Bainhira treinu hamutuk, haʼu tebe sala haʼu-nia kolega mane nia inus, no nia kanek todan liu fali buat neʼebé haʼu imajina. Haʼu fó-sala ba haʼu-nia an no haʼu hanoin kona-ba se haʼu bele kontinua halo arte marsiais ka lae. Tanbasá ida-neʼe halo haʼu sente laran-rua kona-ba arte marsiais neʼebé haʼu gosta tebes durante tinan barak? Ulukliu, haʼu hakarak esplika kona-ba oinsá mak haʼu komesa tuir arte marsiais.

 Haʼu boot iha área besik sidade Buffalo, Novaiorke, Estadus Unidus. Haʼu-nia família mak ema Katólika, no ami moris ho dame. Haʼu tuir eskola Katólika no haʼu serbí nuʼudar akólitu. Haʼu-nia inan-aman hakarak haʼu-nia biin no haʼu hetan susesu iha moris. Sira fó lisensa mai haʼu atu halo desportu ka buka serbisu part-time depois fila eskola naran katak haʼu hetan valór diʼak iha eskola. Neʼe ajuda haʼu atu aprende dixiplina an iha tempu joven.

 Bainhira haʼu tinan 17, haʼu hahú aprende arte marsiais. Ba tinan barak, haʼu treinu loron ida oras tolu, loron neen semana-semana. Haʼu mós uza oras barak atu hanoin no imajina dalan oioin atu book an no aumenta skill iha arte marsiais, no haree vídeo sira atu estuda liután ida-neʼe. Haʼu mós taka matan ho hena no treinu arte marsiais, inklui mós treinu uza armas oioin ho matan taka. Haʼu bele fera ai ka bloku sira ho liman-tanan hodi tuku dala ida deʼit. Haʼu sai famozu no manán kompetisaun oioin. Arte marsiais mak buat neʼebé importante liu iha haʼu-nia moris.

 Haʼu hanoin katak haʼu susesu ona. Haʼu gradua husi universidade ho valór neʼebé diʼak. Haʼu serbisu iha kompañia boot nuʼudar enjeñeiru ba sistema komputadór. Kompañia selu haʼu ho saláriu boot, haʼu iha uma no mós namorada. Haree hanesan haʼu-nia moris mak kapás, maibé tuir loloos, haʼu iha pergunta importante oioin neʼebé seidauk hetan resposta.

 Atu hetan resposta ba haʼu-nia pergunta sira, haʼu komesa ba igreja semana ida dala rua no halo orasaun ba Maromak hodi husu ajuda. Depois neʼe, loron ida haʼu konversa ho kolega mane ida no neʼe mak troka haʼu-nia moris. Haʼu husu nia: “Ó rasik hanoin ona ka lae, tanbasá mak ita moris? Mundu neʼe nakonu ho problema oioin no la iha justisa!” Nia fó-hatene haʼu katak nia mós uluk husu pergunta neʼebé atu hanesan no nia hetan resposta neʼebé diʼak husi Bíblia. Nia fó haʼu livru ida ho títulu Saudara Dapat Hidup Kekal dalam Firdaus di Bumi iha língua Inglés. a Nia estuda Bíblia hamutuk ho Testemuña ba Jeová. Foufoun, haʼu lakohi lee livru husi relijiaun seluk. Maibé haʼu hakarak tebes atu hetan resposta, tan neʼe haʼu komesa lee hodi buka-hatene buat neʼebé Testemuña sira hanorin mak lójiku ka lae.

 Haʼu hakfodak tebes bainhira hatene ho loloos saida mak Bíblia hanorin. Haʼu aprende katak Maromak hakarak ema atu moris ba nafatin iha mundu paraízu no ninia hakarak la troka. (Génesis 1:28) Haʼu mós hakfodak bainhira hatene katak Maromak nia naran mak Jeová, haʼu haree naran neʼe iha haʼu-nia Bíblia King James Version. No haʼu mós hakfodak tanba tuir loloos haʼu halo orasaun beibeik kona-ba naran neʼe bainhira haʼu repete orasaun Ami Aman. (Salmo 83:18; Mateus 6:9) Ikusmai haʼu mós komprende tanbasá Maromak husik ema hetan terus. Buat hotu neʼebé haʼu aprende mak lójiku duni! Haʼu kontente loos.

 Haʼu sei nunka haluha buat neʼebé haʼu sente bainhira haʼu komesa tuir reuniaun husi Testemuña ba Jeová. Ema hotu simu haʼu ho laran-diʼak no hakarak hatene haʼu-nia naran. Iha reuniaun primeiru, iha diskursu espesiál kona-ba orasaun hanesan saida mak Maromak simu. Haʼu sente tópiku neʼe interese tanba haʼu halo orasaun beibeik ba Maromak atu husu ajuda. Tuirmai haʼu asiste Memoriál ba Jesus nia mate. Reuniaun sira-neʼe halo haʼu hakfodak tanba labarik sira mós loke Bíblia no lee tuir eskritura sira. Foufoun haʼu la hatene oinsá atu buka eskritura iha Bíblia, maibé Testemuña sira ajuda haʼu hodi hanorin haʼu oinsá atu loke Bíblia.

