13 SHKURT 2024
RUSI

Përqendrohen te privilegji që kanë për t’i shërbyer Jehovait

LUAJ

Së shpejti, Gjykata Krahinore e Vizelkovskit në Territorin e Krasnodarit do të shpallë vendimin për çështjen e vëllezërve Jevgeni Boçko, Vladimir Kolesnikov, Aleksei Shubnikov, Vitali Ushakov dhe Valeri Veçkajev. Prokuroria nuk është shprehur ende se çfarë dënimi kërkon për ta.

Të dhëna

Jevgeni Boçko

Lindur: 1975 (Novoberezanski, Territori i Krasnodarit)

Biografia: Ka punuar si inxhinier mirëmbajtjeje

I lutej Perëndisë që ta ndihmonte të gjente fenë e vërtetë. U pagëzua si Dëshmitar i Jehovait më 1998

U martua me Anën në vitin 2009

Vuan nga skleroza e shumëfishtë

Komente personale

Ku je përqendruar gjatë kësaj periudhe me gjyqe dhe hetime penale?

Gjatë gjithë procesit, unë dhe gruaja i jemi lutur Jehovait që t’i japim lavdi emrit të tij dhe ia kemi dalë mbanë. Gjatë kohës që një nga hetuesit po shqyrtonte plot dokumente për këtë çështje penale, na bëri disa pyetje për Dëshmitarët e Jehovait. Për këtë çështje ka 17 dokumente, ku secili përmban nga 100 deri në 350 faqe. Emri i Jehovait shfaqet pothuajse në secilën faqe. Është një privilegj i jashtëzakonshëm të bëjmë pjesën tonë për ta bërë të njohur emrin e tij.

Vladimir Kolesnikovi

Lindur: 1946 (Ukrainë)

Biografia: Pasi la punën në ushtri, punoi në industrinë e minierave.

Në vitin 1979 u martua me Zinaidën. Kishin 2 vajza dhe 1 djalë. Zinaida vdiq në vitin 2020

Studiuan Biblën me Dëshmitarët e Jehovait si çift. U pagëzuan më 1995

Komente personale

Çfarë të ka ndihmuar të ruash optimizmin pavarësisht nga sprovat?

Nuk është gjithnjë e lehtë të përballoj sfidat e shumta që has. Me raste edhe shkurajohem, gjithsesi kam mësuar si t’i kapërcej këto ndjenja. Lutem dhe shfrytëzoj botimet e bazuara në Bibël që kam në dispozicion. Më është thelluar çmueshmëria për Fjalën e Perëndisë dhe kam mësuar sa e rëndësishme është t’ia shpreh Jehovait të gjitha shqetësimet e mia. Kur kthej kokën pas, kuptoj se në të kaluarën edhe jam përpjekur t’i zgjidhja gjërat vetë. Kurse tani që flas me Jehovain për ndjenjat, për gjithçka që më shqetëson ose që më gëzon, provoj kënaqësi dhe kam stabilitet.

Aleksei Shubnikovi

Lindur: 1982 (Nizhnjevartovsk, Rajoni i Tjumenit)

Biografia: Pas një dëmtimi të rëndë që pësoi në shtyllën kurrizore kur ishte 16 vjeç, i duhet të përdorë një karrige me rrota. I bëri përshtypje shpjegimi logjik i Biblës për vuajtjet

U pagëzua më 2008

Komente personale

Çfarë ke mësuar nga gjithë kjo periudhë ndjekjeje penale?

Kur lexoja për vëllezërit e motrat që thoshin se i pushtonte paqja gjatë gjyqit, thosha me vete: «Si është e mundur?!» Por kur më kontrolluan shtëpinë e më morën në pyetje dhe kur m’u desh të shkoja në gjykatë e të jepja dëshmi, edhe mua më pushtoi paqja. Kjo më bindi se Jehovai po më ndihmonte dhe se ishte e mundur t’i përballoja këto sprova me gëzim. I jam shumë mirënjohës Jehovait për mbështetjen që më jep dhe për privilegjin që t’i shërbej atij.

Valeri Veçkajevi

Lindur: 1973 (Vojselki, Territori i Krasnodarit)

Biografia: Është marrë me finiturat e ambienteve të brendshme. I bënë përshtypje normat e larta morale të Biblës dhe fakti që Dëshmitarët e Jehovait jetojnë në përputhje me to. U pagëzua më 1999

U martua me Irinën më 1996. Kanë 2 djem dhe 1 vajzë

Komente personale

Si po të ndihmon Jehovai të përballosh këtë sprovë?

Jehovai më ndihmon në shumë mënyra. Motrat e vëllezërit po luten për mua dhe po më mbështetin materialisht dhe emocionalisht. E përmes përmbushjes së profecive të Biblës, Jehovai e ka bërë të qartë se bota e re që do të sjellë ai, është te pragu. Kjo më ka ndihmuar t’i shoh sprovat e tanishme si re. Ato kanë forma dhe përmasa të ndryshme, por në fund do të davariten dhe do të zhduken krejtësisht. I jam mirënjohës Jehovait që ndërkohë po më jep forcë të qëndroj.

Jemi të bindur se Jehovai do të vazhdojë t’u japë gëzim e forcë këtyre vëllezërve dhe të gjithë atyre që i mbajnë sytë tek Ai.—Psalmi 141:8.

Tabelë kronologjike

11 shkurt 2022

Ngrihet çështja penale kundër Jevgenit, Alekseit, Vitalit dhe Valerit
13 shkurt 2022

Autoritetet u kontrollojnë shtëpinë. Jevgenin, Aleksein dhe Vitalin i marrin në pyetje. Vitalin e futin në një burg të përkohshëm
15 shkurt 2022

Vitalin e transferojnë në një qendër paraburgimi
16 shkurt 2022

Jevgenit dhe Alekseit u vendosin kufizime për udhëtimet
18 shkurt 2022

Valerit i vendosin kufizime për udhëtimet
21 shkurt 2022

Ngrihet çështja penale kundër Vladimirit
15 mars 2022

Vladimirit i vendosin kufizime për udhëtimet. Çështjet penale bashkohen në një
8 shtator 2022

Vitalin e nxjerrin nga paraburgimi dhe e kalojnë në arrest shtëpie
10 tetor 2022

Vitalin e lirojnë nga arresti i shtëpisë dhe i vendosin kufizime për udhëtimet
31 maj 2023

Fillon procesi penal

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME