Tsahatsaharo ty Fihetseham-po’o

MISY fotoagne vao rehe malahelo? Sa magnamelon-tegna, sa mahatsiaro ho tsy misy dika’e? Sambe mandalo amy izay eo iaby o ndatio. Maro ty ndaty kivy satria sarotse ty fiaignagne, mitombo o hampiarotegneo, sady manjaka ty tsy rare’e.

Faie va’e hanimba antikagne ty fihetseham-po hoe izay. Va’e hanjare tsy hatoky tegna tikagne, ndra tsy hisaigne soa, ndra tsy ho fale. Hoe ty Baiboly: “Kivy vao rehe amy ty andro mahaore? Naho izay, le hihegne ty heri’o.” (Ohabolana 24:10) Faie mipay hery naho tanjake tikagne satria mafe ty fiaignagne amy ty tontolo mikorontagne toy. Ilaegne areke ty manahatsahatse ty fihetseham-pontikagne. *

Magnampe antikagne amy izay ty Baiboly. I Jehovah ro Mpamorogne naho Mpikarakara antikagne, le tsy tea’e hamoe fo tikagne naho kivy loatse ndra naho fa tsy misy raha tamaegne. (Salamo 36:9) Andao areke handineke fomba telo agnampea ty Saontsi’e antikagne.

Sarobily Aman’Andrianagnahare Rehe

Misy ty mihevetse fa maro raha atao ty Andrianagnahare, le tsy midare ty fihetseham-po o ndatio. Izay ka vao ty heve’o? Faie magnomey toky antikagne ty Baiboly fa tena mihevetse ty fihetseham-pontikagne i Mpamorogney. Hoe ty mpanao salamo: “Marine ze torotoro fo ty Jehovah, sady magnavotse ze mamoe fo.” (Salamo 34:18) Mampahery vata’e ty mahafantatse fa marine antikagne i Mpanjaka fara’e maherỳ naho fa ore tikagne!

Tsy tihoe tie mafe fo ndra tsy midare antikagne ty Andrianagnahare. Hoe ty Baiboly: “Andrianagnahare hatea.” (1 Jaona 4:8) Tea’e o ndatio sady malahelo reke naho fa mijale iareo. Ondevo ta Ejipta agne ohatse o Israelitao 3 500 taogne lasa zay, le hoe ty Jehovah: “Treako soa ty haorea o ndatiko a Ejipta agne reo, sady fa reiko ty fitaraigna iareo amo o ndaty mamoresé iareo hiasao. Fantako soa ty fijalea iareo. Hizotso hagnafake iareo ... raho.”—Eksodosy 3:7, 8.

Fantan’Andrianagnahare soa ty fihetseham-pontikagne. “Ie ty namorogne antikagne.” (Salamo 100:3) Afake matoky areke tikagne fa taka’e ze raha tsapantikagne, ndra tie tsy mahatakatse izay aza ty hafa. Izao ty rehafe ty Saontsi’e: “Tsy manahake ty fagnentea o ndatio ty fagnentean’Andrianagnahare, satria magnente ty trea ty maso’e o ndatio, fa i Jehovah magnente ty fo.” (1 Samoela 16:7) Tsy mietake ama’e ndra ty fihetseham-pontikagne agnate’e agne aza.

Fanta i Jehovah ka fa tsy voririke naho manao fahadisoagne tikagne. Faie fale tikagne satria bey hatea naho mamela heloke i Mpamorogne antikagney. Hoe ty Davida mpanoratse Baiboly: “Manahake ty rae mitretré ty ana’e ty itretréza i Jehovah ze ndaty matahotse aze. Fanta’e soa ty namboara’e antikagne, sady tsy haligno’e fa lemboke tikagne.” (Salamo 103:13, 14) Tena miambake ty fivazohoan’Andrianagnahare antikagne. Va’e ty raty avao ty treantikagne amy ty vatantikagne. Faie mivazoho ze soa amantikagne ao reke, sady tsy mifantoke amy ty hadisoantikagne naho mibebake tikagne.—Salamo 139:1-3, 23, 24.

Naho fa mahatsapa ho tsy misy dika’e rehe, le ialio ze fihetseham-po zay. Tadidio fa sarobily aman’Andrianagnahare rehe!—1 Jaona 3:20.

Anò Ragnetse Maifitse Azo ty Andrianagnahare

Izay ty fomba faharoe hagnampe antikagne hanahatsahatse ty fihetseham-pontikagne. Naho manahake ty fomba fiheveran’Andrianagnahare antikagne tika, le hanjare ho ragne’e maifitse aze. Faie afake ty ho nama’e vata’e vao tikagne?

Rae bey hatea ty Jehovah Andrianagnahare, le vognogne hagnampe antikagne hifandrambe marine ama’e. Hoe ty Baiboly: “Magnarinea an’Andrianagnahare, le hagnarine anareo reke.” (Jakoba 4:8) Mahagaga vata’e fa ndra maleme, ndra mpanota aza tikagne, le afake miragnetse maifitse amy i Mpanjaka ze kila rahay!