 Bainhira haʼu tuir reuniaun beibeik, haʼu hafolin liután Testemuña sira-nia hanorin kona-ba Bíblia, tanba sira-nia hanorin kualidade duni. Haʼu aprende buat barak iha reuniaun ida-idak, no reuniaun sira sempre anima haʼu no halo haʼu sente kmaan. Tuirmai, Testemuña sira oferese estuda Bíblia mai haʼu.

 Buat neʼebé haʼu haree husi Testemuña ba Jeová, la hanesan duni ho buat neʼebé haʼu haree iha haʼu-nia igreja. Haʼu haree katak Testemuña sira iha unidade no sira mak grupu neʼebé hakaʼas an atu halo Maromak kontente. Haʼu fiar liután katak sira-nia hahalok hatudu sai sira mak ema Kristaun loos, tanba sira hadomi malu.—João 13:35.

 Bainhira haʼu estuda Bíblia liután, haʼu halo mudansa liután hodi bele moris tuir Bíblia nia matadalan sira. Maibé haʼu hanoin katak haʼu sei nunka husik arte marsiais. Haʼu gosta tebes treinu no kompete malu ho ema seluk. Bainhira haʼu fó sai haʼu-nia hanoin neʼe ba haʼu-nia mestre Bíblia, nia koʼalia ho laran-diʼak: “Kontinua estuda tan, no haʼu hatene katak Ita sei foti desizaun neʼebé loos.” Neʼe mak resposta neʼebé haʼu presiza rona. Nuʼudar haʼu estuda liután, haʼu-nia hakarak atu halo Maromak Jeová kontente sai makaʼas liután.

 Buat neʼebé troka haʼu-nia hanoin mak akontesimentu neʼebé haʼu temi ona, haʼu tebe sala haʼu-nia kolega nia inus. Akontesimentu neʼe halo haʼu hanoin sériu kona-ba oinsá haʼu bele sai Jesus nia dixípulu neʼebé hadomi dame se haʼu kontinua treinu arte marsiais. Isaias 2:3, 4 dehan katak ema neʼebé moris tuir Jeová nia matadalan sei “la aprende tan funu”. Jesus mós hanorin ema atu la uza violénsia maski hasoru situasaun neʼebé la justu. (Mateus 26:52) Tan neʼe, haʼu para husi arte marsiais, maski uluk haʼu gosta tebes ida-neʼe.

 Depois neʼe, haʼu halo tuir Bíblia nia konsellu atu ‘treinu an ho objetivu atu hatudu laran-metin ba Maromak’. (1 Timóteo 4:7) Uluk, haʼu uza tempu no forsa hotu ba arte marsiais, maibé agora haʼu uza fali ida-neʼe atu hakbesik liután ba Maromak no serbí nia. Haʼu-nia namorada la konkorda ho buat neʼebé haʼu aprende husi Bíblia, entaun ami para. Haʼu hetan batizmu nuʼudar Testemuña ba Jeová iha 24 Janeiru 1987. Lakleur depois neʼe, haʼu komesa serbí nuʼudar haklaken-naʼin tempu-tomak hodi hanorin Bíblia ba ema seluk. Husi tempu neʼebá, haʼu kontinua serbí Jeová tempu-tomak, no ba tempu balu haʼu mós serbí iha sede-jerál husi Testemuña ba Jeová iha Novaiorke, Estadus Unidus.

 Agora haʼu hatene lia-loos kona-ba Maromak, haʼu hetan ona buat neʼebé uluk haʼu buka namanas. Haʼu la sente mamuk ona. Haʼu iha ona objetivu furak iha haʼu-nia moris, esperansa neʼebé furak no haʼu sente kontente duni. Haʼu gosta nafatin halo ezersísiu, maibé ida-neʼe laʼós buat neʼebé importante liu iha haʼu-nia moris. Buat neʼebé importante liu mak serbí Maromak Jeová.

 Bainhira haʼu tau uluk arte marsiais, haʼu matan-moris bainhira ema iha haʼu-nia sorin-sorin no hanoin beibeik dalan atu defende an se ema ataka haʼu derrepente. Ohin loron, haʼu mós matan-moris ho ema iha sorin-sorin, maibé ho razaun seluk, neʼe mak atu ajuda sira. Bíblia ajuda haʼu atu sai ema neʼebé laran-luak, no laʼen neʼebé diʼak ba haʼu-nia feen doben Brenda.

 Uluk haʼu moris ba arte marsiais, maibé haʼu hetan buat neʼebé diʼak liu. Bíblia dehan: “Treinu ita-nia isin lori buat diʼak uitoan, maibé hatudu laran-metin ba Maromak lori diʼak ba buat hotu, tanba ida-neʼe iha promesa ba moris agora no ba moris neʼebé atu mai.”—1 Timóteo 4:8.