Mbe nijale noho i COVID-19 igne avao ty ndaty magneran-tane tagnate i taom-panompoagne 2021 a ignehoe. Nihazavaegne tamy i lahatsoratse tihoey tie “Fizaragne Fagnampeagne Magneran-tane Agnate i Arete-manjamagney,” fa an-tapetrisa’e dolara b ty vola lanintikagne mba hagnampeagne o rahalahy naho o rahavaveo. Komity Vonje Meke miiake 950 mahery ty natsangagne.

 Ndra tie fa nampijale o rahalahy naho o rahavaventikagneo i arete manjamagney, le mbe nitratse ty loza arake ty natiora naho ty voka ty raha atao o ndatio ka iareo. Nisy 200 mahery i loza rey. Mba hiatrehagne irey, le nagneke ty Komity ty Mpandrindra amo o Filan-keve-pitantanagneo eo fa hanokagne 8 tapetrisa dolara fagnampe’e, ankoatse i fagnampeagne mifandrambe amy COVID-19 igne. Dineho ty fomba ampiasaegne i fagnomezagne atao’o rey mba hagnampeagne ze nizoem-boigne tamy ty loza roe vaho niseho tsy ela retoagne.

 Nanomboke nipoake i volkan Nyiragongo, a Repoblike Demokratike i Kongo agney, tamy 22 Mey 2021. Maro ty tragno naho ty lakilasy niravae ty rano i volkan-y, sady nisy famorian-drano bey raike nisimba ka. Faie tsy i rano volkan-y avao ty nagnoho-doza. Tagnate ty andro maromaro tafara ty nipoaha i volkan-y, le nisy lemboke boake amy i volkan-y nipoke tamy ty tanà i Goma sady mateteke nisy horohoron-tane kede ty tagne. Ty an-tsasa’e mahery amy ty ndaty ao ro nampialagne tamy i tanàgney. Ndaty an-ketse’e ty nilay, sady nisy tamy iareo nandeha ta Roanda agne.

 Agnisa o nafindra toeragne rehoe ty Vavolombelo i Jehovah miiake 5 000 teo ho eo. Niravae i volakan-y ty tragno ty ila’e, ty ahy ty ila’e ka nisy namaky tafara i fifindragney. Niara-niasa ty Komity Vonje Meke ta Roanda naho ta Repoblike Demokratike i Kongo agne. Izao ty tatetse natao ty sampa i Kongo (Kinshasa) miomba ty Komity Vonje Meke raike: “Fa nanomboke nizara hanegne, rano, lamba fisaforagne, naho akanjo i komitỳ, ndra tie mbe nikorontagne aza ty tan-tanàgne tao sady mbe tsy nampialagne tao o ndatio.” Nisy rahalahy naho rahavave 2 000 mahery ty niavy amy ty tanàgne raike. Nagnomey mositikera naho arovava hoahy iareo ty Komity Vonje Meke, sady nagnazava tie akore ty atao mba ho voaro amy COVID-19 naho o kolerao.

 Tagnate ty telo volagne avao, le vare enegne tòny fara fahakede’e, koba boake amy tsako enegne tòny, menake telo tòny vaho rano telo tòny ty zinara tamo o rahalahintikagneo. Mba hitsitsiagne vola, le ty hanegne tan-toeragne teo avao ty niviliegne sady le avy le natamba bey. Toe lafo ka naho magnafatse boake ivela’e agne.

 Niravae i volkan-y ty tragno ty rahavave raike ie amy izao mbe vaovao. Hoe reke: “Tena kivy zahay sady nalahelo.” Faie nahazo fagnampeagne naho fampaherezagne ty keleia’e naho fa niavy eo. Izao ty nirehafe’e: “Mbe managne ze raha ilae’ay avao zahay satria eo avao ty Jehovah magnampe anay. Tsapa’ay tie ente i Jehovah ty entagne mavesatse ama’ay, le manjare mora ama’ay ty minday aze.”

 Fa an-tao’e maro zay ty Venezoela ro tratse ty krizy ara-toekarena lahibey. Tena mafe ty fiaigna o rahalahintikagne agneo, tsy ampe hanegne, sady mitombo ka ty hampiarotegne agne. Faie tsy magnaligno iareo ty fandamina i Jehovah.

 Tamy taom-panompoagne fara’ey zao, le 1,5 tapetrisa dolara mahery ty nilany mba hivilianagne naho hitateragne hanegne naho savony hoahy ty keleiagne sahiragne. Izao ty tatetse natao ty sampa i Venezoela: “Tena tsy mora tihoe mitatetse hanegne 130 tòny isam-bolagne magneragne i firenenay. Tsy maintsy atao azo antoke ka tie avy amy i rahalahy sahiragne rey agne i rahay.” Mateteke hanegne tsy mora simba ty alefa o rahalahio. Nirehafe i sampagney ka tie: “Mateteke le avy le vilie’ay mitambatse i hanegney. Amy ty fotoa ty ahavokaragne i hanegne zahay ty mivily, satria amy izay reke ty mora. Le ze fitateragne tsy mandany vola ka naho fa avy eo ty ampiasae’ay.”

 Agnisa ty Komity Vonje Meke a Venezoela agne ty Leonel, sady tena tea’e i andraiki’ey. Hoe reke: “Tena hafa tihoe magnampe ze nizoem-boigne. Nimate i COVID-19-oy ty valiko, le tena mampahery ahy o andraikitse iohoe amparake ze nimateza’e zay. Maro raha atao avao raho sady tsapako tie mahasoa o rahalahy sahiragneo ty raha ataoko. Treako tie tena mitagne ty saontsi’e ty Jehovah le tsy magnaligno o mpanompo’eo.”

 Taloha ty rahalahy raike toy niagnisa ty Komity Vonje Meke. Hoe reke: “Iraho ka ty amy izao ty mipay fagnampeagne. Tsy tihoe nahazo ze raha nilae’ay avao zahay, fa nampea o rahalahio ka zahay mirovaly mba ho tony lognandro. Nikarakara anay iareo, nampionogne anay, le nampahery anay.”

 Le avy le avy tampoke o lozao kindraike, ndra zara’e naho mba mampiomagne. Faie mateteke ty fandamina i Jehovah ro afake mandefa fagnampeagne malaky, noho ty fagnomezagne atao’areo hoahy ty asa magneran-tane. Trea amy donate.isa4310.com ty fomba ila’e azo anoagne fagnomezagne. Misaotse anareo zahay satria tea magnomey nareo.