Sé mak hamosu terus?
Se terus la mai husi Maromak, entaun tanbasá mak iha rai-hamlaha, kiak, funu, moras oioin no dezastre naturais? Maromak nia Liafuan Bíblia fó sai razaun tolu tanbasá ema hetan terus:
Hanoin an deʼit, kaan-teen no odi. “Ema mak domina ema seluk, no neʼe lori deʼit susar.” (Eclesiastes 8:9) Tanba la perfeitu, ema barak halo hahalok aat no hanoin an deʼit. Ita mós sai vítima ba hahalok sira hanesan neʼe.
Tempu susar no situasaun neʼebé mosu derrepente deʼit. Ema barak hasoru terus “tanba tempu susar no situasaun neʼebé mosu derrepente deʼit kona sira”. (Eclesiastes 9:11) Neʼe katak ema terus tanba sira iha fatin no tempu neʼebé sala, asidente ruma, ka ema ladún kuidadu ka halo buat neʼebé la loos.
Aat-naʼin mak ukun mundu. Bíblia esplika ho klaru razaun importante tansá ema terus. Bíblia hatete: “Aat-naʼin mak domina mundu tomak.” (1 João 5:19) “Aat-naʼin” mak Diabu Satanás, kriatura espíritu ho forsa boot, uluk nia mak anju diʼak ida maibé nia “la kaer metin ba lia-loos”. (João 8:44) Anju seluk mós apoia Satanás no kontra Maromak hodi sira bele halo tuir deʼit sira-nia hakarak, neʼe halo sira sai demóniu. (Génesis 6:1-5) Husi tempu neʼebé sira kontra Maromak, Satanás no ninia demóniu sira fó influénsia aat ba mundu neʼe. Liuliu ohin loron Diabu ho hirus makaʼas “lohi ema iha mundu tomak” no hamosu “susar ba rai”. (Apokalipse 12:9, 12) Loloos, Satanás mak ukun-naʼin neʼebé aat tebetebes. Nia kontente atu haree ema terus. Klaru katak Satanás mak hamosu terus, laʼós Maromak.
HANOIN TOʼOK: Só ida neʼebé laran-aat deʼit mak hakarak lori susar ba ema. Neʼe la hanesan duni ho Maromak, Bíblia hatete: “Maromak mak domin.” (1 João 4:8) Tan neʼe “Maromak neʼebé loos nunka halo buat neʼebé aat, Ida neʼebé Kbiit Boot Liu Hotu nunka halo sala!”—Job 34:10.
Maibé karik Ita hanoin: ‘Toʼo bainhira mak Maromak neʼebé Kbiit Boot Liu Hotu sei husik Satanás kontinua ukun?’ Hanesan ita haree ona, Maromak odi buat neʼebé aat, no nia sente laran-susar bainhira haree ita terus. Laʼós neʼe deʼit, Maromak nia Liafuan anima ita atu ‘entrega ita-nia laran-susar hotu ba nia, tanba nia hanoin ita’. (1 Pedro 5:7) Maromak hadomi ita no nia iha kbiit atu halakon terus no hahalok la justisa hotu. Informasaun tuirmai sei esplika kona-ba neʼe. *
^ par. 7 Atu hetan informasaun liután kona-ba tanbasá mak terus no buat akontese, haree lisaun 26 husi livru Moris Haksolok ba Nafatin. Livru neʼe husi Testemuña ba Jeová, no bele download husi website www.isa4310.com/tdt.
Karik Ita sei gosta
LIVRU HAKLAKEN
Lakleur tan Maromak sei halakon terus hotu
Oinsá mak ita bele hatene katak lakleur tan Maromak sei halakon terus no hahalok la justisa hotu?
PERGUNTA KONA-BA BÍBLIA
Diabu iha duni ka lae?
Diabu mak ema nia hahalok aat iha sira-nia laran ka nia mak iha duni?
