LISAUN 41
Saida mak Bíblia hatete kona-ba relasaun seksuál?
Ema barak sente la diʼak atu koʼalia kona-ba buat seksuál. Maibé Bíblia fó sai kona-ba neʼe ho momoos, klaru no respeitu. Buat neʼebé Bíblia hatete lori benefísiu mai ita. Neʼe lójiku tanba Jeová mak ita-nia Kriadór, no nia hatene buat neʼebé diʼak liu ba ita. Nia hanorin ita oinsá ita-nia hahalok bele halo nia kontente, no saida mak ajuda ita atu moris haksolok ba nafatin.
1. Saida mak Jeová nia haree kona-ba relasaun seksuál?
Relasaun seksuál mak prezente ida husi Jeová. Nia hakarak mane ida no feto ida neʼebé kaben ona atu goza ida-neʼe. Liuhusi prezente ida-neʼe, feen-laʼen bele iha oan no mós hatudu domin ba malu. Tan neʼe mak Maromak nia Liafuan hatete: “Ó sei haksolok ho ó-nia feen husi ó-nia tempu joven.” (Provérbios 5:18, 19) Jeová hakarak kaben-naʼin Kristaun atu laran-metin ba sira-nia pár, no la halo adultériu.—Lee Ebreu 13:4.
2. Saida mak sala seksuál?
Bíblia fó-hatene mai ita katak “ema neʼebé halo sala seksuál . . . sei la simu Maromak nia Ukun nuʼudar liman-rohan”. (1 Korinto 6:9, 10) Ema neʼebé hakerek eskritura orijinál uza liafuan Gregu porneia atu refere ba sala seksuál. Liafuan neʼe inklui (1) relasaun seksuál a entre ema neʼebé laʼós feen-laʼen, (2) omoseksuál, no (3) relasaun seksuál entre ema ho animál. Kuandu ita “hasees an husi sala seksuál”, ita bele halo Jeová kontente no lori benefísiu ba ita-nia an rasik.—1 Tesalónika 4:3.
KEʼE KLEʼAN
Haree toʼok oinsá mak Ita bele hasees an husi sala seksuál no oinsá mak moris tuir morál neʼebé diʼak sei lori benefísiu ba Ita.
3. Hasees an husi sala seksuál
Mane fiar-naʼin ida naran José la monu ba tentasaun kuandu feto ida hakarak toba ho nia. Lee Génesis 39:1-12, depois koʼalia hamutuk kona-ba pergunta tuirmai:
-
Tanbasá mak José halai sees?—Haree versíkulu 9.
-
Tuir Ita-nia hanoin, José halo desizaun neʼebé loos ka lae? Tanbasá?
Oinsá mak joven sira ohin loron bele halo tuir José no halai sees husi sala seksuál? Loke VÍDEO.
Jeová hakarak ita hotu hasees an husi sala seksuál. Lee 1 Korinto 6:18, depois koʼalia hamutuk kona-ba pergunta tuirmai:
-
Situasaun saida deʼit mak bele tenta ema atu monu ba sala seksuál?
-
Oinsá mak Ita bele hasees an husi sala seksuál?
4. Ita bele tahan hasoru tentasaun
Saida deʼit mak bele halo susar ba ita atu tahan hasoru tentasaun atu halo sala seksuál? Loke VÍDEO, depois koʼalia hamutuk kona-ba pergunta tuirmai.
-
Irmaun iha vídeo neʼe halo saida bainhira nia rekoñese katak ninia hanoin no hahalok bele book nia atu la laran-metin ba ninia feen?
Ema Kristaun neʼebé laran-metin mós dala ruma presiza luta atu la hanoin kona-ba buat neʼebé la morál. Oinsá mak Ita bele hapara hanoin neʼebé la morál? Lee Filipe 4:8, depois koʼalia hamutuk kona-ba pergunta tuirmai:
-
Ita presiza hanoin kona-ba saida deʼit?
