The Watch Tower 1 Juñu 1912 iha lian Inglés hatete: “Karik lee-naʼin barak koñese ema neʼebé defisiente matan. Sira bele hetan publikasaun gratis deʼit. Ami print publikasaun sira neʼebé iha kafuʼak kiʼik-kiʼik barak no ema defisiente matan bele sente ida-neʼe ho sira-nia liman-fuan. Ema barak neʼebé defisiente matan hafolin mensajen kona-ba bensaun furak neʼebé atu mai.”

 Iha tempu neʼebé The Watch Tower fó sai liafuan sira-neʼe, nasaun oioin neʼebé koʼalia lian Inglés iha dalan neʼebé la hanesan kona-ba hakerek letra ba ema defisiente matan. Maibé Testemuña ba Jeová fó sai lia-loos iha publikasaun neʼebé iha kafuʼak kiʼik-kiʼik no ema defisiente sira bele lee bainhira sira sente ida-neʼe ho sira-nia liman-fuan. Kafuʼak kiʼik-kiʼik neʼe hanaran letra braile. No Testemuña ba Jeová halo ida-neʼe toʼo ohin loron. Ami fó sai publikasaun sira ho letra braile iha língua 50 liu. Oinsá ami prodús publikasaun sira-neʼe?

 Hakat primeiru mak atu troka testu sira ba letra braile. Irmaun Michael Millen neʼebé serbisu hamutuk ho departamentu atu prepara publikasaun iha Patterson Novaiorke, esplika: “Uluk ami uza ema seluk nia programa atu bele troka testu ba letra braile, maibé programa neʼe labele troka testu ba letra braile iha língua barak neʼebé ami presiza. Agora ami uza programa Watchtower Translation System, no programa neʼe ajuda ami atu troka testu ba letra braile iha língua barak tebes. Haʼu fiar katak la iha programa seluk neʼebé hanesan ho programa neʼe.”

 Publikasaun ho letra braile mós iha esplikasaun kona-ba dezeñu sira. Porezemplu, livru Moris Haksolok ba Nafatin ho letra braile iha esplikasaun ba dezeñu iha livru nia oin hanesan neʼe: “Mane ida komesa laʼo daudaun iha dalan neʼebé iha duʼut matak no iha foho iha sorin-sorin.” Irmaun defisiente matan naran Jamshed neʼebé serbí nuʼudar atan ba kongregasaun no mós pioneiru hatete: “Haʼu hafolin tebes esplikasaun sira-neʼe.”

 Bainhira testu troka tiha ba letra braile, tuirmai dokumentu sira-neʼe haruka ba sukursál sira neʼebé prodús publikasaun iha letra braile. Iha neʼebá, sira print publikasaun iha letra braile hodi uza surat-tahan neʼebé mahar no halo kafuʼak kiʼik-kiʼik neʼebé ema defisiente matan bele sente ho sira-nia liman-fuan. Kafuʼak kiʼik sira-neʼe la estraga surat-tahan no mós bele dura kleur maski ema lee beibeik. Tuirmai sira jilid pájina sira-neʼe nuʼudar livru ida no haruka ba kongregasaun sira hamutuk ho publikasaun sira seluk. Ka dala ruma korreiu sira halo arranju atu haruka informasaun sira ba ema defisiente matan ho gratuitu deʼit. Dala ruma, sukursál sira sei haruka lalais publikasaun sira atu nuneʼe irmaun-irmán sira neʼebé defisiente matan bele simu publikasaun neʼebé sira presiza atu uza iha reuniaun.

 Atu halo serbisu neʼe hotu gasta osan no tempu barak. Tuir loloos, iha fatin print publikasaun iha Wallkill, Novaiorke, iha tempu ida-idak sira bele prodús Bíblia hamutuk 50.000, maibé iha tempu hanesan sira bele halo deʼit Bíblia letra braile rua. Kada Bíblia ho língua braile Inglés hamutuk volume 25, no sasán sira neʼebé uza atu prodús volume sira-neʼe mak karun liu fali Bíblia baibain dala 123. Livru nia kulit ba volume 25 mak maizumenus dolar 150.

