Ta Roma tagne ty niterahagne ahy, le agne ka ty nahabey ahike. Maro ty ndaty nahantra nitoboke tamy i faritse nisy anaỳ sady mafe i fiaignagney. Tsy haiko hatrake amy hinane zao tie ia ty reneko niterake ahy, le izahay amy i babako ka tsy mba nifandrambe soa. Nianatse ty raha fatao o ndaty jomajomake mirererere avao rey raho naho fa nihabey.

Mbe tsy ampe folo taogne raho, le fa nangalatse. Le ie naho fa ni-12 taogne raho, le nanomboke nisintake ty tama’ay tao kindraike. Mateteke ty babako ro nangalake ahy amo o polisio agne, satria tena nasiake raho sady lava nibosehako iaby ze ndaty hirike. Tsy nipetrake tama’ay tao sasa raho naho fa ni-14 taogne. Nanjare nifoke rongony sady nirererere avao raho. Tsy nahatrea tane hiroroagne raho, hafarako mateteke namaky tobile o ndaty naho fa halegne, le tao raho ty niroro. Ie naho fa mangararake atignanagne i androy, le fa mifoha raho. Le amy i toeragne misy rano rey raho ty nisasa.

Nanjare tena nahay nangalatse raho naho fa nandeha ty fotoagne. Nataoko iaby ndra mitavagne ndra mamaky tragno naho fa halegne. Nalaza raty raho hafara’e tsiela tafara izay, le nisy malaso rey zay nitaogne ahy hiarake tamy iareo. Nanjare “nisondrotse girady” raho, satria nanjare namaky banke. Tena niraty saigne raho, le nanjare tò rehake tamy i malaso namako rey. Lava ninday ze basiko zay avao raho ndra aia ndra aia ombako. Naho fa niroro aza raho, le niondanako i basikoy. Mifoke rongony, mangalatse, mila ampela, naho mampijale ndaty, izay avao ty nifiaignako. Mateteke raho ro nitrà o polisio, satria natao iareo manahake ty pay o haò. Tam-pirizò agne aza ty ankandavà ty fiaignako, satria mateteke raho ro nigadra.

Nandeha nitilike i zay i reneko fara’e zay raho tie indraike zay naho fa nivotsotse. Tagne raho vaho nahay tie kay nanjare Vavolombelo i Jehovah reke naho i ana’e roe zay. Nitaone iareo nivory niarake tamy iareo amo o Vavolombelo i Jehovah-o tagne raho. Le nandeha raho, satria mbe teako ho hay tie manao akore ty agne. Faie naho fa niavy agne raho, le tsy nimete naho tsy nitoboke tagnila i lalagney teo. Ty anto’e, amy izay raho afake magnara-maso soa ze ndaty mizilike naho miboake. Ie amy izaò i basikoy le mbe tamako avao tamy izay.

Tena nagnova ty fiaignako i fivoriagne ignehoe. Hoe tsy tan-tane tetoa zay raho. Ndaty soa fagnahy naho falefale iaby ty nitreako tagne. Nirambese iareo soa ka raho. Tena tsy halignoko ty hasoa fagnahy naseho iareo tamako, sady treako ka tie tsy nanao soamiatreke iareo. Le vata’e tsy nitovy tamy i toeragne nisy ahỳ tagne ty raha nitreako tamo o fivoriagne iohoe.

Nanomboke nianatse Baiboly tamo o Vavolombelo i Jehovah-o raho. Naho fa nandeha i fianaragney, le vao mainke tsapako tie, tena nila niova raho. Noriheko i toro lalagne amy Ohabolana 13:20 ao manao tihoey: “Ho hendre ze miharo amy ty hendre, faie hahatrea loza ze miragnetse amy ty tsisy saigne.” Tsy niarake tamy i malaso ragneko rey sasa areke raho. Tsy mora aloha ty nanao izay. Faie noho ty fagnampea i Jehovah, le nivitako avao ty tsy niarake tamy iareo sasa.

Nisintake tamy i raha nampaloto ty vatako rey ka raho. Tsy nimora zay, faie nikezake mafe avao raho, le nivitako avao ty niala tamo o sigarao naho o rongonio. Nitapaheko ka i volokoy, satria tena nilava bey tamy izay. Tsy nanao kiviro sasa raho, le tsy nanao rehake maloto sasa ka. Sambako tamy izay vaho nahavita nifehe tegna zao amparake ty niaignako.

Tena tsy niteàko taloha ze o mamaky teny naho mianatse zao. Ela areke raho vaho nahavita nifantoke naho fa nianatse Baiboly. Faie nikezake mafe raho, le nanjare nitombo tsikedetsikede ty hateako i Jehovah. Tsapako tie nisy raha niova ty tamy ty fiaignako. Ty anto’e, nanomboke nahatsapa raho tie nagnenjeke ahy ty eretsereko naho fa nanao raha raty. Mateteke raho ro nikivy, satria tsy niazoko antoke tie navela i Jehovah ty heloko noho i raha tsy nimete nataokoy. Tena nampahery ahy areke ty tantara i Davida Mpanjaka tamy i fotoagne rey, satria navela i Jehovah ty helo’e, ndra tie nanao fahotagne lahibey maro aza reke.​—2 Samoela 11:1–12:13.

Faie nisy raha hafa ka tsy nimora tamako ty nanao aze. Tsy ino zay fa ty fitoriagne isan-tragno. (Matio 28:19, 20) Ty anto’e, natahotse raho tsy mone ho tendreke i ndaty nampijaleko ndra nanoako i asa ratiko taloha rey. Faie tsy natahotse sasa raho naho fa tafara tatoy. Nanjare tena niteàko ty magnampe o ndatio hahafantatse miomba i Babantikagne an-dagnitse agney, le i Babantika soa fagnahy naho tea mamela helokey.

Va’e fa nimate raho hinane zay naho tsy nahafantatse ty miomba i Jehovah! Fa nimate ty ankamaroa i ragneko taloha rey, le ty ila’e gadra. Fa i raho tsy hoe izay. Tena sambatse raho sady managne raha tamaegne fanjaka amy ty hoavy. Fa mahay miambane naho mankatò raho hinane zao. Haiko ka ty mifehe ty tegnako naho misy ndaty manao raha mahaboseke ahy. Ty voka’e, manjare mahay mifandrambe ama o ndaty raho. Sambatse ka raho, satria managne valy ampela soa zay. I Carmen ty agnara’e. Tena fale zahay roe magnampe o ndatio hianatse Baiboly.

Hy, fa ho nihalignoko! Managne asa soa ka raho hinane zao. Ie aloha mbe misy ifandrambesa’e amy banke avao. Faie magnalio ty asako agne fa tsy mamaky banke sasa. ▪