Ba haklaken-naʼin sira:

Imajina toʼok Ita mak apóstolu ida neʼebé hamriik iha Foho Oliveira. Jesus mosu iha Ita-nia oin. Antes nia saʼe ba lalehan, nia hatete ba Ita: “Kuandu espíritu santu tun ba imi, imi sei simu kbiit, no imi sei sai haʼu-nia testemuña iha Jeruzalein, iha Judeia tomak no iha Samaria, no toʼo rai sira neʼebé dook liu iha mundu.” (Após 1:8) Ita sei sente oinsá?

Karik Ita bele sente katak buat neʼebé Jesus husu Ita atu halo mak imposivel. No Ita hanoin: ‘Oinsá mak ami, dixípulu neʼebé uitoan deʼit bele haklaken “toʼo rai sira neʼebé dook liu iha mundu”?’ Karik Ita hanoin-hetan avizu neʼebé Jesus hatoʼo iha kalan antes nia mate: “Atan ida la boot liu fali ninia naʼi. Se sira fó-terus haʼu, sira mós sei fó-terus imi. Se sira halo tuir haʼu-nia liafuan, sira mós sei halo tuir imi-nia liafuan. Maibé sira sei halo buat hotu neʼe ba imi tanba haʼu-nia naran, tanba sira la hatene Ida neʼebé haruka haʼu mai.” (João 15:20, 21) Bainhira Ita hanoin kona-ba liafuan sira-neʼe, karik Ita husu Ita-nia an: ‘Oinsá haʼu bele fó sasin ho didiʼak maski ema sei fó-terus ba haʼu?’

Ohin loron ita mós hasoru situasaun neʼebé hanesan. Nuʼudar Testemuña ba Jeová, ita presiza fó sasin ho didiʼak ba “ema husi nasaun hotu” “toʼo rai sira neʼebé dook liu iha mundu”. (Mt 28:19, 20) Oinsá ita bele kumpre serbisu neʼe, liuliu bainhira ema fó-terus ita?

Livru Apóstolu konta kona-ba oinsá Jeová ajuda apóstolu sira no sira-nia maluk Kristaun iha tempu neʼebá atu halaʼo serbisu haklaken. Livru neʼe sei ajuda Ita aprende kona-ba buat oioin neʼebé akontese ba ema Kristaun iha tempu neʼebá no oinsá sira sente kontente tanba serbisu haklaken laʼo ba oin lalais. Ita sei hakfodak atu aprende katak iha buat barak neʼebé hanesan entre ema Kristaun iha tempu neʼebá no mós ho ita ohin loron. Ita sei haree katak serbisu neʼebé ita halo no dalan neʼebé ita organiza serbisu neʼe mak atu hanesan ho tempu uluk. Bainhira Ita hanoin kleʼan kona-ba istória sira-neʼe, neʼe sei hametin Ita-nia fiar katak Maromak Jeová kontinua dirije ninia organizasaun iha rai.

Ami harohan katak hodi estuda kona-ba livru Apóstolu, neʼe sei hametin liután Ita-nia fiar katak Jeová sei ajuda Ita no nia sei uza ninia espíritu santu atu fó kbiit ba Ita atu bele tahan. Ami hein katak bainhira Ita aplika buat neʼebé Ita aprende husi livru neʼe, neʼe sei anima Ita atu kontinua “fó sasin ho didiʼak kona-ba Maromak nia Ukun” no ajuda ema seluk atu koñese Jeová no hetan moris ba nafatin.—Após 28:23; 1 Tim 4:16.