Saontsien’Andrianagnahare amy Baiboly ao ty miomba aze, le afake mahafantatse aze soa tikagne. Mahafantatse ty toetse’e mahafinaritse tikagne naho fa mamaky io tsy tapake. * Manjare marine aze tikagne naho fa misaintsaigne o toetse’e rehoe. Ho treantikagne fa Rae bey hatea naho managne fo miferenaigne reke.

Mahasoa ka ty misaintsaigne laleke ze raha vakientikagne amy Baiboly ao. Manjare milenteke am-po naho an-tsaintikagne ao ty fomba fiheve i Jehovah, le mampahery naho mitarike vaho magnitsy antikagne. Tena mipay izay tikagne naho fa mivali-doha ndra minekoneko. Hoe ty mpanao salamo: “Naho fa nihamaro ty finekoneko tamako ato, le nanafosafo ahy ty fampionogna’o.” (Salamo 94:19) Tena afake mampionogne antikagne ty Saontsin’Andrianagnahare, naho miambane tikagne, le mampihatse aze. Hahazo fampionognagne naho ho tony ty fontikagne, le ho afake tsikede ze raha mampivali-doha antikagne. Andrianagnahare avao ro afake magnomey izay. Mampionogne antikagne reke, manahake ty rae bey hatea manambetambe ty ana’e malahelo.

Hanjare ho naman’Andrianagnahare ka tikagne naho mirehake ama’e tsy tapake. “Ndra inogn’inogne angatahentikagne naho fa mifanandrife amy ty zoton’arofo’e, le mijanjigne antikagne reke.” (1 Jaona 5:14) Afake mivavake naho mangatake ty fagnampea’e tikagne, ndra inogn’inogne raha mampinekoneko ndra mampatahotse antikagne. Hilamin-tsaigne tikagne naho mamorake ama’e ze raha am-pontikagne ao. Hoe ty apostoly Paoly: “Amy ze kila raha, le ampahaonigno an’Andrianagnahare amy ty vavake naho ty fihalaleagne miharo fisaoragne ty fangataha’areo. Le ty fiadanan’Andrianagnahare ambone ze kila eretseretse ro hiambegne ty fo’areo naho ty fivetsevetse’areo amy ty fisia i Kristy Jesosy.”—Filipianina 4:6, 7.

Azo antoke fa harine i Rae’o an-dagnitse agney rehe naho mamaky Baiboly tsy tapake sady misaintsaigne vaho mivavake. Ho mora ama’o ty handrese ty fihetseham-po manahake o hakiviagneo, naho manjare nama i Jehovah rehe. Ino ka i fomba fahateloy?

Mifantoha amy ty Hoavy Tena Fanjaka

Afake mifantoke amy ty raha soa avao tikagne, ndra tie agnate ty raha fara izay sarotse aza. Toe mampitamà antikagne hoavy azo antoke ty Andrianagnahare. Hoe ty apostoly Petera miomba izay: ‘Misy lagnitse vaovao naho tane vaovao hitoboha ty hamaren-tane, arake ty fa nampitamàe’e.’ (2 Petera 3:13) Ino ty dika izay?

Tihoe “lagnitse vaovao” le ty Fanjakàn’Andrianagnahare an-dagnitse agne tarihe i Jesosy Kristy. Ze ndaty hiaigne an-tane etoy ankasitrahan’Andrianagnahare ro atao tihoe “tane vaovao.” Tsy hisy sasa ty raha mahakivy, naho fa hinday i “lagnitse vaovaoy.” Amy izay, le hotahien’Andrianagnahare ze ndaty tsy mivalike, satria hoe ty Baiboly: “Hofafa’e ze ranomaso amy ty maso iareo, le tsy hisy sasa ty fate, ty alahelo ndra ty toreo ndra ty fanaintaignagne, fa tsy eo iaby ty raha taloha.”—Apokalypsy 21:4.

Tena mampahery zay! Tsy mahagaga naho rehafe ty Baiboly fa “raha mahafale” ty tamae ty tena Kristiana amy ty hoavy. (Titosy 2:13) Tsy hifantoke amy ty raha raty tikagne naho mitadidy ze fampitamàn’Andrianagnahare zay, sady misaintsaigne tie nagnino zay ro azo antoke.—Filipianina 4:8.

Ampitovie ty Baiboly amy ty fiarovan-doha ty fanantenantikagne famonjeagne. (1 Tesalonianina 5:8) Taloha, le tsy nahavany nandeha nialy o maramilao naho tsy nisy fiarovan-doha. Naho fa misy io o lohao, le tsy harare naho voadosy sady tsy ho voa ty bala-polesidory. Miaro ty saintikagne hoe izay ty fanantenagne. Tsy hifantoke amy ty raha raty ndra mampatahotse ndra mahakivy tikagne, naho misaintsaigne ty fanantenantikagne.

