Yob 2:1-13
2 Bakaten den manpkin fu a tru Gado* Yehovah kon na en fesi. Satan ben kon na den mindri tu na fesi Yehovah.
2 Ne Yehovah aksi Satan: „Pe yu kmoto?” Dan Satan piki Yehovah: „Mi ben e koiri na grontapu èn mi ben e waka lontu drape e luku sani.”
3 Dan Yehovah taigi Satan: „Yu poti prakseri* na mi futuboi Yob? Nowan sma na grontapu de leki en. A de wan bun man di lobi retidu,* a abi bigi lespeki gi Gado èn a no lobi ogri srefsrefi. Te now ete a e dini mi nanga en heri ati, ma tòg yu wani taki mi pori en libi* fu soso.”
4 Ma Satan taigi Yehovah: „Te wan sma de fu dede, a o gi ala san a abi fu man tan na libi.
5 Langa yu anu èn du ogri nanga Yob srefi. Meki a firi en na en skin èn te na ini en bonyo, dan yu o si efu a no o fluku yu leti na ini yu fesi.”
6 Dati meki Yehovah taigi Satan: „A bun. Yu kan du nanga en san yu wani. Ma yu no mag kiri en!”
7 Baka dati Satan kmoto na fesi Yehovah. Dan a meki Yob kisi wan takru siki. Fu en ede te na en ondrofutu Yob ben lai butsweri* di ben hati en.
8 Dati meki a go sdon na ini asisi èn a ben e krabu en skin nanga wan pisi broko prapi.
9 Bakaten en frow taigi en: „Te now ete yu e tan dini Gado? Fluku Gado, dan yu dede!”
10 Ma Yob taigi en: „Yu e taki leki wan uma di no abi ferstan. Na soso a bun fu a tru Gado wi musu teki? Wi no musu teki na ogri tu?” Aladi den sani disi miti Yob, tòg a no taki nowan sani di meki a sondu.
11 Ne dri mati* fu Yob kon yere fu ala den ogri di miti en. Dan den meki mofo fu go na en. Den man disi ben de a Teimansma Elifas, a Suwasma Bildad nanga a Namasma Sofar. Sobun, den kon makandra, dan den go na en fu krei nowtu nanga en èn fu trowstu en.
12 Di den ben de fara ete den si wan sma, ma den no ben sabi taki na Yob. Ma di den si taki na Yob, den bari krei èn ibriwan fu den priti en krosi. Dan den trowe finfini doti go na loktu èn na tapu den ede.
13 Ne den sdon nanga en na tapu a gron seibi dei nanga seibi neti. Nowan fu den taigi Yob wan sani, fu di den si taki a ben e pina trutru.
Futuwortu
^ Na ini Hebrewtongo den e kari den engel „manpkin fu Gado”.
^ Hebrewtongo: „Yu ati poti prakseri”.
^ Noso: „Sma no man feni fowtu na en tapu”.
^ Hebrewtongo: „swari en”.
^ Noso: „takru soro”.
^ Noso: „sma di Yob ben sabi”.
