Maromak fó Jesus nia moris nuʼudar sakrifísiu hodi halo ema livre ka salva ema husi sala no mate. Bíblia dehan katak Jesus nia raan mak folin neʼebé selu hodi halo ema livre. (Éfeso 1:7; 1 Pedro 1:18, 19) Tan neʼe mak Jesus dehan katak nia mai “atu fó ninia moris hodi sosa fali ema barak”.​—Mateus 20:28.

Tanbasá presiza “sosa fali ema barak”?

 Maromak kria mane primeiru, Adão, nuʼudar ema perfeitu ka la iha sala. Adão iha oportunidade atu moris ba nafatin maibé nia lakon ida-neʼe tanba nia deside atu kontra Maromak. (Génesis 3:17-19) Bainhira nia iha oan no bei-oan, nia hadaʼet sala ba sira. (Roma 5:12) Tan razaun neʼe, Bíblia hatete katak Adão “faʼan” ninia an no mós ninia oan sira atu sai atan ba sala no mate. (Roma 7:14) Tanba Adão nia oan sira hotu la perfeitu, sira ida mós labele sosa fali buat neʼebé Adão halakon.​—Salmo 49:7, 8.

 Maromak hanoin tebes Adão nia bei-oan sira neʼebé la iha ona esperansa. (João 3:16) Maibé Maromak sempre hatudu hahalok justisa, tan neʼe nia labele perdua deʼit ka haluha deʼit sala neʼe se la iha razaun neʼebé vale. (Salmo 89:14; Roma 3:23-26) Maromak hadomi tebes ema, tan neʼe nia arranju dalan legál ida atu bele fó perdua ba ema nia sala no mós halakon sala neʼe. (Roma 5:6-8) Jesus nia sakrifísiu mak dalan legál neʼe.

Atu sosa fali ema barak, neʼe envolve saida deʼit?

 Iha Bíblia, fraze “sosa fali” envolve buat tolu tuirmai:

1.   Presiza selu folin.​—Números 3:46, 47.

2.   Halo livre husi susar ka todan ruma.​—Éxodo 21:30.

3.   No folin tenke hanesan ho folin husi buat neʼebé sosa fali. a

 Mai ita haree oinsá Jesus nia sakrifísiu iha buat tolu neʼe.

1.   Selu folin. Bíblia hatete katak Maromak sosa ema Kristaun “ho folin karun”. (1 Korinto 6:20; 7:23) Folin neʼe mak Jesus nia raan, no ho raan neʼe mak nia “sosa ona ema ba Maromak husi suku, língua, povu no nasaun hotu”.​—Apokalipse 5:8, 9.

2.   Halo livre. Jesus nia sakrifísiu sosa fali ita hodi ita “bele sai livre” husi sala.​—1 Korinto 1:30; Koloso 1:14; Ebreu 9:15.

3.   Folin neʼebé hanesan. Jesus nia sakrifísiu nia folin mak hanesan ho buat neʼebé Adão halakon, neʼe mak ema ida nia moris neʼebé perfeitu. (1 Korinto 15:21, 22, 45, 46) Bíblia hatete: “Liuhusi ema ida deʼit [Adão] neʼebé lakohi halo tuir, ema hotu sai sala-naʼin, nuneʼe mós liuhusi ema ida deʼit [Jesus Kristu] neʼebé halo tuir, Maromak sei haree ema barak nuʼudar ema laran-loos.” (Roma 5:19) Eskritura neʼe esplika oinsá ema ida nia mate bele sosa fali ema barak. Tuir loloos, Jesus nia sakrifísiu mak “folin neʼebé hanesan atu sosa fali ema hotu” neʼebé hatudu katak sira hafolin sakrifísiu neʼe.​—1 Timóteo 2:5, 6.