1, 2. Fu san ede Romesma kapitel 8 prenspari gi salfu Kresten?

IBRI yari wi e memre a dede fu Yesus. Te a ten dati e doro, dan kande yu e leisi Romesma 8:15-17. A prenspari pisi dati e sori fa Kresten du sabi taki den na salfuwan. Den sabi dati fu di a santa yeye fu Gado e sori den krin taki den na pikin fu Gado. A fosi vers fu a kapitel dati e taki fu „den sma di de wán nanga Krestes Yesus”. Ma dati wani taki dati kapitel 8 abi fu du soso nanga salfuwan? Noso a abi fu du tu nanga Kresten di abi a howpu fu libi na grontapu?

² Na a fosi presi, a kapitel disi abi fu du nanga salfu Kresten. Den e kisi „a santa yeye” leki sma di e ’wakti te Gado o teki den leki en manpikin èn te a o gebroiki a lusu-paiman fu fri den fu a skin fu den’ (Rom. 8:23). Iya, den o tron manpikin fu Gado na hemel. Fa a sani dati kan? Di den tron dopu Kresten, Gado gebroiki a lusu-paiman fu gi den pardon fu den sondu èn fu kan si den leki reti-ati sma.​—Rom. 3:23-26; 4:25; 8:30.

3. Fu san ede wi kan taki dati Romesma kapitel 8 abi fu du tu nanga den sma di abi a howpu fu libi na grontapu?

³ Ma Romesma kapitel 8 prenspari tu gi den wan di abi a howpu  fu libi na grontapu fu di Gado e si den leki reti-ati sma tu. Wi kan si dati te wi e luku san Paulus ben skrifi na ini a brifi disi. Na ini kapitel 4 a ben taki fu Abraham. A man disi di ben abi bribi, ben libi fosi Yehovah ben gi Israel a Wet èn langa ten fosi Yesus dede gi den sondu fu wi. Ma toku Yehovah ben taki fu a tranga bribi fu Abraham èn a ben si en leki wan reti-ati sma. (Leisi Romesma 4:20-22.) Na ini a ten disi, Yehovah kan si Kresten di abi bribi èn di abi a howpu fu libi fu têgo na grontapu leki reti-ati sma tu. Dati meki den kan kisi wini tu fu a rai di Gado e gi reti-ati sma na ini Romesma kapitel 8.

4. San wi musu aksi wisrefi te wi e luku Romesma 8:21?

⁴ Romesma 8:21 e gi wi a dyaranti taki a nyun grontapu o kon seiker. A vers disi e pramisi wi taki ’den sani di Gado meki, o kon fri fu wan skin di e dede. Na so den o kon fri na wan tumusi moi fasi leki pikin fu Gado.’ Ma wi musu aksi wisrefi efu wi o kisi a grani fu go na ini a nyun grontapu. Yu abi a frutrow taki yu o kisi a grani dati? Romesma kapitel 8 abi rai di kan yepi yu fu kisi a grani dati.

5. Fu sortu seryusu tori Paulus ben taki na Romesma 8:4-13?

⁵ Leisi Romesma 8:4-13. Romesma kapitel 8 e taki fu den wan di e „du san a skin wani” èn fu den wan di e „du san a yeye wani”. Son sma ben kan denki taki Paulus ben taki fu a difrenti na mindri den wan di no de na ini a tru anbegi èn den wan di de na ini, noso fu den wan di no de Kresten èn den wan di de Kresten. Ma Paulus ben skrifi a brifi disi „gi ala den lobiwan fu Gado di de na Rome, den wan di a kari fu de santa sma” (Rom. 1:7). Sobun, Paulus ben sori taki Kresten di e du san a skin wani de tra fasi leki Kresten di e du san a yeye wani. Fa so?

6, 7. (a) Na sortu fasi Bijbel e gebroiki a wortu „skin”? (b) Fa Paulus gebroiki a wortu „skin” na Romesma 8:4-13?

