Na ini furu kondre lanti poti wet taki sma no mag kon krosibei fu trawan èn taki furu sma no mag kon na makandra. Yehovah Kotoigi e gi yesi na den wet disi èn dati meki den suku tra fasi fu hori konmakandra na wan veilig fasi. Den e gebroiki videoconferencing app tapu Internet pe sma kan si makandra èn taki nanga makandra, soleki Zoom. Nanga na app disi den e hori konmakandra.

 Fu sorgu taki den konmakandra e hori ibri wiki èn taki ala sani veilig, a Tiri Skin gi primisi fu gebroiki friwani bijdrage fu bai den Zoom account gi den gemeente. Disi ben de wan bigi yepi gi furu gemeente di no ben o man pai gi wan Zoom account di e kostu 15 te go miti 20 Amerkan dala noso moro furu srefi. Fosi den gemeente disi ben e gebroiki den gratis Zoom app pe furu sma no man log in èn di no veilig ala ten. Now ala den gemeente di e gebroiki a Zoom account fu na organisâsi, kan seti en na wan makelek fasi di veilig èn moro furu sma kan log in tapu den konmakandra. Teleki now, moro leki 65.000 gemeente na ini moro leki 170 kondre e gebroiki den Zoom account fu na organisâsi.

 Gemeente Kairagi na ini Manado, na Noord-Sulawesi na Indonesia, ben e gebroiki wan gratis app fu hori konmakandra. Ma now den e gebroiki a Zoom account fu na organisâsi. Brada  Hadi Santoso e fruteri: „Srefi brada nanga sisa di no man gebroiki telefon noso tablet so bun, e kisi furu wini fu den konmakandra. Moro furu disi e kon fu di den no abi fu log in omeni leisi tapu wán konmakandra.”

 Lester Jijón, Jr, wan owruman na ini Gemeente Guayacanes Oeste na ini Guayaquil na Ekwador, e fruteri: „Gi furu brada nanga sisa a ben o diri tumusi fu pai gi a Zoom. Sobun, furu gemeente no ben o man pai gi wan Zoom account pe a heri gemeente kan log in gi konmakandra. Ma fu di wi abi a Zoom account fu na organisâsi, meki wi kan gi tra sma wan kari gi den konmakandra sondro fu frede taki wi o abi tumusi furu sma tapu a Zoom.”

 Johnson Mwanza, wan owruman na ini Gemeente Ngwerere-noord na ini Lusaka na Sambia, e skrifi: „Furu tron, brada nanga sisa e taki dati a Zoom konmakandra fu na organisâsi e meki den firi a matifasi na mindri den leki brada nanga sisa. Ma boiti dati, a e meki den firi taki Yehovah lobi den èn taki a e sorgu gi den.”

 Na organisâsi gebroiki moni di den ben poti na wan sei te rampu de, fu pai gi den Zoom disi. Den moni disi na friwani bijdrage di wi kisi fu horibaka gi a wroko di e du na heri grontapu. Furu sma e gi den bijdrage disi nanga yepi fu donate.isa4310.com. Grantangi gi den furu bijdrage di unu e gi. Den bijdrage disi e yepi tu fu tapu den tra nowtu di de na heri grontapu.—2 Korentesma 8:14.