Bijbel e taki dati ala sma na sondusma. A firi di wi abi fu du sondu, na wan sani di wi kisi fu a fosi man Adam. Dati meki son leisi wi e du sani di no bun èn kande wi e sari bakaten. Yesus Krestes, a Manpikin fu Gado, dede gi wi èn na so a pai gi den sondu fu wi. A frulusu-ofrandi fu en meki taki wi kan kisi pardon. Na ofrandi dati na wan kado fu Gado.—Leisi Romesma 3:23, 24.

Son sma du bigi sondu èn den e aksi densrefi efu Gado o gi den pardon. A moi fu si taki Gado Wortu e taki: „A brudu fu en Manpikin Yesus, e krin wi fu ala sondu” (1 Yohanes 1:7). Te wi abi trutru berow, dan Yehovah de klariklari fu gi wi pardon, srefi gi seryusu sondu.—Leisi Yesaya 1:18.

Efu wi wani taki Yehovah Gado gi wi pardon, dan wi musu kon sabi en. Iya, wi musu kon frustan fa a e denki, èn wi musu frustan sosrefi den rai di a e gi, nanga den wèt fu en (Yohanes 17:3). Te sma sori berow fu den ogri di den du èn te den e meki muiti fu kenki, dan Yehovah de klariklari fu gi den pardon.—Leisi Tori fu apostel 3:19.

A no muilek fu tron wan sma di Gado feni bun. Yehovah e frustan den swakifasi fu wi. A abi sari-ati nanga switifasi. Now di yu kon sabi taki a abi bun-ati, dan yu no wani kon sabi san yu musu du fu meki a feni yu bun?—Leisi Psalm 103:13, 14.