Irmán joven ida naran Nicole iha Kolómbia hatete: “Haʼu hadomi ami-nia Reuniaun-Fatin! Neʼe mak fatin neʼebé haʼu bele halibur hamutuk ho haʼu-nia família espirituál.” Ita mós sente hanesan neʼe ka lae?

 Iha mundu tomak, Testemuña ba Jeová halibur hamutuk iha Reuniaun-Fatin maizumenus 63.000. Reuniaun-Fatin mak fatin neʼebé diʼak no hakmatek atu adora Maromak. Maibé laʼós neʼe deʼit. Irmaun David neʼebé serbí nuʼudar pioneiru regulár iha Kolómbia hatete: “Ita-nia Reuniaun-Fatin dada ema atu interese ba lia-loos. Ema barak neʼebé mai ita-nia fatin hakfodak ho dalan neʼebé ita tau matan ita-nia Reuniaun-Fatin.” Neʼe la akontese automátiku. Ita serbisu makaʼas atu hamoos no tau matan ita-nia Reuniaun-Fatin. Oinsá mak ita halo ida-neʼe?

 Kongregasaun sira neʼebé uza Reuniaun-Fatin mak iha responsabilidade atu tau matan fatin neʼe. Atu halo nuneʼe, irmaun-irmán sira hamoos beibeik Reuniaun-Fatin. Sira mós halo manutensaun no hadiʼa buat kiʼik-kiʼik sira hodi bele prevene estragu boot.

 Departamentu Planeamentu no Konstrusaun Lokál (PKL) haruka irmaun sira atu fó treinu ba kongregasaun sira hodi bele halo serbisu manutensaun. Irmaun ida neʼebé sai treinadór ba serbisu manutensaun baibain tau matan ba Reuniaun-Fatin neen toʼo sanulu. Treinadór ba serbisu manutensaun sei vizita no treinu haklaken-naʼin sira iha kongregasaun kona-ba oinsá atu tau matan Reuniaun-Fatin. Kada tinan tolu, treinadór sei cek fatin neʼe no buka-hatene saida mak presiza hadiʼa.

 Irmaun-irmán sira hafolin treinamentu neʼebé sira hetan husi treinadór. Irmán Indhumathi iha Índia hatete: “Treinamentu neʼe kapás tebes. Kontente bele aprende oinsá atu tau matan Reuniaun-Fatin ho didiʼak.” Irmaun Evans iha Kénia hatete: “Ami aprende oinsá atu la gasta osan barak hodi hadiʼa problema kiʼik sira antes neʼe sai problema neʼebé boot liu.”

 Gastu tinan-tinan neʼebé uza atu tau matan ba Reuniaun-Fatin sira mak maizumenus husi dolar atus ida toʼo rihun balu a depende ba fatin, tinan no kongregasaun hira mak uza Reuniaun-Fatin neʼe. Oinsá mak taka gastu sira-neʼe?

 Serbisu manutensaun hetan suporta husi kontribuisaun. Irmaun Alexander iha Kazakistaun hatete: “Osan balu husi kontribuisaun uza atu selu internét, bee no eletrisidade. Osan balu uza atu sosa sasán sira hanesan tisu, luvas, produtu sira neʼebé uza atu hamoos, no tinta.” No buat estra husi kontribuisaun sei uza ba serbisu iha mundu tomak atu ajuda projetu manutensaun neʼebé boot no karun liu.

 Se gastu ba serbisu manutensaun ba Reuniaun-Fatin mak liu fali gastu neʼebé baibain uza ba fulan rua ka tolu, katuas kongregasaun sira sei kontaktu treinadór manutensaun nian husi PKL. Se PKL aprova projetu neʼe, baibain uza osan husi kontribuisaun ba serbisu iha mundu tomak. Durante tinan serbisu nian 2023, iha projetu hamutuk 8.793 neʼebé gasta osan $76.600.000. Hanoin toʼok kona-ba projetu rua neʼe.

 Iha Angola, Reuniaun-Fatin ida harii ba tinan 15 ona no iha problema balu. Eletrisidade tuan ona, didin sira nakfera no viziñu sira hatete katak bee suli sai husi Reuniaun-Fatin ba fali sira-nia hela-fatin. PKL arranja projetu ida atu hadiʼa problema sira-neʼe. Gastu ba projetu neʼe mak $9.285. Viziñu sira agradese no admira ho dalan neʼebé irmaun-irmán sira halaʼo projetu neʼe.

 Iha Polónia, Reuniaun-Fatin nia uma-kakuluk kuak, no sira-nia karpet labele hadiʼa ona. PKL konkorda ho projetu atu hadiʼa uma-kakuluk no troka karpet. Gastu ba projetu neʼe mak $9.757. Rezultadu mak la presiza tan atu halo renovasaun boot ba Reuniaun-Fatin neʼe iha tinan balu nia laran.

 Serbisu manutensaun laʼós deʼit hamenus gastu organizasaun nian maibé mós fó glória ba Maromak Jeová. Irmaun Shaun iha Tonga hatete: “Tanba halo serbisu manutensaun, ami bele serbí Maromak Jeová iha Reuniaun-Fatin neʼebé moos, la runguranga no laʼo ho diʼak. Neʼe lori hahiʼi ba Maromak Jeová nia naran iha komunidade. Ami orgullu atu konvida ema mai ami-nia Reuniaun-Fatin.”

 Ita hotu bele ajuda atu hamoos no tau matan ita-nia fatin adorasaun. Treinadór ba manutensaun naran Marino iha Austrália hatete: “Ita hotu iha priviléjiu atu tau matan Reuniaun-Fatin. Se ita halo nuneʼe, ita sei ajuda hamenus gastu atu hadiʼa Reuniaun-Fatin no osan sira-neʼe bele uza hodi fó ajuda ba fatin neʼebé presiza liu.”

 Irmaun Joel iha Índia kontente atu tau matan Reuniaun-Fatin. Nia hatete: “Serbisu hamutuk ho haʼu-nia irmaun-irmán sira halo haʼu bele imajina situasaun iha mundu foun.” Irmán Nicole, neʼebé temi iha leten, hatete: “Foin lalais, irmaun sira hadiʼa kuak iha hariis-fatin no haʼu ajuda hamaran rai neʼebé bokon. Maski haʼu la hadiʼa problema neʼe, maibé haʼu prevene atu la akontese asidente.”

 Se Ita hakarak sai voluntáriu atu ajuda tau matan Ita-nia Reuniaun-Fatin, koʼalia ba Ita-nia katuas kongregasaun. Ita-nia kontribuisaun mós bele ajuda serbisu manutensaun ba Reuniaun-Fatin iha mundu tomak, laʼós Ita-nia Reuniaun-Fatin deʼit. Ita bele fó kontribuisaun hodi tau iha kaixa kontribuisaun iha Ita-nia Reuniaun-Fatin ka liuhusi donate.isa4310.com. Ami hafolin tebes Ita-nia laran-diʼak.