 Irmaun-irmán sira neʼebé ajuda halo publikasaun iha letra braile sente oinsá kona-ba sira-nia serbisu? Irmán Nadia neʼebé serbí iha sukursál Áfrika Súl hatete: “Irmaun-irmán neʼebé defisiente matan moris susar, entaun haʼu haree serbisu neʼe nuʼudar bensaun atu halo buat neʼebé bele ajuda sira. Ida-neʼe hatudu katak Jeová hadomi tebes sira.”

 Maibé oinsá se ema neʼebé defisiente matan la hatene lee letra braile? Tinan balu liubá, ami fó sai broxura Aprende lee letra braile. Broxura neʼe iha letra braile no mós testu baibain. Objetivu mak atu ema neʼebé matan diʼak no ema neʼebé defisiente matan bele uza hamutuk broxura neʼe. Broxura neʼe mai hamutuk ho ekipamentu rua seluk neʼebé ema defisiente matan bele uza atu hakerek letra braile. Ema neʼebé hakarak atu aprende letra braile bele uza ekipamentu neʼe atu hakerek rasik letra braile. Neʼe ajuda ema neʼebé aprende letra braile atu hanoin-hetan letra ida-idak no ajuda nia sente letra sira-neʼe ho ninia liman-fuan.

 Irmaun-irmán sira neʼebé defisiente matan hetan benefísiu saida husi publikasaun sira-neʼe? Irmaun Ernst neʼebé hela iha rai-Haití, uluk tuir reuniaun hotu, maibé nia la iha publikasaun ho letra braile. Tan neʼe, nia tenke dekór ninia parte sira iha reuniaun no mós ninia resposta sira neʼebé nia hakarak hatoʼo durante parte pergunta no resposta. Nia hatete: “Agora haʼu bele hiʼit liman no fó resposta iha tempu naran deʼit. Haʼu sente katak haʼu iha unidade ho haʼu-nia irmaun-irmán sira. Ita hotu simu ai-han espirituál neʼebé hanesan.”

 Irmaun defisiente matan naran Jan neʼebé serbí nuʼudar katuas ba kongregasaun no dirije Estudu Livru Haklaken no mós Estudu Bíblia iha Kongregasaun hatete: “Ita-nia publikasaun sira klaru liu fali publikasaun seluk ho letra braile neʼebé haʼu lee ona. Porezemplu, ita-nia publikasaun sira-nia pájina iha númeru, nota-rodapé neʼebé fasil atu hetan no esplikasaun ba dezeñu sira neʼebé klaru.”

 Irmán pioneiru ida husi rai-Koreia Súl naran Seon-ok mak defisiente matan no mós defisiente tilun. Uluk kuandu nia tuir reuniaun, ema ruma tenke kaer ninia liman no halo língua jestual iha tempu hanesan, maibé agora nia bele lee rasik publikasaun sira kona-ba Bíblia. Nia hatete: “Dala ruma susar ba haʼu atu lee publikasaun seluk neʼebé uza letra braile tanba kafuʼak balu lakon, liña sira kleʼuk ka surat-tahan mihis demais. Maibé Testemuña ba Jeová uza surat-tahan ho kualidade diʼak no halo kafuʼak neʼebé fasil atu sente ho liman-fuan no neʼe halo fasil liu ba haʼu atu lee. Uluk haʼu presiza ema seluk nia ajuda atu estuda publikasaun sira neʼebé bazeia ba Bíblia. Maibé agora haʼu bele estuda mesak. Haʼu kontente tanba bele prepara ba reuniaun sira semana-semana no hola parte. Haʼu lee ita-nia publikasaun hotu neʼebé uza letra braile. Haʼu labele para atu lee ita-nia publikasaun sira.”

 Hanesan ho ita-nia publikasaun sira seluk, ita-nia publikasaun ho letra braile mós iha esplikasaun: “Livru neʼe laʼós atu faʼan. Livru neʼe parte husi serbisu edukasaun nian kona-ba Bíblia neʼebé halaʼo iha mundu tomak. Serbisu ida-neʼe hetan apoiu husi kontribuisaun voluntáriu.” Obrigadu ba kontribuisaun neʼebé Ita fó liuhusi dalan oioin neʼebé temi iha website donate.isa4310.com. Ita-nia laran-luak loke dalan ba ema hotu atu bele simu ai-han espirituál, inklui ema defisiente matan.