Ita bele iha dame iha mundu, maibé dame neʼe sei la mosu tanba ema nia hakaʼas an. Maromak nia Ukun neʼebé Jesus mak ukun sei lori dame ba mundu. Haree toʼok saida mak Bíblia hanorin kona-ba esperansa furak neʼe.

1.   Maromak sei “hapara funu sira iha mundu tomak” no neʼe sei kumpre ninia promesa atu lori “dame ba ema sira neʼebé Maromak simu iha rai”.—Salmo 46:9; Lucas 2:14.

2.   Maromak nia Ukun sei ukun mundu tomak husi lalehan. (Daniel 7:14) Nuʼudar governu neʼebé sei ukun mundu tomak, Ukun neʼe sei halakon nasionalizmu neʼebé sai hun ba funu hotu.

3.   Bíblia mós bolu Jesus, Liurai ba Maromak nia Ukun, nuʼudar “Ulun-Naʼin Dame nian” no nia sei lori dame neʼebé “la iha rohan”.—Isaias 9:6, 7.

4.   Maromak sei la husik ema neʼebé gosta funu malu atu moris iha ninia Ukun okos, tanba Maromak “odi ema hotu neʼebé gosta violénsia”.—Salmo 11:5; Provérbios 2:22.

5.   Maromak hanorin ninia povu oinsá atu buka dame. Bíblia hatete: “Sira sei tuku sira-nia surik sai xarrua no tuku sira-nia diman sai sabit. Nasaun sei la foti tan surik hasoru nasaun seluk, no sira mós sei la aprende tan funu.”—Isaias 2:3, 4.

 Iha mundu tomak, Testemuña ba Jeová rihun ba rihun aprende daudaun oinsá atu buka dame. (Mateus 5:9) Maski Testemuña sira mai husi rasa neʼebé la hanesan no hela iha nasaun hamutuk 230, maibé sira lakohi hola parte iha funu.