Iha família balu, inan-aman haruka oan sira atu halo serbisu uma-laran nian, no oan sira mós prontu atu halo ida-neʼe. Maibé iha mós inan-aman neʼebé la haruka oan sira atu halo serbisu, tan neʼe sira la aprende halo serbisu.

Matenek-naʼin sira haree katak agora labarik sira iha rai barak la iha toman atu halo serbisu uma-laran nian, maibé sira hein deʼit atu hetan buat diʼak husi inan-aman. Aman ida naran Steven hatete: “Ohin loron, inan-aman husik labarik sira atu halimar vídeo game, loke internét, no haree televizaun. Inan-aman la haruka oan sira atu halo serbisu ruma.”

Tuir Ita-nia hanoin, importante ka lae, atu treinu Ita-nia oan atubele halo serbisu iha uma-laran?

Inan-aman balu lakohi haruka sira-nia oan atu halo serbisu uma-laran nian, liuliu se oan sira okupadu ho TPC ka atividade estra husi eskola. Maibé hanoin toʼok kona-ba benefísiu oioin neʼebé oan sira bele hetan husi serbisu uma-laran nian.

Serbisu uma-laran nian ajuda labarik sira. Baibain, labarik neʼebé iha toman atu halo serbisu uma-laran nian bele sai alunu neʼebé diʼak. Neʼe mós bele ajuda oan sira atu fiar an, treinu an, no tahan hasoru susar oioin. Buat sira-neʼe importante tebes atu sira bele aprende buat foun.

Serbisu uma-laran nian treinu labarik sira atu ajuda ema seluk. Labarik sira neʼebé toman ona atu halo serbisu iha uma, bainhira sira sai boot, sira barak mak halo serbisu voluntáriu ruma iha komunidade. Neʼe tanba serbisu uma-laran nian treinu sira atu hanoin uluk ema seluk nia presiza. Steven hatete: “Bainhira inan-aman la treinu oan sira atu halo serbisu uma-laran nian, oan sira sei hein deʼit ema seluk mak halo serbisu ba sira, no sira sei iha hanoin neʼebé laloos kona-ba responsabilidade no serbisu.”

Serbisu uma-laran nian bele haburas unidade iha família. Liuhusi serbisu uma-laran nian, oan sira bele rekoñese katak sira iha parte importante no responsabilidade iha família. Maibé oan sira sei la aprende ida-neʼe se inan-aman hafolin liu atividade estra husi eskola. Tan neʼe, husu ba Ita-nia an: ‘Se haʼu-nia oan besik ho ninia  kolega sira husi ekipa joga bola maibé la besik ho família, neʼe lori benefísiu saida ba nia?’

Hahú husi kiʼik kedas. Ema balu hatete katak inan-aman presiza fó serbisu uma-laran nian ba labarik sira bainhira sira sei tinan tolu, tinan rua, ka kiʼik liu. Labarik kiʼik sira gosta atu halo serbisu hamutuk ho inan-aman no halo tuir sira.—Bíblia nia matadalan: Provérbios (Amsal) 22:6.

Fó serbisu tuir oan sira-nia idade. Porezemplu, labarik ho tinan tolu bele haloot brinkedu, hamoos hahán neʼebé monu ba rai, ka hili foʼer. Labarik neʼebé tinan boot liu bele dasa rai, fase bikan, ka teʼin. Fó serbisu ba Ita-nia oan tuir sira-nia idade no matenek. Karik Ita sei hakfodak bainhira haree katak sira halo didiʼak sira-nia knaar.

Hanorin katak serbisu uma-laran nian mak importante. Karik ita-nia oan sira iha TPC barak ka ita hakarak sira atu hetan valór diʼak. Maibé livru ida (The Price of Privilege) esplika, se ita la fó serbisu uma-laran nian ba sira, neʼe hanesan ita hanorin sira atu tau uluk buat neʼebé ladún importante iha sira-nia moris. Tuir loloos, serbisu uma-laran nian bele ajuda sira atu sai alunu neʼebé diʼak liután, no prepara sira atu harii sira-nia umakain rasik.—Bíblia nia matadalan: Filipe 1:10.

Keta haluha Ita-nia objetivu. Karik Ita-nia oan presiza tempu kleur atu halo serbisu ruma, ka sira seidauk hatene oinsá atu halo serbisu ho didiʼak. Maski nuneʼe, keta hanoin katak diʼak liu Ita deʼit mak halo serbisu neʼe. Ita-nia objetivu mak atu ajuda sira kaer responsabilidade no aprende atu halo serbisu ho kontente. Keta hein katak sira sei halo serbisu diʼak hanesan ho ema boot.—Bíblia nia matadalan: Eclesiastes (Pengkhotbah) 3:22.

Ajuda sira atu iha hanoin neʼebé loos. Ema balu hatete katak hodi selu oan sira atu halo serbisu iha uma-laran, neʼe sei ajuda sira atu kaer responsabilidade. Maibé ema seluk hatete katak se ita fó osan, neʼe sei halo sira hanoin liu kona-ba buat neʼebé sira sei simu, duké buat neʼebé sira bele fó ba família. Se ita selu beibeik oan sira ba serbisu neʼebé sira halo, karik sira sei lakohi serbisu bainhira sira iha ona osan, no neʼe la ajuda sira atu iha hanoin neʼebé loos. Tan neʼe, karik diʼak liu la selu.