Gi den Romesma 12:1-21
12 Fu dati ede, brada, fu di Gado abi sari-ati, meki mi e begi unu fu gi un skin na Gado leki wan srakti-ofrandi di e libi, di de santa èn di Gado feni bun. Na so fasi unu o gebroiki un frustan te unu e du santa wroko.
2 No libi moro leki den sma fu a grontapu disi, ma kenki un denki, so taki unu kan kenki un libi. Dan unu o sabi san na a wani fu Gado di bun, di e gi en prisiri, èn di no e mankeri noti.
3 Fu di Gado sori mi bun-ati, meki mi e taigi un alamala drape fu no denki moro fu unsrefi leki san de fanowdu. Ma ibriwan fu unu musu tyari ensrefi na wan fasi di e sori taki a de nanga krin frustan èn taki a abi a bribi di Gado gi en.
4 Wi abi wán skin di abi furu pisi, ma den pisi fu a skin no e du a srefi wroko.
5 Na so wi di de wán nanga Krestes na wán skin tu aladi wi de nanga furu sma èn wi leki pisi fu a skin abi makandra fanowdu.
6 Fu di Gado abi bun-ati, meki a gi ibriwan fu wi difrenti koni. Fu dati ede, efu wi musu taki profeititori, dan meki wi taki profeititori nanga yepi fu a bribi di a gi wi.
7 Efu wi musu du wan diniwroko, dan meki wi tan du a diniwroko disi. Efu wan sma e gi leri, dan meki a tan gi leri.
8 Efu wan sma e frumane trawan, dan meki a tan frumane trawan. Efu wan sma e prati sani nanga trawan, dan meki a du dati nanga en heri ati. Efu wan sma e teki fesi, dan meki a tan du disi fayafaya. Efu wan sma abi sari-ati gi trawan, dan meki a tan du disi nanga prisiri.
9 Lobi trawan sondro fu hoigri. Tegu gi ogri, ma tan du bun.
10 Un musu lobi makandra trutru, iya, lobi makandra leki brada. De a fosiwan fu sori trawan lespeki.
11 Un musu wroko tranga, un no musu lesi. De fayafaya fu di unu abi a santa yeye. Dini Yehovah leki srafu.
12 Prisiri nanga a howpu di unu abi. Horidoro te unu de na ini banawtu. Tan begi.
13 Gi den santawan san den abi fanowdu. Abi a gwenti fu gi sma wan switikon.
14 Tan blesi den sma di e frufolgu unu. Blesi sma, no fluku den.
15 Prisiri nanga sma di e prisiri. Krei nanga sma di e krei.
16 Si trawan leki fa yu e si yusrefi. No kisi bigifasi, ma abi sakafasi. No prakseri fu unsrefi taki unu koni.
17 Te wan sma du unu wan ogri, un no musu du a sma dati ogri baka. Pruberi fu du sani di ala sma feni bun.
18 Du ala san yu man fu libi bun nanga ala sma.
19 Lobiwan, no pai wan sma gi na ogri di a du nanga yu, ma libi en meki Gado puru atibron na en tapu, bika Gado Buku taki: „’Na mi o puru atibron na den tapu. Mi o pai den baka gi den ogri di den du’, na so Yehovah taki.”
20 Ma „efu angri e kiri yu feanti, gi en nyanyan. Efu watra e kiri en, gi en wan sani fu dringi, bika te yu e du den sani disi, dan dati o safu en ati. A o de neleki yu poti wan ipi faya krofaya na tapu en ede”.
21 No meki ogri wini yu, ma tan du bun fu kan wini na ogri.