-
Oinsá mak lee Bíblia no halo ita-nia an okupadu ho serbisu ba Jeová bele ajuda ita atu tahan hasoru tentasaun?
5. Jeová nia mandamentu lori benefísiu mai ita
Jeová hatene saida mak diʼak liu ba ita. Nia fó-hatene ita oinsá atu moris tuir morál neʼebé diʼak no benefísiu saida mak ita sei hetan. Lee Provérbios 7:7-27 no loke VÍDEO, depois koʼalia hamutuk kona-ba pergunta tuirmai.
-
Oinsá mak mane joven neʼe tama ba situasaun neʼebé lori tentasaun ba nia?—Haree Provérbios 7:8, 9.
-
Tuir Provérbios 7:23, 26, sala seksuál bele lori konsekuénsia neʼebé sériu. Se ita nafatin iha morál neʼebé diʼak, ita bele sees husi problema saida?
-
Bainhira Ita iha morál neʼebé moos, bensaun saida mak Ita sei simu iha futuru?
Ema balu hanoin katak buat neʼebé Bíblia hatete kona-ba omoseksuál mak la hatudu domin. Maibé Jeová mak Maromak neʼebé domin, no nia hakarak ema hotu atu moris haksolok ba nafatin. Atu simu bensaun neʼe, ita presiza moris tuir Maromak nia mandamentu. Lee 1 Korinto 6:9-11, depois koʼalia hamutuk kona-ba pergunta tuirmai:
-
Tuir Maromak nia haree, hakarak omoseksuál deʼit mak sala, ka iha hakarak seluk tan neʼebé sala?
Atu halo Maromak kontente, ita hotu presiza halo mudansa ruma ba ita-nia hahalok. Hakaʼas an neʼe iha folin duni ka lae? Lee Salmo 19:8, 11, depois koʼalia hamutuk kona-ba pergunta tuirmai:
-
Tuir Ita-nia hanoin, Jeová nia mandamentu kona-ba morál mak todan demais ka lae? Tanbasá?
Jeová ajuda ona ema barak atu halo tuir ninia ukun-fuan sira kona-ba morál. Nia mós bele ajuda Ita
EMA BALU DEHAN: “La sala atu halo relasaun seksuál ho ema naran deʼit, importante mak hadomi malu.”
-
Ita sei dehan saida?
PONTU IMPORTANTE
Relasaun seksuál mak prezente husi Maromak ba feen-laʼen atu bele haksolok hamutuk.
Rezumu
-
Sala seksuál inklui saida deʼit?
-
Saida mak bele ajuda ita atu hasees an husi sala seksuál?
-
Benefísiu saida deʼit mak ita bele hetan kuandu ita halo tuir Jeová nia mandamentu kona-ba morál?
BUKA-HATENE LIUTÁN
Aprende tanbasá Maromak hakarak mane no feto tenke kaben antes moris hamutuk.
Hanoin toʼok tanbasá maski Bíblia hanorin katak hahalok omoseksuál mak sala maibé neʼe la dehan katak ita odi ema omoseksuál.
“Hahalok omoseksuál neʼe sala ka lae?” (Informasaun iha jw.org/tdt)
Aprende oinsá mak Maromak nia ukun-fuan sira kona-ba hahalok seksuál bele proteje ita.
“Seksu orál mak hanesan ho halo relasaun seksuál ka lae?” (Informasaun iha jw.org/tdt)
Lee esperiénsia “Sira trata haʼu ho dignidade”, no buka-hatene saida mak motiva mane omoseksuál ida troka ninia moris no halo kontente Maromak.
“Bíblia troka ema nia moris” (Informasaun husi Livru Haklaken)
a Relasaun seksuál neʼe inklui mós hahalok hanesan relasaun seksuál ho ibun ka kidun, ka book ema nia oin-lulik iha dalan seksuál.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
