IMPHILO lephilwa namuhla akusiyo leyo Nkulunkulu bekafuna siyiphile. Umhlaba kufanele ngabe ugcwele bantfu labafuna kubuswa nguMdali wetfu, labanelutsandvo lolufana nelwaJehova kanye nalobunye buntfu lobuhle. Bekufanele bahlale ndzawonye ngekuthula njengobe bakhulisa imindeni yabo, bafundza tintfo letinsha, futsi benta umhlaba wonkhe ube lipharadisi.

• “Uvimba acedze timphi kutsi tichubeke emhlabeni wonkhe jikelele.”—Tihlabelelo 46:9.

• “Sefika nesikhatsi lesibekiwe . . . nesekubhubhisa labo labamosha umhlaba.”—Sembulo 11:18.

• “Kute lohlala eSiyoni loyakutsi: ‘Ngiyagula.’”—Isaya 33:24.

• “Labakhetsiwe bami bayawutijabulisa sikhatsi lesidze ngemisebenti yetandla tabo.”—Isaiah 65:22.

Titawugcwaliseka njani letiphrofetho? Nkulunkulu ubeke indvodzana yakhe Jesu, njengeNkhosi yahulumende wasezulwini, lotawubusa emhlabeni. LiBhayibheli liwubita ngekutsi nguMbuso waNkulunkulu. (Danyela 2:44) LiBhayibheli litsi ngaJesu: ‘Nkulunkulu utamnika sihlalo sebukhosi . . . , utawubusa njengeNkhosi.’—Lukha 1:32, 33.

Ngesikhatsi alapha emhlabeni, Jesu wenta timangaliso letinyenti kute akhombise kutsi nasekabusa njengeNkhosi utakwenta kuphila kwebantfu kube ncono kunamanje.

• Welapha konkhe kugula, akhombisa indlela latawuticedza ngayo tonkhe tifo letihlupha bantfu.—Matewu 9:35.

• Wathulisa sivunguvungu, akhombisa kutsi utawubavikela njani bantfu ngekulawula emandla emvelo.—Makho 4:36-39.

• Wondla tinkhulungwane tebantfu, akhombisa kutsi utawutenetisa tidzingo tabo.—Makho 6:41-44.

• Wagucula emanti aba liwayini kulomunye umshado, akhombisa kutsi utawusita bantfu bakujabulele kuphila.—Johane 2:7-11.

Ungakutfola njani lokuphila Nkulunkulu lakufunela bantfu labamtsandzako? Kukhona lokutsite lokufanele ukwente. LiBhayibheli litsi kufanele ufune ‘indlela leya ekuphileni, futsi bambalwa labayitfolako.’—Matewu 7:14.

Iyini indlela leya ekuphileni? Nkulunkulu utsi: “NginguSimakadze Nkulunkulu wenu, longuyena anifundzisa kutsi ngukuphi lokuncono kunako konkhe kini, lonilayela indlela lekufanele nihambe ngayo.” (Isaya 48:17) Kuhamba kulendlela kutawenta kuphila kube ncono kakhulu.

Jesu watsi: “Mine ngiyindlela neliciniso nekuphila.” (Johane 14:6) Nasikukholelwa loko lokwashiwo nguJesu futsi silandzele sibonelo sakhe, singakhona  kusondzela kuNkulunkulu futsi kuphila kwetfu kungaba ncono.

Ungayitfola njani lendlela leya ekuphileni? Tinyenti tinkholo letikhona, kodvwa Jesu wecwayisa: “Akusibo bonkhe labatsi kimi: ‘Nkhosi, Nkhosi,’ labayawungena embusweni welizulu, kodvwa ngulabo labenta intsandvo yaBabe losezulwini.” (Matewu 7:21) Waphindze watsi: “Labo nitawubabona ngetitselo tabo.” (Matewu 7:16) LiBhayibheli lingakusita ukhone kubona inkholo yeliciniso.—Johane 17:17.

Ungahamba njani endleleni leya ekuphileni? Loko kufaka ekhatsi kwati loyo lowapha bantfu kuphila: Ungubani? Ngubani libito lakhe? Ungumuntfu lonjani? Yini lasentela yona? Yini lafuna siyente? *

Nkulunkulu ufuna bantfu bente lokungetulu nje kwekumane basebente, badle, badlale, futsi babe nemindeni. Singamati uMdali wetfu futsi singaba bangani bakhe. Singamkhombisa kutsi siyamtsandza ngekwenta intsandvo yakhe. Jesu watsi: “Kukwati wena lokuphela kwaNkulunkulu weliciniso, kuholela ekuphileni lokuphakadze.”—Johane 17:3.

Nasesati kutsi Nkulunkulu weliciniso ufuna senteni kungase kudzingeke sente lushintjo ekuphileni kwetfu. Loko kungabonakala kumatima. Kodvwa ecinisweni, kufanana nekutsatsa luhambo lolujabulisako, loludzinga kutsi umane nje utsatse sinyatselo sekucala. Kuze bakusite utfole timphendvulo temibuto yakho ngaNkulunkulu, BoFakazi BaJehova bangafundza nawe liBhayibheli mahhala ngesikhatsi nasendzaweni lelungela wena. Ungachumana natsi ngekusebentisa i-website yetfu letsi www.isa4310.com.