Jesus konta istória kona-ba mane riku ida no Lázaro. (Lucas 16:19-31) Iha istória neʼe, mane riku no Lázaro reprezenta grupu rua: (1) ulun-naʼin relijiaun Judeu nian neʼebé foti an iha Jesus nia tempu no (2) ema neʼebé pozisaun kiʼik maibé hakaʼas an atu moris tuir Jesus nia hanorin.

Iha informasaun neʼe

•  Jesus dehan saida kona-ba mane riku no Lázaro?

•  Neʼe mak istória tebes ka lae?

•  Istória neʼe apoia doutrina kona-ba infernu ka lae?

•  Istória neʼe signifika saida?

 Iha Lucas kapítulu 16, Jesus konta istória kona-ba mane naʼin-rua neʼebé hasoru mudansa boot iha sira-nia situasaun.

 Jesus konta: Iha mane riku ida neʼebé iha moris diʼak. No ema kiak ida naran Lázaro neʼebé ema sempre tau iha mane riku neʼe nia portaun oin; nia hakarak han hahán restu neʼebé monu husi mane riku neʼe nia meza. Tempu balu liutiha, Lázaro mate no anju sira lori nia ba Abraão nia sorin. Mane riku neʼe mós mate no ema hakoi nia. Iha istória neʼe, mane naʼin-rua neʼe bele hanoin no sente depois sira mate. Mane riku neʼebé mate ona sente terus tebes tanba ahi neʼebé lakan no nia husu Abraão atu haruka Lázaro hatama liman-fuan tutun ba bee hodi halo malirin mane riku neʼe nia nanál. Abraão lakohi halo tuir buat neʼebé mane riku neʼe husu no nia dehan katak mane riku no mós Lázaro nia situasaun troka ona, no iha rai-kuak kleʼan entre sira naʼin-rua neʼebé labele duni hakat.

 Lae. Neʼe mak ai-knanoik deʼit neʼebé Jesus konta atu hanorin ema kona-ba lisaun ida. Matenek-naʼin sira mós rekoñese katak neʼe mak ai-knanoik deʼit. Porezemplu, subtítulu iha Bíblia Sagrada Para o Tercerio Milénio Da Encarnação husi Difusora Bíblica temi katak neʼe mak ai-knanoik. No nota-rodapé husi Jerusalem Bible Katólika nian fó sai katak neʼe mak “ai-knanoik no ema neʼebé temi iha istória laran mós inventa deʼit”.

 Jesus uza istória neʼe atu hanorin kona-ba ema mate nia kondisaun ka lae? Jesus dehan katak ema balu hetan terus makaʼas iha infernu no Abraão no mós Lázaro mak iha lalehan ka lae? Lae, faktu sira hatudu katak Jesus la hanorin hanesan neʼe.

 Porezemplu:

•   Se mane riku neʼe hetan duni terus iha ahi laran, ahi neʼebé lakan makaʼas neʼe sei hamaran kedas bee-turuk neʼebé iha Lázaro nia liman-fuan, loos ka lae?

•   Maski karik bee-turuk neʼe la maran kedas, maibé bee-turuk ida deʼit bele fó kmaan ba mane neʼebé hetan terus iha ahi laran ka lae?

•   Jesus esplika ho klaru katak la iha ema ida neʼebé saʼe ona ba lalehan iha tempu neʼebá. Entaun oinsá mak Abraão bele moris iha lalehan?—João 3:13.

 Lae. Maski neʼe laʼós istória tebes, maibé ema balu dehan katak istória neʼe mak simbóliku no fó ideia kona-ba ema diʼak bá lalehan no ema aat hetan kastigu iha infernu. a

 Neʼe mak konkluzaun neʼebé loos ka lae? Lae.

 Doutrina kona-ba infernu la han malu ho buat neʼebé Bíblia fó sai kona-ba ema mate nia kondisaun. Porezemplu, Bíblia la dehan katak ema diʼak hotu neʼebé mate ona sei moris kontente iha lalehan ka ema aat sira sei hetan kastigu iha infernu. Bíblia fó sai ho klaru: “Ema neʼebé moris hela hatene katak sira sei mate, maibé ema neʼebé mate ona la hatene buat ida”.—Eclesiastes 9:5.

 Istória neʼe hatudu katak lakleur iha grupu rua neʼebé sei hasoru mudansa boot iha sira-nia moris.

 Mane riku reprezenta ulun-naʼin relijiaun Judeu nian neʼebé “hadomi deʼit osan”. (Lucas 16:14) Sira rona mensajen neʼebé Jesus hatoʼo, maibé sira kontra hasoru mensajen neʼe. Ulun-naʼin relijiaun sira-neʼe haree ema baibain nuʼudar ema neʼebé la iha folin.—João 7:49.

 Lázaro reprezenta ema baibain neʼebé rona no halo tuir Jesus nia hanorin, maibé ulun-naʼin relijiaun Judeu haree sira nuʼudar folin-laek.

 Ema iha grupu rua neʼe hasoru mudansa boot.

•   Ulun-naʼin relijiaun Judeu hanoin katak Maromak kontente ho sira. Maibé Maromak la simu sira no sira-nia adorasaun tanba sira la simu Jesus nia mensajen, neʼe hanesan sira ‘mate ona’ no hetan terus husi mensajen neʼebé Jesus no ninia dixípulu sira haklaken.—Mateus 23:29, 30; Apóstolu 5:29-33.

•   Ema baibain neʼebé ulun-naʼin relijiaun sira trata aat tebes ba tempu kleur, agora sira sente kontente tanba Maromak kontente ho sira. Sira barak rona no halo tuir buat neʼebé Jesus hanorin husi Eskritura no hetan benefísiu. Sira hetan oportunidade atu haksolok ba nafatin tanba Maromak kontente ho sira.—João 17:3.