నాడు.—అపొస్తలుల కార్యాలు 15:14.
మనం తనను ఐక్యంగా ఆరాధించాలని దేవుడు కోరుకుంటున్నాడు.
యెహోవా స్వచ్ఛారాధన వల్ల ప్రజలు విడిపోరు కానీ ఒకరినొకరు మనస్ఫూర్తిగా ప్రేమించుకుంటూ ఐక్యంగా ఉంటారు. (యోహాను 13:35) దేవున్ని ఐక్యంగా ఆరాధించడం గురించి ఎవరు అన్నిదేశాల్లో బోధిస్తున్నారు? ఈ బ్రోషుర్లో దానికి జవాబు తెలుసుకోమని మిమ్మల్ని ఆహ్వానిస్తున్నాం.