Nkulunkulu akakhetsi futsi ufuna kubusisa bonkhe bantfu.

Nkulunkulu wetsembisa umphrofethi Abrahama watsi: “Tive tonkhe temhlaba tiyawubusiswa ngawe.”—Genesisi 12:3.

Yini lesiyifundzako? Nkulunkulu usitsandza kakhulu futsi ufuna kubusisa yonkhe imindeni—emadvodza, bafati, kanye nebantfwana labalalelako.

Nkulunkulu unemusa futsi ubusisa bonkhe labenta imetamo yekufuna kumati.

Nkulunkulu Somandla waniketa umphrofethi Mosi emandla ekwenta timangaliso letinkhulu. Noma kunjalo, Mosi wathantaza watsi: “Ngiyakucela kutsi ungikhombise tindlela takho, kuze wena ngikwati kahle, ngichubeke kuzuza umusa emehlweni akho.” (Eksodusi 33:13) Nkulunkulu wajabula ngesicelo saMosi futsi wambusisa ngekutsi abe nelwati nekucondza tindlela taKhe nebuntfu baKhe. Nasi sibonelo, Mosi wafundza kutsi uMdali ‘unguNkulunkulu lonesihawu nemusa.’—Eksodusi 34:6, 7.

Yini lesiyifundzako? Nkulunkulu ufuna kusibusisa sonkhe—simadvodza, sibafati, noma sibantfwana—kuphela nje nasitikhandla kuze simati kancono. EmiBhalweni Lengcwele, Nkulunkulu usikhombisa indlela lokufanele simkhonte ngayo, futsi uyakulangatelela kusikhombisa umusa kanye nekusibusisa.

Singatijabulela tibusiso taNkulunkulu taphakadze nasifundza ngaJesu, loko lakwenta naloko lakufundzisa.

LiBhayibheli licuketse imininingwane leminyenti ngemphilo yaJesu kanye naloko lakufundzisa. Nkulunkulu wanika Jesu emandla ekwenta timangaliso letinkhulu njengekwelapha labangaboni, labangeva etindlebeni, kanye nalabachwalile. Waze wavusa ngisho nalabafile. Ngekwenta loko, Jesu wakhombisa tibusiso Nkulunkulu latatiletsela bantfu esikhatsini lesitako. Wachaza indlela ngamunye wetfu langatfola ngayo letibusiso nakatsi: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.”—Johane 17:3.

Jesu bekaneluvelo, anelutsandvo futsi anemusa. Emadvodza nebafati, labasha kanye nalabadzala, basabela nakabamema atsi: “Nifundze kimi, ngobe nginemoya lomuhle futsi nginenhlitiyo letfobekile, nitawutfolela imiphefumulo yenu kuphumula.” (Matewu 11:29) Ngalokungafani nalabanye bantfu besikhatsi sakhe, labebaphatsa kabi bantfu besifazane, Jesu yena wabaphatsa ngemusa, ngesizotsa, kanye nangenhlonipho.

Yini lesiyifundzako? Jesu wakhombisa kutsi ubatsandza kakhulu bantfu, futsi wasibekela sibonelo lesihle endleleni lokufanele siphatsane ngayo.

ImiBhalo Lengcwele ifundzisa kutsi “kitsi kunaNkulunkulu munye” nekutsi Jesu Khristu abesitfunywa saNkulunkulu lesitfobekile. (1 Khorinte 8:6) Jesu wakwenta kwacaca kutsi Nkulunkulu mkhulu kunaye nekutsi Nkulunkulu nguye lowamtfumela emhlabeni.—Johane 11:41, 42; 14:28. *