Talily Soa Nisorate i Matio 16:1-28
16 Naho fa niavy eo, le nimbamy i Jesosy mbeo o Fariseò naho o Sadoseò mba hitsapa hevetse aze. Nangatahe iareo reke mba hampiseho famantaragne boake an-dagnitse agne.
2 Le hoe ty navale i Jesosy iareo: “Naho fa ho tsofotse i androy, le hoe nareo tie: ‘Ho soa ty andro hamaray satria mena i lagnitsey.’
3 Ie naho fa maraindraigne, le hoe ka nareo: ‘Hanintsigne sady hagnoragne t’androany satria mena i lagnitsey sady mandopoke.’ Hai’areo fantaregne amy ty raha trea’areo amy i lagnitsey ey areke ty ho toetse i androy, faie tsy hai’areo ty dika ty raha miseho amo o fotoagne zao.
4 Lava mipay famantaragne avao o taranake raty fagnahy naho mpagnitsakitsa-balio. Faie tsy misy famantaragne homeigne anareo ankoatse i famantaragne tamy i Jona mpaminanỳ.” Tafara izay, le nenga’e eo iareo le nandeha reke.
5 Nifindra a moro’e raike ey i mpiana’e rey naho fa niavy eo. Faie nagnaligno ninday mofo iareo.
6 Le hoe ty Jesosy tamy iareo: “Mitaoa soa nareo amy ty lalivay* o Fariseò naho o Sadoseò.”
7 Le nifampirehake iareo tie: “Va’e itika tsy ninday mofò nio mahavy aze mirehake izaio.”
8 Nifanta i Jesosy zay, le hoe reke: “Nagnino inareo ie mifampirehake tie tsy managne mofò, ry kele finoagne?
9 Le mbe tsy azo’areo avao vao ty teako horehafegne? Sa tsy tsiaro’areo i mofo dime nahampe ndaty 5 000-y? Tsy tsiaro’areo ka vao tie fire vaha i sisa’e tsy nilanỳ?
10 Sa, haligno’areo ka i mofo fito nahampe ndaty 4 000-y? Tsy tsiaro’areo vao tie fire vaha ty sisa’e?
11 Nagnino ro tsy taka’areo tie tsy miomba ty mofo i raha rehafekoy? Ty lalivay o Fariseò naho o Sadoseò ro nampitaoako anareo.”
12 Vaho izay nitaka iareo tie ty fampianara o Fariseò naho o Sadoseò ty tea’e hampitaoagne iareo, fa tsy o lalivay fampiasaegne amo o mofò.
13 Naho fa niavy amy ty faritse a Kaisaria Filipo agne ty Jesosy, le nagnontenea’e i mpiana’e rey tie: “Ia ty fihevera o ndatio i Ana o ndatỳ?”
14 Le hoe iareo: “Ty ila’e mirehake tie i Jaona Mpanao Badisa. Le misy ka ty manao tie i Elia. Le ty ila’e ka manao tie i Jeremia, ndra ty raike amy i mpaminany rey.”
15 Le hoe reke tamy iareo: “A inareo, ia ty fihevera’areo ahy?”
16 Le namale aze ty Simona Petera tie: “Irehe ro Kristy, Ana i Andrianagnahare velogney.”
17 Le hoe ty navale i Jesosy i Petera: “Sambatse rehe Simona ana i Jona, satria tsy ndaty* ty nampahafantatse azo ze raha zay fa i Raeko an-dagnitse agney.
18 Izao ka ty raha ambarako azo: Irehe o Peterao, le aoreko ambone ty lamilamy toy i fiangonakoy sady tsy haharesy aze o kiborio.
19 Homeiko azo ty lakilé i Fanjakà i lagnitseỳ. Ndra inogn’ino arohi’o an-tane etoy, le fa arohy an-dagnitse agne ka. Le ze raha hahà’o an-tane etoy, le fa mihaha an-dagnitse agne ka.”
20 Ie naho fa niavy eo, le nafanto’e i mpiana’e rey mba tsy hirehake ndra amy ia ndra amy ia tie ireke ro Kristy.
21 Nanomboke tamy ze fotoagne zay, le nagnazava tamy i mpiana’e rey ty Jesosy tie tsy maintsy mandeha a Jerosalema agne reke, le hampijaléjalé o mpitarike jiosio naho o lahibey mpisorogneo vaho o mpampianatse lalànao sady hovonoe iareo. Faie mbe hovelomegne indraike reke amy ty andro fahatelo.
22 Nindese i Petera nitolake ty Jesosy sady nendaha’e tie: “O Tompo, toko’e ho soa fagnahy amy ty vata’o rehe, le tsy toko’e henga’o hanjò azo ze raha zay!”
23 Le niambohoa i Jesosy ty Petera sady hoe reke: “Ajanogno agne ze rehake zay Satana!* Ndra ihe ka ro manjare vato mamingagne alohako eo, satria tsy ty fomba fiheven’Agnahare ro eretserete’o fa ndra ty fomba fiheve o ndatio.”
24 Le hoe ty Jesosy tamy i mpiana’e rey naho fa niavy eo: “Naho misy ndaty te hagnorike ty liako, le tsy toko’e hanao ze sitrapo’e avao reke, fa hinday ty hazo fijalea’e sady hanohy hagnorike ty liako avao.
25 Ndra ia ndra ia te handrombake ty fiai’e, le hamoe aze. Faie ndra ia ndra ia mamoe ty fiai’e noho ty amako, le hamonje aze.
26 Ino moa ty soa hoazo ty ndaty raike naho mahazo ze kila raha amy ty tontolo toy eto reke, faie afoe’e ty fiai’e? Sa, ino ty raha azo o ndatio omeigne mba hotakalo ty fiai’e?
27 Amy ty hoavy, le ho avy reketse ty voninahitse homein-dRae’e* aze i Ana o ndatỳ naho o anjeli’eo, le hovalea’e arake ze raha natao’e ty tsikiraidraike.
28 Volagneko ama’areo,* fa misy ama’areo magnatreke etò tsy ho mate, amparake ty ahatreava iareo i Ana o ndatỳ amy ty voninahi’e amy ty maha mpanjaka aze.”*
Fagnamarehagne ambane peje
^ Ndra: “karibonaty.”
^ Abt: “tsy nofotse naho lio.”
^ Abt: “Mihova afarako ao rehe Satana!”
^ Ndra: “miarake amy ty voninahin-dRae’e.”
^ Abt: “Volagneko ama’areo to vata’e.”
^ Abt: “avy amy i Fanjakà’ey.”
