Tena miambake ty Baiboly fa tsy manahake o boke ila’eo. Ty anto’e, ao avao ty ahatreavagne torohevetse boake amy i Mpamorogne antikagney. (2 Timoty 3:16) Afake magnampe antika hiova ty hafatse agnate’e ao. Hoe ty Hebreo 4:12: “Velogne naho mahery ty saontsin’Andrianagnahare.” Afake magnasoa ty fiaigna’o ty Baiboly. Magnomey tari-dalagne antika sady magnampe antika hahafantatse an’Andrianagnahare naho ty raha safirie’e ty Baiboly.​—1 Timoty 4:8; Jakoba 4:8.

Magnomey tari-dalagne amy ty fiaignagne reke. Misy torohevetse mahasoa antika tsikiraidraike ty amy Baiboly ao. Magnampe antika reke mba...

• hahay hifandrambe soa amy ty ndaty hafa.​—Efesianina 4:31, 32; 5:22, 25, 28, 33.

• hanagne fo tony naho ho salama.​—Salamo 37:8; Ohabolana 17:22.

• ho soa findesam-batagne.​—1 Korintianina 6:9, 10.

• hahazo ze raha paliaegne amy ty fiaignagne.​—Ohabolana 10:4; 28:19; Efesianina 4:28. *

Mpivaly tanora mipetrake Azia agne ty Vicent naho i Annalou. Trea iareo fa tena mahasoa ty torohevetse agnate Baiboly ao. Vaho tsiela ty nifanambalia iareo, le mbe tsy nifankazatse naho nahay nifampirehake soa. Tena nila nikezake areke iareo. Faie naho fa nanomboke nampihatse ze raha nivakie iareo tagnate Baiboly ao iareo, le nandrambe soa. Hoe ty Vicent: “Nagnampe ahy ho bey hatea ty fanoako izay. Tena paliaeko zay naho fa izahay miatreke olagne. Manjare sambatse zahay, satria magnorike ze raha rehafe o Baibolio.” Hoe ka ty Annalou: “Nagnampe anay ty tantara o ndaty agnate Baiboly ao. Tena sambatse zahay amy izao, sady managne tanjogne soa amy ty fiaignagne.”

Ahafantaragne ty miomba an’Andrianagnahare. Hoe ka ty Vicent: “Amparake ze namakiako Baiboly zay, le tsapako tie nanjare nifandrambe marine tamy i Jehovah raho.” Tena afake magnampe azo hahafantatse an’Andrianagnahare areke ty Baiboly. Tsy tihoe handrambe soa boake amy ty torohevetse agnate’e ao avao rehe naho fa mamaky aze fa hanjare ho ragnen’Agnahare ka. Ho trea’o ao ka fa mampitamà raha fanjaka azo reke amy ty hoavy, le i tena fiaignagney, ndra i havelogne nainai’ey. (1 Timoty 6:19) Tsy misy boke hafa mirehake raha hoe izay naho tsy ty Baiboly avao.

Handrambe soa rehe naho manomboke mamaky Baiboly sady lelia’e tohize’o avao zay. Hihasoa ty fiaigna’o manomboke amy izao, le hahafantatse an’Andrianagnahare ka rehe. Va’e hisy raha tea’o hagnonteneagne naho fa ihe mamaky aze. Izay zao ty raha niseho tamy i manam-pahefagne Etiopianay, fa ho 2 000 taogne lasa zay, le azo’o atao ty mitsikombe aze. Naho fa nagnonteneagne reke tie: ‘Azo’o vao o raha vakie’ò?’ Le hoe reke: ‘Akore moa ty hahazoako aze naho tsy misy magnazava aze amako?’ * Nagneke o tandapa Etiopiana iohoe naho fa nampea i Filipo. Ty anto’e, mpiana i Jesosy ty Filipo, le nahay soa ty raha rehafe o Baibolio. (Asan’ny Apostoly 8:30, 31, 34) Te hahazo ze raha rehafe o Baibolio ka vao rehe? Fenò areke i fangatahagne ao amin’ny www.isa4310.com/mg aoy. Ndra henteo ty adiresy amy ty gazete toy ato, le manoa fangatahagne amy ze adiresy marine azo ao. Afake mirehake amo o Vavolombelo i Jehovah-o ka rehe, ndra azo’o atao ty mandeha amy ty Anjomba i Fanjakagney marine azo. Magnino naho le avy le atombo’o androany i famakiagne Baibolỳ? Hagnampe azo hanagne fiaignagne soa ty fanoa’o izay.