⁶ Fu san Paulus ben taki di a gebroiki a wortu „skin”? Bijbel e gebroiki a wortu disi na difrenti fasi. Son leisi a wortu abi fu du nanga a skin fu wi (Rom. 2:28; 1 Kor. 15:39, 50). Ma a kan abi fu du tu nanga famiri. Fu eksempre, Yuda ben taigi den brada fu  en a sani disi fu Yosef: „Meki wi no du ogri nanga en. Te yu luku en bun, dan en na wi brada, wi eigi brudu [noso skin].”​—Gen. 37:27, futuwortu.

⁷ Ma den sani di Paulus skrifi na ini kapitel 7 e sori wi san a ben wani taki nanga a wortu „skin” na ini Romesma 8:4-13. A ben taki dati a libi di sma ben ’libi soleki fa den skin wani’ abi fu du nanga den ’sondu firi na ini den skin’ (Rom. 7:5). A sani disi e yepi wi fu frustan san den wortu „den sma di e du san a skin wani” wani taki. Paulus ben taki dati den sma disi „e prakseri soso den sani di abi fu du nanga a skin”. A ben e taki fu sondusma di e meki den firi fu den basi den. Nofo tron den sma disi e gi densrefi abra na den lostu nanga den firi fu den, awansi na seksfiri noso tra firi.

8. Fu san ede a ben fiti taki Paulus warskow srefi den salfu Kresten fu no „du san a skin wani”?

⁸ Ma fu san ede Paulus ben warskow den salfu Kresten fu no „du san a skin wani”? Fa a de nanga den Kresten na ini a ten disi di Gado teki leki en mati èn di a e si leki reti-ati sma? Den musu gi yesi tu na a warskow fu Paulus? Iya, fu di ibri Kresten kan meki a sondu skin fu en basi en. Fu eksempre, Paulus ben skrifi dati sonwan fu den brada na ini Rome ben de srafu „fu den eigi takru lostu”. Kande den ben abi tranga seksfiri, noso kande den ben gridi gi nyanyan, dringi, noso tra sani. Wan tu fu den ben e „kori den ati fu den wan di no e du ogri” (Rom. 16:17, 18; Fil. 3:18, 19; Yud. 4, 8, 12). Memre tu, taki wan pisi ten, wan brada na ini Korente ben e „libi nanga a wefi fu en papa” (1 Kor. 5:1). Dati meki wi kan frustan fu san ede Gado ben meki Paulus warskow Kresten fu no „du san a skin wani”.​—Rom. 8:5, 6.

9. San a warskow di Paulus e gi na Romesma 8:6 no wani taki?

⁹ Na ini a ten disi, a warskow dati prenspari ete. A kan taki wan Kresten di dini Gado omeni yari kaba e bigin prakseri den sani di abi fu du nanga a skin. Disi no wani taki dati noiti wan Kresten mag prakseri nyanyan, en wroko, prisiriten, noso taki a no mag abi lobi firi gi wan sma. Den sani disi na aladei sani gi furu fu den anbegiman fu Yehovah. Yesus srefi ben e nyan èn a ben sorgu taki trawan ben abi nyanyan tu. A ben sabi taki a bun fu meki prisiri te dati de  fanowdu. Boiti dati Paulus ben skrifi taki a fiti taki trowpatna abi lobi firi gi makandra èn taki den abi seks nanga makandra.

10. San den wortu „prakseri soso den sani”, na Romesma 8:5, 6, wani taki?

¹⁰ San Paulus ben wani taki nanga den wortu ’sma di e poti prakseri na sani di a skin wani’? A Griki wortu di Paulus gebroiki abi fu du nanga „wan sma di e poti furu prakseri na wan sani èn di e suku wan fasi nomonomo fu du a sani dati”. Den wan di e du san a skin wani e gi pasi taki den sondu firi fu den e basi den. Wan sabiman e taki dati den wortu „prakseri soso den sani”, na Romesma 8:5, e sori taki den sani di a skin wani prenspari srefisrefi gi wan sma, taki ala ten a e taki fu den, èn taki a lobi du den.

