Rampu no o pasa moro!
FA YU ben o feni en te wan sma taigi yu taki heri esi rampu no o pasa moro? Kande yu ben o taigi a sma taki dati no kan fu di rampu e pasa ala ten, èn taki na so a libi de. Noso kande yu ben o denki taki a sma e hori ensrefi na spotu.
Aladi a gersi leki rampu o pasa ala ten, toku wi kan abi a howpu taki wan kenki o kon. Ma a no libisma o tyari a kenki disi kon. Libisma no man frustan fa a du kon taki den sani disi e pasa èn fu san ede den e pasa. Boiti dati, den no man basi den sani dati, èn den no man tyari wan kenki kon. Kownu Salomo fu owruten Israel di ben abi furu koni èn di ben man si sani krin, ben skrifi: „Libisma no man kon sabi finifini san Gado du na grontapu. Awinsi omeni muiti sma e du fu kon sabi san a du, toku den no man kon sabi dati. Srefi efu den ben o taki dati den koni nofo fu kon sabi san Gado du, toku den no ben o man kon sabi dati.”—Preikiman 8:17.
Efu libisma no man sorgu taki rampu no pasa moro, dan suma man du dati? Bijbel e taki dati a Mekiman fu wi man tyari a kenki disi kon. Na en seti den sani na grontapu, soleki a watra di e opo go na loktu èn e saka kon baka na grontapu (Preikiman 1:7). Heri tra fasi leki libisma, Gado abi krakti pasa marki. A profeiti Yeremia e sori taki a sani disi tru te a e taki: „Mi Moro Hei Masra Yehovah, nanga yu krakti èn nanga yu anu yu meki hemel nanga grontapu. Nowan sani bigi so, taki yu no man du en” (Yeremia 32:17). Fu di Gado meki grontapu nanga ala sani na tapu, meki a sabi fa fu seti sani so taki sma kan libi na grontapu sondro fu frede taki ogri o miti den.—Psalm 37:11; 115:16.
Ma fa Gado o tyari wan kenki kon? Kande yu e memre ete taki a di fu tu artikel ben taki dati den furu ogri di e pasa na grontapu na ini a ten disi, na wan „marki” di e sori taki „a kaba fu a grontapu disi de krosibei”. Yesus ben taki: „Te unu e si den sani disi e pasa, dan un musu sabi taki a Kownukondre fu Gado de krosibei” (Mateyus 24:3; Lukas 21:31). A Kownukondre fu Gado, noso a hemel tirimakti fu en, o tyari bigi kenki kon na grontapu, èn a o basi srefi den sani soleki a winti nanga a watra. Aladi Yehovah Gado abi a makti fu du den sani disi, toku a gi en Manpikin a frantwortu fu du dati. A profeiti Danièl ben taki fu a manpikin disi: „A kisi makti fu tiri. A kisi glori èn a kisi wan kownukondre tu, so taki ala den pipel, nanga den sma di de fu den difrenti kondre èn di e taki difrenti tongo, ben kan dini en.”—Danièl 7:14.
Gado Manpikin, Yesus Krestes, kisi a makti fu tyari kenki kon so taki grontapu o de wan switi presi fu libi. Tu dusun yari pasa, di Yesus ben de na grontapu, a ben sori taki a abi a makti fu basi a winti, a watra, nanga tra sani. Wan leisi di en nanga den disipel fu en ben de na ini wan boto na a Se fu Galilea, dan „wán kefalek bigi winti bigin wai èn den skwala ben naki kon na ini a boto, so taki a boto ben e kon furu nanga watra”. Den disipel fu en ben e frede srefisrefi. Fu di den ben denki taki den ben o dede, meki den suku yepi na Yesus. San Yesus du? Ala san a du, na taki „a bari a winti èn a taigi a se: ’Tapu! Tan tiri!’ Dan a winti saka èn ala sani kon tiri.” Den disipel fu en no ben man bribi san den si èn den aksi: „Suma na a sma disi? Srefi a winti nanga a se e du san a e taki.”—Markus 4:37-41.
Sensi a ten dati, Yesus opo go na hemel èn a kisi moro bigi makti. Leki Kownu fu Gado Kownukondre, a abi a frantwortu nanga a makti fu tyari ala den kenki kon di de fanowdu so taki sma kan libi sondro fu frede taki ogri o miti den.
Ma soleki fa wi si kaba, dan furu fu den problema nanga den rampu di e pasa, na sani di libisma du èn den sani disi e kon moro ogri fu di sma e suku den eigi bun èn fu di den gridi. San a Kownukondre o du nanga den sma di e tan du den sani dati èn di e weigri fu kenki? Bijbel e taki dati Masra Yesus e „komoto na hemel makandra nanga den tranga engel fu en na ini wan bigi faya. Na a ten dati, a o puru atibron na tapu den sma di no sabi Gado èn na tapu den sma di no e gi yesi na a bun nyunsu di e taki fu wi Masra Yesus.” Iya, a o „pori den wan di e pori grontapu”.—2 Tesalonikasma 1:7, 8; Openbaring 11:18.
Baka dati, a „Kownu fu den kownu”, Yesus Krestes, o basi a winti, a watra, nanga tra sani na grontapu (Openbaring 19:16). A o sorgu taki rampu no o miti den borgu fu a Kownukondre moro. A o gebroiki a makti fu en fu sorgu taki a weer nanga den pisi ten fu a yari e tyari wini kon gi sma. Leki bakapisi fu dati a o man du san Yehovah Gado pramisi a pipel fu en langa ten kaba: „Misrefi o meki alen fadon na a yoisti ten, a gron o gi nyanyan, èn den bon o gi froktu” (Lefitikus 26:4). Sma o man bow oso, sondro fu frede taki den o lasi den oso te wan rampu e pasa. Bijbel e taki: „Den o bow oso èn den srefi o tan na ini. Den o prani droifidyari èn den srefi o nyan fu en.”—Yesaya 65:21.
San yu musu du?
A no de fu taki dati neleki furu tra sma, yu ben o wani libi na ini wan grontapu pe rampu no e pasa moro. Ma san yu musu du fu man de drape? „Den sma di no sabi Gado” èn „den sma di no e gi yesi na a bun nyunsu” no o libi na ini wan grontapu pe rampu no o pasa moro. Dati meki a de krin taki sma musu kon leri sabi Gado now èn den musu horibaka gi den sani di a seti fu tiri grontapu. Gado wani taki wi kon leri sabi en èn taki wi gi yesi na a bun nyunsu fu a Kownukondre di a seti nanga yepi fu en Manpikin.
A moro bun fasi fa fu du disi, na fu studeri Bijbel finifini. Bijbel abi rai na ini di o yepi yu fu doro den markitiki fu libi na ini wan grontapu di Gado Kownukondre sa tiri èn pe ogri no sa de moro. Fu san ede yu no e aksi Yehovah Kotoigi fu yepi yu fu kon sabi san Bijbel e leri? Den de klariklari fu yepi yu nanga dati. Ma yu kan sabi taki te yu e meki muiti fu kon sabi Gado èn te yu e gi yesi na a bun nyunsu, dan yu o ondrofeni a sani disi di skrifi na Odo 1:33: „Sani o waka bun gi a sma di e gi yesi na mi èn a no abi fu frede taki ogri o miti en.”
