Eka. Tena misy ty Devoly. Ireke ro “mifehe ty tontolo toy.” Anjely soa reke fa niova ho raty sady nanjehatse an’Andrianagnahare. (Jaona 14:30; Efesianina 6:11, 12) Mampiseho ty toetse’e ty agnaragne naho ty rehake itokavagne aze retoa:

•   Satana, midika tihoe “Mpanohetse.”​—Joba 1:6.

•   Devoly, midika tihoe “Mpagnaratiraty.”​—Apokalypsy 12:9.

•   Meregne. Io ro irehafa ty Baiboly tihoe “Mpamitake.”​—2 Korintianina 11:3.

•   Mpitsapa hevetse.​—Matio 4:3.

•   Mpavande.​—Jaona 8:44.

Tsy tihoe haratiagne ndra toetse tihoe Devoly

 Misy ty mino tie haratiagne ama o ndaty tsikiraidraike ao tihoe Satana Devoly. Faie mirehake ty Baiboly tie nifampirehake reke naho i Andrianagnahare. Andrianagnahare vao le hifampirehake amy ty haratiagne ama’e ao, ie amy izao reke voririke? (Deoteronomia 32:4; Joba 2:1-6) Hoe izay ka fa voririke ty Jesosy, ie amy izao rehafe ty Baiboly tie nitsapa hevetse aze ty Devoly. (Matio 4:8-10; 1 Jaona 3:5) Midika areke zay tie tena misy ty Devoly fa tsy tihoe haratiagne avao.

 Tsy mahalatsa naho maro ty ndaty tsy mino tie misy ty Devoly. Ty anto’e, rehafe ty Baiboly tie mamitake o ndatio reke mba hahatraragne ty tanjo’e. (2 Tesalonianina 2:9, 10) Magnagoa ty say o ndatio reke. Ty voka’e, maro ty ndaty manjare tsy mino tie misy vata’e reke.​—2 Korintianina 4:4.

 Heve-diso: Atao tihoe Losifera ty Devoly.

 Ty maregne: Midika tihoe “i mamilepiletsey” ty rehake hebreo nandikà o Baiboly ila’eo tihoe “Losifera.” (Isaia 14:12) Faie atoro ty rehake magnodidigne amo o andinin-teny iohoe fa ty tarana-mpanjaka babiloniana ro teagne horehafegne amo o andine’eo. Sady nambanén’Andrianagnahare iareo noho iareo nirehareha. (Isaia 14:4, 13-20) Nitsikihegne iareo tamy iareo niresey, i rehake tihoe “i mamilepiletsey.”

 Heve-diso: Miasa hoan’Andrianagnahare ty Devoly, le magnampe aze hitsara o ndatio.

 Ty maregne: Fahavalon’Andrianagnahare ty Satana Devoly fa tsy mpanompo’e. Manohetse naho magnaraty i ndaty manompo an’Andrianagnahare rey reke.​—1 Petera 5:8; Apokalypsy 12:10.