Soleki fa a prenki na a reti-anusei e sori, dan furu sma e denki taki na tapu a Krutudei, milyardmilyard sma o kon na fesi a kownusturu fu Gado fu kisi krutu fu den sani di den ben du fosi. Den e denki taki son sma o kisi libi na ini hemel èn taki trawan o pina na ini wan hel. Ma Bijbel e sori taki a Krutudei na fu frulusu sma fu ala kruktudu (Psalm 96:13). Gado poti Yesus leki Krutuman di o sorgu taki retidu o kon baka na grontapu.​—Leisi Yesaya 11:1-5; Tori fu den apostel 17:31.

Di a fosi man Adam trangayesi Gado fu espresi, a meki taki ala den bakapikin fu en kisi sondu, taki den nyan pina èn taki den dede te fu kaba (Romesma 5:12). Fu meki sani kon reti, Yesus o gi milyardmilyard sma di dede wan opobaka, noso a o meki den kon na libi baka. A buku Openbaring e sori taki disi o pasa te Krestes Yesus o tiri dusun yari.​—Leisi Openbaring 20:4, 11, 12.

Den sma di kisi wan opobaka, no o kisi krutu fu den sani di den du fosi den dede, ma na ini Openbaring kapitel 20 skrifi taki den o kisi krutu fu den sani di den du te den „bukulolo” o opo (Romesma 6:7). Den sma di o kon na libi baka èn di o kisi na okasi fu leri sabi Gado, na ’den bun sma èn den sma di no bun’, na so na apostel Paulus e taki.​—Leisi Tori fu den apostel 24:15.

Den sma di dede fosi den ben kan leri sabi Yehovah Gado èn dini en, o abi na okasi fu kenki den libi èn fu du bun. Efu den du bun, dan disi o sori taki ’den opo baka fu kisi libi’. Ma sonwan fu den sma di o kisi wan opobaka, no sa wani leri sabi Yehovah. Disi o sori taki na opobaka fu den na wan ’opobaka fu kisi krutu’.​—Leisi Yohanes 5:28, 29; Yesaya 26:10; 65:20.

Na a kaba fu a Krutudei di o de dusun yari langa, Yehovah o meki taki libisma di e gi yesi na en, kon de sondro sondu, neleki fa a ben de na a bigin (1 Korentesma 15:24-28). Dati na trutru wan moi howpu gi ala den sma di e gi yesi! Te fu kaba, Gado o lusu Satan Didibri komoto na a dipi peti pe a ben de dusun yari langa. Satan o pruberi baka fu meki sma trangayesi Yehovah, ma den sma di o kakafutu gi Satan o libi fu têgo na grontapu.​—Leisi Yesaya 25:8; Openbaring 20:1, 7-9.

Te Bijbel e gebroiki a wortu „krutudei”, dan a e sori tu taki wan sani o pasa di o tyari wan kaba kon na a grontapu disi. A krutudei disi o kon wantronso, neleki a Frudu na ini a ten fu Noa, di ben wai ala den ogri sma fu a ten dati puru. Koloku taki te „den ogri sma” o kisi pori, dan disi o tyari wan nyun libimakandra kon èn „na drape retidu o de”.​—Leisi 2 Petrus 3:6, 7, 13.