INFORMASAUN IHA OIN
Testemuña ba Jeová nia fiar no atividade
“Haʼu koñese Miguel tinan barak ona. Maibé haʼu ladún hatene kona-ba ninia relijiaun Testemuña ba Jeová. Jeová mak sé? Tansá mak sira la selebra loron-boot sira? Miguel tuir ona relijiaun foun ida karik.”—Becky, rai-Estadus Unidus.
“Bainhira haʼu-nia viziñu sira komesa estuda Bíblia ho Testemuña ba Jeová, haʼu hanoin: ‘Relijiaun naran Testemuña ba Jeová katak sá? Naran neʼe oin-seluk liu!’”—Zenon, rai-Kanadá.
“Foufoun, haʼu ho haʼu-nia feen hanoin katak Testemuña ba Jeová sira mai ami-nia uma atu hamoe ami tanba kleur ona ami la bá igreja. Ami hanoin: ‘Relijiaun boot sira deʼit mós la bele ajuda hametin ami-nia fiar ba Maromak, oinsá tan ho relijiaun kiʼik ida hanesan Testemuña ba Jeová.’”—Kent, rai-Estadus Unidus.
“Haʼu koʼalia loloos deʼit, uluk haʼu la hatene buat ida kona-ba Testemuña ba Jeová sira-nia fiar no atividade saida mak sira halo.”—Cecilie, rai-Dinamarka.
Karik Ita-Boot haree ona Testemuña ba Jeová sira laʼo haklaken iha fatin públiku ka vizita ema husi uma ba uma, koʼalia ho ema, fahe livru sira no husu ema atu estuda Bíblia ho sira. Karik Ita-Boot mós lee daudauk livru ida-neʼe tanba Testemuña ba Jeová ida mak fó ba Ita. Maibé hanesan sira naʼin-haat neʼebé temi ona iha leten, karik Ita-Boot mós iha duvida ruma kona-ba ami.
Se Ita-Boot iha pergunta kona-ba ami-nia fiar no atividade, bele hetan resposta iha neʼebé? Porezemplu, osan neʼebé ami uza atu halaʼo atividade neʼe mai husi neʼebé, ka tansá mak ami haklaken ba ema?
Cecilie neʼebé temi ona iha leten hatete: “Haʼu lee informasaun barak kona-ba Testemuña ba Jeová iha internét. Haʼu mós rona ema koʼalia ladiʼak kona-ba sira. Tan neʼe, haʼu la gosta tebes sira.” Maibé ikusmai, nia hasoru no koʼalia ho Testemuña ba Jeová, no nia hetan resposta neʼebé loos.
Ita-Boot mós hakarak hatene ho loloos kona-ba ami Testemuña ba Jeová ka lae? Ami husu Ita-Boot atu buka-hatene informasaun neʼebé loos husi ami rasik, laʼós husi ema seluk. (Provérbios [Amsal] 14:15) Informasaun sira tuirmai neʼe sei ajuda Ita-Boot atu hatene liután kona-ba ami-nia fiar no atividade neʼebé ami halaʼo.
