“E le hore batho ba ka tseba hore uena, eo lebitso la hao e leng Jehova, uena u le mong u Ea Phahameng ka ho Fetisisa holim’a lefatše lohle.”​—PESALEME EA 83:18.

Bibele e ruta hore Jehova ke eena feela Molimo oa ’nete. Ke eena ’Mopi oa maholimo le lefatše le lintho tsohle tse phelang. Ke eena feela eo re lokelang ho mo rapela.​—Tšenolo 4:11.

“Molimo ke lerato.”​—1 JOHANNE 4:8.

Jehova o sebelisa Bibele le lintho tseo a li bopileng ho re ruta hore na ke motho ea joang. Lerato ke eona ntho e ka sehloohong eo a nang le eona. Ntho e ’ngoe le e ’ngoe eo a e etsang e susumetsoa ke lerato. Ha re ithuta ka Jehova haholoanyane, re mo rata le ho feta.

“U Molimo oa liketso tsa tšoarelo.”​—NEHEMIA 9:17.

Jehova oa tseba hore ha rea phethahala. Kahoo o ikemiselitse ho re tšoarela. Ha re kopa tšoarelo ho eena ebile re khaotsa ho etsa lintho tse mpe, o tla re tšoarela ebile a ke ke a re fa kotlo bakeng sa libe tsa rona tsa nakong e fetileng. ​—Pesaleme ea 103:​12, 13.

“Jehova o haufi le bohle ba ipiletsang ho eena . . . O tla utloa mohoo oa bona o kopang thuso.”​—PESALEME EA 145:​18, 19.

Jehova ha a hloke hore re latele meetlo e itseng kapa re sebelise litšoantšo ha re mo rapela. O mamela lithapelo tsa rona joalokaha batsoali ba lerato ba mamela bana ba bona.