Indlela 5

Yenetisa Sidzingo Sakho Sekwati Nkulunkulu

LIFUNDZISANI LIBHAYIBHELI? “Babusisiwe labamphofu emoyeni.”—Matewu 5:3.

INKINGA LEKHONA. Kunetinkhulungwane tetinkholo letehlukehlukene, futsi letinyenti tato tifundzisa ngetindlela letiphikisanako tekwenetisa sidzingo sakho sekwati Nkulunkulu. Ungabona njani kutsi nguyiphi inkholo lefundzisa liciniso nalemjabulisa mbamba Nkulunkulu? Labanye babhali labadvumile batsi kukholelwa kuNkulunkulu nekutinikela kuye kuyintfo lengakahlakaniphi, futsi kungaba yingoti. Nawukhuluma ngembono walomunye umuntfu lodvumile lokholelwa kutsi Nkulunkulu akekho, magazini i-Maclean’s utsi: “Lemfundziso yebuKhristu yekutsi kunalokunyenti ekuphileni kunaloko lokushiwo bososayensi, naloko labakubonako, labakuvako, nebufakazi lobukhona . . . yenta kuphila kungajabulisi, futsi ibangela kutsi bantfu batsandze budlova.”

YINI LONGAYENTA? Hlolisisa bufakazi bekutsi Nkulunkulu ukhona. (Roma 1:20; Hebheru 3:4) Ungavumi kutsi bantfu bakucedzele umdlandla wekufuna timphendvulo temibuto lebalulekile, njengalena: Kungani silapha? Kukhona yini kuphila ngemuva kwekufa? Kungani kunekuhlupheka lokungaka? Yini lefunwa nguNkulunkulu kimi? Kutfola timphendvulo letenetisako talemibuto kusinyatselo lesibalulekile sekutfola kwenetiseka lokuhlala njalo.

Nanobe kunjalo, akukafaneli uvele ukholelwe tonkhe tintfo labanye labakutjela tona. LiVi laNkulunkulu likukhutsata kutsi usebentise ‘emandla akho ekucabanga’ kute ukwati kuhlolisisa loko lokwemukelekako kuye. (Roma 12:1, 2, NW.) Imetamo yakho itawubusiswa. Nangabe utiniketa sikhatsi sekutadisha liBhayibheli futsi usebentise seluleko salo lesilusito, utawubalekela tinkinga, unciphise kukhatsateka, bese wandzisa injabulo yakho ekuphileni. Lesi setsembiso longasetsemba. Tigidzi tebantfu letinelimuva lelingafanani tiye tazuza ngekufundza liciniso lelimayelana naNkulunkulu kanye netinjongo takhe.

Njengobe uzuza ngekusebentisa seluleko lesihlakaniphile seliBhayibheli, utawutinikela kakhulu kuNkulunkulu. Kungaba njani uvume kutadisha liBhayibheli kanye naboFakazi BaJehova? Nawenta njalo, utawuvumelana nemphostoli Pawula lowabhala: ‘Kuyinzuzo lenkhulu kwesaba Nkulunkulu kanye nekwenetiseka.’—1 Thimothi 6:6.

[Sitfombe ekhasini 8]

Hlolisisa loko lokwemukelekako kuNkulunkulu