Mbambambamba Ungubani Jesu Khristu?
Mbambambamba Ungubani Jesu Khristu?
“Kwatsi nakangenako Jesu eJerusalema, kwanyakatela lidolobha lonkhe, bantfu babutana batsi: ‘Ngubani-ke yena lo?’ Ticumbi taphendvula tatsi: ‘Lona nguJesu, umphrofethi waseNazaretha yaseGalile.’”—MATEWU 21:10, 11.
KUNGANI kufika kwaJesu Khristu a eJerusalema ngentfwasahlobo ya-33 C.E. kwabangela lokunyakatela? Bantfu labanyenti kulelidolobha bebake beva ngaJesu kanye nangetintfo letimangalisako latenta. Ngako-ke, bachubeka batjela labanye ngaye. (Johane 12:17-19) Nanobe kunjalo, leticumbi betingati kutsi emkhatsini wato bekunemuntfu timfundziso takhe lebetitawusakateka emhlabeni wonkhe futsi tichubeke tikhona kute kube sesikhatsini setfu.
Asesihlole tibonelo letimbalwa letiveta indlela Jesu lakutsintsa ngayo kuphila kwebantfu.
▪ Ikhalenda lesetjentiswa etincenyeni letinyenti temhlaba isekelwe emnyakeni lokucatjangwa kutsi Jesu watalwa ngawo.
▪ Bantfu labangaba tigidzigidzi letimbili emhlabeni, batibita ngekutsi bangemaKhristu.
▪ Inkholo yemaMoslem, lenemalunga langetulu kwesigidzigidzi emhlabeni wonkhe, ifundzisa kutsi Jesu “ungumphrofethi lomkhulu kwendlula Abrahama, Nowa, kanye naMosi.”
▪ Emavi aJesu lamanyenti lahlakaniphile, ayasetjentiswa malanga onkhe nakukhulunywa. Nankha lamanye awo:
‘Mnike nalesi lesinye sihlatsi.’—MATEWU 5:39.
‘Hamba naye emakhilometha lamabili.’—MATEWU 5:41.
“Kute umuntfu longakhonta emakhosi lamabili.”—MATEWU 6:24.
“Ningawalahli etihhontjini ematje enu laligugu.”—MATEWU 7:6.
“Konkhe lenifisa kutsi bantfu bakwente kini, kwenteni nani kubo.”—MATEWU 7:12.
‘Bala tindleko.’—LUKHA 14:28.
Asingabati kutsi Jesu wakutsintsa kuphila kwebantfu. Nanobe kunjalo, bantfu banemibono kanye netinkholelo letehlukehlukene ngaye. Ngako-ke ungase utibute: ‘Mbambambamba ungubani Jesu Khristu?’ LiBhayibheli liyasitjela kutsi Jesu wavelaphi, abephila njani, kanye nekutsi kungani afa. Kwati lawo maciniso ngaye kutawukutsintsa kakhulu kuphila kwakho—nyalo kanye nasesikhatsini lesitako.
[Umbhalo longentansi]
a Libito lalomphrofethi waseNazaretha lelitsi “Jesu,” lisho kutsi “Jehova uyiNsindziso.” Kantsi ligama lelitsi “Khristu,” lisho kutsi “Logcotjiwe,” lokuveta kutsi Jesu wagcotjwa, nobe wabekwa nguNkulunkulu esikhundleni lesikhetsekile.