Ho vita’o areke ty hanahatsahatse ty fihetseham-po’o! Tadidio fa sarobily aman’Andrianagnahare rehe. Anò ragne’o maifitse azo reke, sady mifantoha amy ty fanantena’o. Matokia fa tsy hisy nainai’e ty raha mampinekoneko naho ty raha mahakivy!—Salamo 37:29.

[Fagnamarehagne ambane peje]

[Hevetse Lahibey]

“Fantako soa ty fijalea iareo.”​—EKSODOSY 3:7, 8

[Hevetse Lahibey]

“Naho fa nihamaro ty finekoneko tamako ato, le nanafosafo ahy ty fampionogna’o.”​—SALAMO 94:19

[Hevetse Lahibey]

“Ty fiadanan’Andrianagnahare ambone ze kila eretseretse ro hiambegne ty fo’areo naho ty fivetsevetse’areo.”​—FILIPIANINA 4:7

[Efajoro/Sare]

Andinin-teny Mampahery Miomba i Jehovah Andrianagnahare

“Jehovah, Andrianagnahare mamindra fo, soa fagnahy, tsy tsiela vignetse, feno hasoa fagnahy miharo hatea sady tea hamarenagne.”—EKSODOSY 34:6.

“Ty fihaino i Jehovah mivazoho avao magneneke ty tane iaby, soa tie hanoroa’e ty heri’e handrombahagne ze mipiteke ama’e amy ty fo’e.”—2 TANTARA 16:9.

“Marine ze torotoro fo ty Jehovah, sady magnavotse ze mamoe fo.”—SALAMO 34:18.

“Soa toetse naho vognogne hamela heloke rehe Jehovah.”—SALAMO 86:5.

“Soa fagnahy amy ze kila ndaty ty Jehovah, sady trea amy ty asa ty fità’e iaby fa mamindra fo reke.”—SALAMO 145:9.

“Izaho Jehovah Andrianagnahare’o ro mitantagne azo amy ty tagna’o havana, eka, izaho i mirehake ama’o tihoey: ‘Ko matahotse fa hagnampe azo raho.’”—ISAIA 41:13.

‘Isaoragne abey i ... Rae ty fitretrézagne naho Andrianagnahare ze kila fampionognagney!”—2 KORINTIANINA 1:3.

“Izay ty agnomeantika toky ty fontika agnatreha’e eo amy ze raha va’e hagnameloha’e antika. Satria lahibey ambone ty fontika ty Andrianagnahare sady mahafantatse ze kila raha.”—1 JAONA 3:19, 20.

[Efajoro/Sare]

Nahatsiaro ho Nisy Dika’e Naho Natoky Tegna Indraike Iareo

“Mamo lava ty baba’ay, le tena nampijale ahy zay. Nahatsapa ho tsy nisy dika’e raho nanomboke ty naha ajaja ahy. Faie nianatse Baiboly tamy ty Vavolombelo i Jehovah raho, le fantako fa hisy fiaignagne nainai’e ty an-tane etoy. Tena fale raho noho ze fanantenagne zay. Nanjare zatse namaky Baiboly raho, le tena tsy nisarake amako io. Mamaky andinin-teny mampahery raho naho fa malahelo. Mahazo toky raho tie sarobily aman’Andrianagnahare raho, naho fa mamaky miomba ty toetse’e.”—Kátia, 33 taogne. *

“Nandevoze ty toake naho ty rongony raho, le niteako ka ty nifoke fofo alkoly. Lany iaby i fanagnakoy, le nanjare mpangatake raho. Faie nianatse Baiboly tamy ty Vavolombelo i Jehovah raho, le niova ty fiaignako. Nanjare nifandrambe marine taman’Andrianagnahare raho. Mbe nialy mafe raho satria nagnamelon-tegna naho nahatsapa ho tsy nisy dika’e kindraike. Faie nikezake natoky raho fa tena mamindra fo ty Andrianagnahare, sady soa fagnahy naho bey hatea. Fantako fa hagnampe ahike avao reke. Ty fianaragne ty hamarenagne agnate Baiboly ao ty raha tena soa tamy ty fiaignako.”—Renato, 37 taogne.

“Nampitaha ty tegnako tamy ze zokeko lahilahy zay raho, nanomboke ty naha ajaja ahy. Nahatsapa ho ambane noho i reke avao raho. Mbe tsy matoky tegna avao raho hatrake amy izao, sady mihevetse tie tsy mahay. Faie tapa-kevetse ty hialy mafe raho. Nivavake tamy i Jehovah lognandro raho, sady nagnampe ahy reke mba hatoky tegna. Fale raho satria fantako fa tea naho mikarakara ahy ty Andrianagnahare!”—Roberta, 45 taogne.

[Fagnamarehagne ambane peje]