11. Gi sortu sani wi ben kan gebroiki furu fu wi ten?

¹¹ Den Kresten na ini Rome ben musu ondrosuku san ben de a moro prenspari sani na ini den libi. A kan taki den ben e poti tumusi furu prakseri na „den sani di abi fu du nanga a skin”. Wi musu ondrosuku wisrefi tu. Aksi yusrefi: ’San na den moro prenspari sani na ini mi libi èn fu sortu sani mi lobi taki? Gi sortu sani mi e gebroiki furu fu mi ten ibri dei?’ Kande son sma e kon si taki den e gebroiki furu fu den ten fu moi den oso, fu bai nyun krosi, fu du bisnis, fu seti sani fu go nanga fakansi, èn fu du tra sortu sani. Den sani disi a no fowtu sani. Na aladei sani. Fu eksempre, wan leisi Yesus ben meki win, èn Paulus ben taigi Timoteyus fu dringi „pikinso win” (1 Tim. 5:23; Yoh. 2:3-11). Ma fa Yesus nanga Paulus ben e si win? A ben de a moro prenspari sani gi den, èn den ben taki fu en ala yuru? Nôno. Fa a de nanga wi? San na a moro prenspari sani na ini wi libi?

12, 13. Fu san ede wi musu luku bun sortu sani wi e prakseri?

¹² A prenspari taki wi ondrosuku wisrefi. Fu san ede? Paulus ben skrifi: „Te wan sma e poti prakseri na sani di a skin wani, dan a bakapisi fu dati na dede” (Rom. 8:6). Dati na wan seryusu sani. Nownow kaba wi kan lasi a matifasi di wi abi nanga Yehovah, èn na ini a ten di e kon wi kan lasi wi libi. Ma toku Paulus no ben taki dati wan sma di e „poti prakseri na sani di a skin wani” musu dede nomonomo. So wan sma man kenki. Prakseri a man fu Korente di ben du san „a skin” wani èn di den ben musu puru fu a gemeente. A man disi kenki. A tapu fu du sani di a skin wani èn a bigin libi baka soleki fa Gado wani.​—2 Kor. 2:6-8.

¹³ Efu a man dati ben man kenki, dan Kresten na ini a ten disi man kenki tu, spesrutu efu den sani di den du no ogri leki den wan di a man fu Korente du. Fu di Paulus ben warskow a gemeente fu no „poti prakseri na sani di a skin wani”, meki Kresten brada nanga sisa musu du tranga muiti fu tyari den kenki kon di de fanowdu!

14, 15. (a) Na sortu sani wi musu poti wi prakseri soleki fa Paulus taki? (b) San den wortu „poti prakseri na sani di abi fu du nanga a yeye”, no wani taki?

¹⁴ Baka di na apostel warskow wi fu no „poti prakseri na sani di a skin wani”, a e gi wi a rai disi: „Te wan sma e poti prakseri na sani di abi fu du nanga a yeye, dan a bakapisi fu dati na libi nanga freide.” A no de fu taki dati libi nanga freide na moi blesi. Ma san wi musu du fu kisi den blesi dati?

¹⁵ „Te wan sma e poti prakseri na sani di abi fu du nanga a yeye”, dan dati no wani taki dati a musu prakseri noso taki soso fu Bijbel èn fu Gado. Memre taki Paulus nanga tra fosi Kresten di ben e libi na wan fasi di Gado feni bun, ben du den aladei sani di sma gwenti du. Den ben e nyan èn  den ben e dringi. Furu fu den ben trow, den ben abi wan osofamiri, èn den ben e du wan wroko fu sorgu densrefi.​—Mark. 6:3; 1 Tes. 2:9.

