Njalo ngenyanga silangatelela kubukela tinhlelo letikhutsatako tema-video lakhululwe eMsakatweni we-JW. Nobe kunjalo, bazalwane labanyenti e-Afrika abakhoni kutfola letinhlelo nge-Internet. Kungani?

 Tindzawo letinyenti e-Afrika tite kahle i-Internet. Lapho itfolakala khona, idulile nobe ihamba kancane. Sibonelo nje, umbonisi wesigodzi eMadagascar wake watitsatsela luhlelo lunye lweMsakato weJW ku-Internet café. Wabhadala E221 ($16), lokuyimali lengetulu kwemholo weliviki! a

 Ngisho nobe kunalobulukhuni, tigidzi tebantfu e-Afrika nyalo setiyakhona kubukela uMsakato we-JW ngaphandle kwekusebentisa i-Internet. Kanjani?

 Kusukela nga-2017, uMsakato weJW wentiwe watfolakala emaveni lamanyenti ase-Afrika (sub-Saharan Africa) kusetjentiswa siteshi seTV. Lesiteshi sisakatwa mahhala, ema-awa langu-24 ngelilanga, emalanga langu-7 evikini, ngetilwimi letingu-16.

 Kuze bakhone kukwenta loku, BoFakazi BaJehova babhadala labo labasebenta ngetiteshi teTV kuze badlale letinhlelo kusetjentiswa i-satellite. Le-satellite lesetjentiswako itfolakala emaveni langu-35 e-Afrika (sub-Saharan Africa). Loku kubita imali lengetulu kwa-E166 017.60 ($12 000) ngenyanga. Ngaletinye tikhatsi kubhadalwa imali leyengetiwe kulesinye siteshi kuze sisakate letinye tinhlelo bukhoma. Loku kwenta kutsi bantfu labanyenti babukele imihlangano yesifundza nobe tinhlelo letikhetsekile tekuvakashelwa kweligatja.

 Bantfu labanyenti, lokufaka ekhatsi nalabangasibo boFakazi, bayasibukela lesiteshi seJW lesiku-satellite. Nobe kunjalo, bazalwane betfu labanyenti abakhoni kutsenga tintfo letidzingekako kuze babukele lesiteshi. Kuze basitwe, bazalwane nabodzadze bafakelwe tintfo tekubukela letisebentisa i-satellite emaHholweni eMbuso langetulu kwa-3 670 kuze babukele kuto uMsakato weJW. Imali yaletintfo naseyihlanganiswe nemali yekutetfwala, ilinganiselwa ku-E968.44 ($70), nangabe liHholwa leMbuso selivele linayo iTV nobe i-projector. Ecinisweni letintfo ngalokuvamile natiphelele tingabita E7 332.44 ($530).

 Bazalwane nabodzadze basijabulela kakhulu lesiteshi. Lomdzala welibandla leliseCameroon utsi: “Emndenini wami, lesiteshi sifana nemana endzaweni lelugwadvule.” Odebode, umzalwane waseNigeria, utsi: “Sibukela lesiteshi njengemndeni katsatfu ngeliviki. Bantfwana bami bahlale basilangatelela leso sikhatsi. Ngaletinye tikhatsi baze baticelele kutsi sibafakele sona.” Rose, naye lohlala eNigeria, utsi: “Ngiyajabula kusho kutsi nyalo kunekutsi ngihlale ngibukela tindzaba, sengibukela siteshi seJW ku-satellite. Nangibukela tindzaba bengikwata ngenca yaloko lebengikubona futsi bekubese kwenyuka iBP. Kodvwa uMsakato weJW uyangakha uphindze ungente ngibe nekuthula! Lesi siteshi lengisitsandza kakhulu. Sisibusiso lesivela kuJehova.”

 Umbonisi wesigodzi eMozambique ubika kutsi esigodzini lasihambelako emaHholwa eMbuso asafakwe tintfo letidzingekako kuze atfole lesiteshi. Kulamabandla, bazalwane bafika kusasele li-awa nobe ngetulu ngaphambi kwekutsi umhlangano ucale kuze babukele uMsakato weJW.

 Nga-2019, emhlanganweni wetive lebewuseJozi, eNingizimu Afrika, lesiteshi sasetjentiswa kuze kusakatwe tinkhulumo letikhetsekile etindzaweni letingu-9 letehlukahlukene, lokufaka ekhatsi netinkhulumo letabekwa lilunga leSigungu Lesibusako. Sphumelele, losebenta neLocal Broadcasting Department egatjeni laseNingizimu Afrika, utsi: “Sisengakefiki lesiteshi, bekudzingeka sisakate letinkhulumo sisebentisa i-Internet. Loku bekudzinga i-Internet lengaphatamiseki nekutsi kutsengwe ema-data. Siteshi seJW ku-satellite asibiti kakhulu futsi asiphatamiseki.”

 Siyabonga ngeminikelo yenu leniyentela umsebenti wemhlaba wonkhe ngobe bazalwane betfu labanyenti base-Afrika bayakhona kubukela uMsakato weJW basebentisa i-satellite. Siyibonga kakhulu iminikelo leniyente nisebentisa i-website letsi donate.isa4310.com.