Ema barak, inklui ema balu neʼebé bolu sira-nia an Kristaun, sente katak Bíblia nia prinsípiu kona-ba relasaun seksuál no moris kaben nian mak tuan ona no la vale ona. Tan neʼe atu adapta ho tempu modernu, igreja balu komesa halo mudansa ba sira-nia hanorin sira kona-ba saida mak ita ema bele no labele halo. Se nuneʼe, Bíblia nia prinsípiu sira nafatin vale ka lae? Sin, sei vale duni. Mai ita haree razaun balu.

 Nuʼudar kriasaun, ema presiza sadere ba Kriadór. Bíblia dehan: “Ema neʼebé laʼo mós la iha kbiit atu hili ninia hakat.” (Jeremias 10:23) Maromak Jeová a kria ema ho abilidade atu halo desizaun, maibé nia la fó ita autoridade atu determina saida mak loos no saida mak sala. Maromak hakarak ita atu sadere ba nia.—Provérbios 3:5.

 Ita bele hetan Maromak nia matadalan kona-ba morál iha Bíblia laran. Hanoin toʼok kona-ba razaun rua tanbasá importante atu halo tuir matadalan sira-neʼe.

•   Maromak mak kria ita. (Salmo 100:3) Nuʼudar Kriadór, Maromak Jeová hatene didiʼak saida mak bele halo ita kontente no iha saúde diʼak. Nia mós hatene konsekuénsia neʼebé ita sei hetan se ita la halo tuir ninia morál sira. (Galásia 6:7) Jeová mós hakarak tebes ita atu iha moris neʼebé diʼak liu. Tan neʼe, Bíblia dehan katak Maromak ‘hanorin ita kona-ba buat neʼebé diʼak liu ba ita, no dirije ita iha dalan neʼebé ita tenke laʼo bá’.—Isaias 48:17.

•   Ita-nia laran bele lori ita ba sala. Ema barak hanoin katak sira-nia laran bele ajuda sira determina saida mak loos no saida mak sala. Maibé Bíblia hatete katak “laran mak makerek liu fali buat hotu-hotu no perigozu”. (Jeremias 17:9) Se ita la treinu ita-nia laran tuir Maromak nia matadalan, neʼe bele book ita atu halo hahalok neʼebé ikusmai ita sei arrepende.—Provérbios 28:26; Eclesiastes 10:2.

 Labele! Bíblia hanorin lia-loos kona-ba Maromak no kona-ba hahalok neʼebé loos. (1 Korinto 6:9-11; Galásia 5:19-23) Maromak hakarak tebes ema atu aprende kona-ba buat sira-neʼe. (1 Timóteo 2:3, 4) Tan neʼe, ulun-naʼin relijiaun Kristaun sira tenke hanorin tuir Maromak nia Liafuan.—Tito 1:7-9.

 Ema barak neʼebé lakohi simu Bíblia nia prinsípiu kona-ba morál buka tuir ulun-naʼin relijiaun sira neʼebé sei “koʼalia deʼit buat neʼebé sira hakarak atu rona”. (2 Timóteo 4:3) Maibé Maromak nia Liafuan fó sai ho klaru: “Susar ba ema neʼebé dehan katak buat diʼak mak aat no buat aat mak diʼak.” (Isaias 5:20) Klaru katak Maromak sei fó kastigu ba ulun-naʼin relijiaun sira neʼebé la hanorin lia-loos kona-ba morál tuir Maromak nia haree.

 Lae. Sira neʼebé hakarak halo Maromak kontente tenke banati-tuir Jesus Kristu nia ezemplu no ninia hanorin sira. Nia hanorin ninia dixípulu sira atu la tesi-lia ba ema seluk, maibé hatudu domin no respeitu ema hotu.​—Mateus 5:43, 44; 7:1.

 Jesus hanorin ninia dixípulu sira atu halo tuir Maromak nia matadalan kona-ba morál iha sira-nia moris rasik. Maibé sira mós tenke rekoñese katak ema seluk karik hili atu la halo tuir prinsípiu sira-neʼe. (Mateus 10:14) Jesus lakohi ninia dixípulu sira uza polítiku ka dalan seluk atu obriga ema halo tuir Maromak nia prinsípiu.​—João 17:14, 16; 18:36.

 Se ita hakaʼas an atu halo tuir Maromak nia matadalan kona-ba saida mak loos no saida mak sala, ita sei hetan benefísiu barak, agora no mós iha futuru. (Salmo 19:8, 11) Benefísiu sira-neʼe inklui:

•   Sai kontente liu.​—Provérbios 29:6.

•   Iha relasaun besik ho Maromak.​—Provérbios 3:32.

•   Hetan ajuda husi Maromak iha situasaun susar.​—Provérbios 11:8.

•   Iha esperansa atu moris rohan-laek iha rai.​—Salmo 37:29.