“Laʼen sira tenke hadomi sira-nia feen hanesan sira-nia isin rasik. Ema neʼebé hadomi ninia feen hadomi ninia an rasik, tanba la iha mane ida neʼebé odi ninia isin rasik.”—ÉFESO 5:28, 29.

Laʼen mak ulun ba família. (Éfeso 5:23) Laʼen neʼebé diʼak laʼós siʼak-teen. Nia hafolin ninia feen no tau matan ba ninia feen nia presiza fíziku no emosaun nian. Nia hakaʼas an atu halo kontente ninia feen, laʼós obriga ninia feen atu halo tuir deʼit ninia hakarak. (Filipe 2:4) Nia koʼalia nakloke ba ninia feen kona-ba buat neʼebé nia sente no hanoin, no rona kuandu ninia feen koʼalia. Nia la “sai hirus makaʼas” ka hakanek ninia feen iha dalan fíziku ka emosaun.—Koloso 3:19.

“Feen mós tenke hatudu respeitu kleʼan ba ninia laʼen.”—ÉFESO 5:33.

Kuandu feen ida hatudu respeitu ba ninia laʼen no apoia laʼen nia desizaun, nia ajuda família atu iha dame. Se laʼen halo sala, nia la hatún ninia laʼen, maibé nafatin kalma no respeitu. (1 Pedro 3:4) Kuandu nia atu koʼalia problema ruma, nia buka tempu neʼebé diʼak atu koʼalia ba ninia laʼen ho respeitu.—Eclesiastes 3:7.

“Mane ida sei . . . hela hamutuk ho ninia feen, no sira sei sai isin ida deʼit.”—GÉNESIS 2:24.

Kuandu mane ida no feto ida kaben, sira sai família neʼebé besik liu. Entaun kaben-naʼin sira presiza hakaʼas an atu hametin sira-nia moris kaben nian hodi koʼalia ba malu husi laran no hatudu laran-diʼak ba malu. Sira mós tenke laran-metin ba malu hodi la halo relasaun seksuál ho ema seluk. Se kaben-naʼin sira la hatudu laran-metin ba malu, neʼe hamosu deʼit laran-kanek, halakon konfiansa, no sobu família.—Ebreu 13:4.

“Hanorin labarik atu laʼo iha dalan neʼebé diʼak ba nia; bainhira nia sai boot, nia sei la sees husi dalan neʼe.”—PROVÉRBIOS 22:6.

Maromak fó responsabilidade ba inan-aman atu hanorin oan. Neʼe inklui hanorin sira atu hatudu hahalok diʼak no fó ezemplu diʼak ba sira. (Deuteronómio 6:6, 7) Kuandu oan ida  halo sala, inan-aman neʼebé matenek sei la sai hirus kedas. Sira “lalais atu rona, la ansi atu koʼalia, no neineik atu hirus”. (Tiago 1:19) Se inan-aman presiza fó dixiplina, sira sei halo neʼe ho domin laʼós ho hirus.

“Oan sira, halo tuir imi-nia inan-aman . . . ‘Hatudu respeitu ba imi-nia inan-aman.’”—ÉFESO 6:1, 2.

Oan sira tenke halo tuir sira-nia inan-aman no hatudu respeitu kleʼan ba sira. Kuandu oan sira hatudu respeitu ba sira-nia inan-aman, neʼe sei halo família kontente no haburas dame. Oan sira neʼebé boot ona hatudu respeitu ba inan-aman hodi tau matan ba sira ho didiʼak. Neʼe inklui ajuda atu tau matan sira-nia hela-fatin ka fó osan atu taka sira-nia presiza.—1 Timóteo 5:3, 4.