EBhayibhelini ligama lelitsi “kukholwa” lisho kuba netinkholelo letisekelwe ebufakazini lobuphatsekako. Umuntfu lokholwa nguNkulunkulu uyaciniseka kutsi Nkulunkulu utatigcwalisa tonkhe tetsembiso takhe.

Indlela Mosi labekaphila ngayo yakhombisa kutsi abetetsemba tetsembiso taNkulunkulu. (Genesisi 22:15-18) Bekanelitfuba lekuphila imphilo lentofontofo eveni laseGibhithe lebelinjingile kodvwa wayishiya leyo mphilo “wakhetsa kuhlupheka nesive saNkulunkulu kunekutijabulisa esonweni kwesikhashana.” (Hebheru 11:25) Lesincumo Mosi lasitsatsa besisemawala yini futsi bekatatisola yini ngaso ngemuva kwesikhatsi? Chake, ngobe liBhayibheli litsi Mosi “wacinisela kwaba shangatsi uyambona longabonwa.” (Hebheru 11:27) Mosi akazange atisole ngetincumo latitsatsa lebetisekelwe ekwetsembeni kwakhe tetsembiso taNkulunkulu.

Mosi wancuma kusita labanye kuze bakholwe kuNkulunkulu. Cabanga ngalokwenteka ngesikhatsi ema-Israyeli kubonakala shengatsi avimbelekile emkhatsini wemabutfo aFaro neLwandle Lolubovu. Etfuswe ngulobekubonakala kuyinhlekelele lesemnyango, ema-Israyeli akhala kuJehova nakuMosi. Bekatakwenta njani Mosi kulesimo?

Kungenteka kutsi Mosi bekangati kutsi ngekushesha Nkulunkulu abetawuhlukanisa Lwandle Lolubovu ekhatsi avulele ema-Israyeli indlela yekuphunyuka. Nome kunjalo, Mosi abenelitsemba lekutsi Nkulunkulu utawenta lokutsite kuze avikele ema-Israyeli. Mosi abefisa kutsi nema-Israyeli ametsembe Nkulunkulu. LiBhayibheli litsi: “Mosi wabaphendvula watsi: ‘Manini sibindzi, nicine, nitawubona kusindzisa kwaSimakadze latanentela kona lamuhla.’” (Eksodusi 14:13) Waphumelela yini Mosi ekuciniseni kukholwa kwema-Israyeli? Waphumelela ngobe naku lokushiwo liBhayibheli ngaMosi nangawo onkhe ema-Israyeli, litsi: “Ngekukholwa ema-Israyeli ewela Lwandle Lolubovu, kwaba shangatsi kusemhlabatsini lowomile.” (Hebheru 11:29) Kukholwa kwaMosi akusitanga yena kuphela kodvwa kwasita wonkhe muntfu lowakubona kukuhlakanipha kukholwa nguJehova.

Singamlingisa Mosi ngekukholwa ngekutsi tincumo lesitentako tikhombise kutsi siyatetsemba tetsembiso taJehova. Nasi sibonelo: Nkulunkulu wetsembisa kutsi utatinakekela tidzingo tetfu tenyama nangabe kumkhonta kuyintfo lesiyihambisa embili ekuphileni kwetfu. (Matewu 6:33) Kuliciniso kutsi singakutfola kulukhuni kubalekela umbono wekutsandza umcebo bantfu labanawo lamuhla. Siyaciniseka kutsi nangabe senta konkhe lokusemandleni etfu kuze siphile imphilo lemelula futsi legcile ekukhonteni Jehova, yena utasiniketa konkhe lesikudzingako. Usetsembisa kutsi noma kanjani “ngingeke ngikuyekele, ngingeke ngikushiye.”—Hebheru 13:5.

Siphindze sente konkhe lokusemandleni kuze sisite labanye bakholwe nguNkulunkulu. Sibonelo saloko kutsi, batali labahlakaniphile bayawasebentisa ematfuba labanawo ekwakha kukholwa kwebantfwana babo. Njengobe bantfwana bakhula, badzinga lwati lolubalulekile lwekutsi Nkulunkulu ukhona futsi usinike imitsetfo lesisita sehlukanise tintfo letinhle naletimbi. Ngetulu kwaloko, bantfwana badzinga kusitwa kuze kubakhanyele kutsi kulandzela imitsetfo yaNkulunkulu kuyindlela lenhle kakhulu yekuphila. (Isaya 48:17, 18) Batali baniketa bantfwana babo sipho lesiligugu nababasita bakholelwe kutsi “Nkulunkulu uyaphila nekutsi uyabavuza labo labamfunako.”—Hebheru 11:6.