16. A tru taki Paulus ben du furu fu den sani di sma ben gwenti du, ma san ben moro prenspari gi en?

¹⁶ Ma den anbegiman fu Gado no ben gi pasi taki aladei sani tron den moro prenspari sani na ini den libi. Bijbel e sori wi taki Paulus ben meki tenti fu man sorgu ensrefi. Ma Bijbel e sori wi tu san ben de a moro prenspari sani gi Paulus: A ben gwenti teki prati na a preikiwroko èn a ben e gi leri na sma. (Leisi Tori fu den apostel 18:2-4; 20:20, 21, 34, 35.) A ben gi den brada nanga sisa na Rome deki-ati fu poti prakseri na den sani dati. Iya, na anbegi fu Paulus ben de a moro prenspari sani gi en. Den brada nanga sisa fu Rome ben musu teki na eksempre fu en èn wi musu du dati tu.​—Rom. 15:15, 16.

17. Fa wi libi o de te wi e „poti prakseri na sani di abi fu du nanga a yeye”?

¹⁷ San o de a bakapisi te na anbegi fu Yehovah na a moro prenspari sani na ini wi libi? Romesma 8:6 e taki: „Te wan sma e poti prakseri na sani di abi fu du nanga a yeye, dan a bakapisi fu dati na libi nanga freide.” Dati wani taki dati wi o meki santa yeye tiri a denki fu wi, so taki wi kan abi a srefi denki leki Gado. Wi kan abi a frutrow taki te wi e meki „a yeye” tiri wi, dan wi o de koloku nownow kaba. Te fu kaba wi o kisi têgo libi, awansi dati o de na hemel noso na grontapu.

18. Te wi „e poti prakseri na sani di abi fu du nanga a yeye”, dan fa dati e tyari freide kon?

¹⁸ Soleki fa wi si, dan Paulus ben taki dati „te wan sma e poti prakseri na sani di abi fu du nanga a yeye, dan a bakapisi fu dati na . . . freide”. Meki wi go luku san dati wani taki. Furu sma e broko den ede nanga sani. Den e angri fu kon abi wan korostu firi, ma wi abi dati kaba. Dati meki wi e meki muiti fu abi freide nanga den sma fu wi osofamiri èn nanga den brada nanga sisa na ini a gemeente. Wi e hori na prakseri taki den brada nanga sisa fu wi na sondusma. Dati meki ten na ten problema o de, ma te dati pasa, dan wi e du san Yesus leri wi. A taki: „Go meki en bun nanga yu brada” (Mat. 5:24). A o moro makriki fu du disi te wi e hori na prakseri taki wi brada nanga sisa e anbegi „a Gado di e gi freide” tu.​—Rom. 15:33; 16:20.

19. Sortu freide wi o abi te wi e poti prakseri na sani di abi fu du nanga a yeye?

¹⁹ Ma wan tra sortu freide de di prenspari srefisrefi. Te wi „e poti prakseri na sani di abi fu du nanga a yeye”, dan wi o abi freide nanga wi Mekiman. Yesaya ben skrifi wan sani di kon tru na ini a ten fu en, ma a sani dati e kon tru na wan moro prenspari fasi na ini a ten disi. A ben skrifi: „Yu [Yehovah] o meki sani waka bun gi den wan di abi wan bun denki, bika na yu den e frutrow.”​—Yes. 26:3; leisi Romesma 5:1.

20. Fu san ede yu breiti nanga a rai na ini Romesma kapitel 8?

²⁰ Dati meki wi alamala musu breiti nanga a rai na ini Romesma kapitel 8, awansi wi na salfuwan noso sma di abi a howpu fu libi na grontapu. Wi breiti srefisrefi taki wi e kisi a rai fu no meki den sani di „a skin” wani tron den moro prenspari sani na ini wi libi. Wi e frustan tu fu san ede a bun fu hori a rai disi na prakseri: „Te wan sma e poti prakseri na sani di abi fu du nanga a yeye, dan a bakapisi fu dati na libi nanga freide.” Te wi e du dati, dan wi o kisi têgo blesi. Dati meki Paulus skrifi: „A pai fu sondu na dede, ma a kado di Gado e gi sma na têgo libi nanga yepi fu Krestes Yesus wi Masra.”​—Rom. 6:23.