27 DHJETOR 2023 | PËRDITËSUAR MË 6 MARS 2024
RUSI

PËRDITËSIM—VËLLEZËRIT TANË I BURGOSIN | Vëllezërit nuk shkurajohen, ndonëse u bë kohë që i mbajnë të burgosur a në arrest shtëpie

LUAJ

Më 5 mars 2024, Gjykata Krahinore e Oktiabërskit në Irkutsk shpalli fajtorë vëllezërit Nikolai Martinov, Sergei Kostejev, Jaroslav Kalin, Mihail Moish, Igor Popov, Denis Sarazhakov, Aleksei Solneçni, Andrei Tolmaçev dhe Sergei Vasilijev. Nikolain, Sergei Kostejevin, Jaroslavin, Mihailin, Aleksein dhe Andrein i dënoi secilin me 7 vjet burg. Igorin dhe Denisin i dënoi secilin me 6 vjet e 4 muaj burg. Kurse Sergei Vasilijevin e dënoi me 3 vjet burg. Atë e arrestuan menjëherë në sallën e gjyqit. Vëllezërit e tjerë ishin tashmë në paraburgim dhe do të vazhdojnë të kryejnë dënimin pas hekurave.

Të dhëna

Nikolai Martinovi

Lindur: 1958 (Bandarkë, Rajoni i Irkutskut)

Biografia: Ka punuar si shofer

U martua me Irinën më 1982. Kanë 2 fëmijë

Irina filloi të studionte Biblën me Dëshmitarët e Jehovait më 1997. Realizimi i profecive të Biblës e bindën Nikolain se ato që po mësonte ishin e vërteta. Të dy u pagëzuan më 1998

Komente personale nga bashkëshortja e Nikolait, Irina a

Çfarë po e ndihmon bashkëshortin tënd të ketë një qëndrim pozitiv, ndonëse ka mbi 2 vjet në paraburgim, në pritje të gjyqit?

Nikolai e ka ruajtur rregullsinë për leximin dhe meditimin e Biblës, dhe shpesh thotë se Jehovai u përgjigjet lutjeve të tij. Por nuk e ka të lehtë që është larg nesh. Nikolai është një kryefamiljar i mrekullueshëm dhe e ka të vështirë ta pranojë që nuk mund të kujdeset për ne si më parë. Megjithatë qetësohet kur i tregojmë se si po kujdeset Jehovai për ne, nëpërmjet vëllezërve e motrave. Gjithashtu na thotë se diçka tjetër që e ndihmon të qëndrojë, është ta na përfytyrojë të gjithë bashkë si familje në botën e re. Tashmë e ka planifikuar si do ta ndërtojë shtëpinë tonë dhe çfarë pemësh frutore do të mbjellim.

Jaroslav Kalini

Lindur: 1969 (Pivovarikë, Rajoni i Irkutskut)

Biografia: Është rritur në një familje Dëshmitarësh. Prindërit dhe gjyshërit ia internuan në Siberi më 1951

Ka punuar si teknik për riparimin e radiove e të televizorëve

U pagëzua si Dëshmitar i Jehovait më 1987

U martua me Tatjanën më 1991. Kishin 2 djem e 2 vajza. Djali i vogël humbi jetën në vitin 2007

Komente personale nga bashkëshortja e Jaroslavit, Tatjana b

Çfarë vështirësish po has bashkëshorti yt në paraburgim dhe çfarë po e ndihmon të qëndrojë?

Jaroslavi ka mbi 2 vjet në izolim, dhe kjo ka qenë shumë e vështirë për të, sepse është natyrë sociale. Vetmia e bën të ndihet në ankth, i trishtuar dhe i plogësht fizikisht. Por nuk dorëzohet dhe nuk lejon të bjerë në vetëmëshirim. Në letrat që na shkruan, e përmend shpesh Kolosianëve 1:11, që thotë: «Marrshit gjithë forcën që ju duhet nga fuqia e tij e lavdishme, që të përballoni çdo gjë me durim e gëzim.» Është i vendosur ta ruajë integritetin dhe besimin te Jehovai. Jaroslavi është i bindur se bekimi i Jehovait varet nëse vazhdojmë të bëjmë vullnetin e tij tani dhe në përjetësi.

Mihail Moishi

Lindur: 1987 (Ukrainë)

Biografia: Ka punuar në fushën e ndërtimit dhe të shitjeve

U martua me Jelenën më 2009. Kanë 2 djem

Jelena u pagëzua më 2010. Pastaj Mihaili filloi të ndiqte mbledhjet me Jelenën, dhe u pagëzua në vitin 2016

Komente personale nga bashkëshortja e Mihailit, Jelena c

Si ka vazhduar t’ju ndihmojë Mihaili që të keni një besim të fortë, edhe pse në paraburgim për më se 2 vjet?

Djali i madh është 12 vjeç. I vogli tani është 2 vjeç e gjysmë dhe ishte vetëm 6 muajsh kur Mihailin e arrestuan dhe e çuan në një qendër paraburgimi. Veçanërisht ai nuk e kupton pse i ati nuk është në shtëpi. Të 2 fëmijët ia ndiejnë shumë mungesën. Por Mihaili u shkruan shpesh: u dërgon vjersha, u tregon për kafshët dhe zogjtë, bën fjalëkryqe për ta, madje u jep detyra të vogla që të bëjnë kërkime për tema të caktuara. Ndërkohë më ndihmon edhe mua kur luftoj me mendimet negative. Ishte një periudhë kur thosha me vete: «Pse ne? Pse i ndodhi kjo familjes sonë?» Në një nga letrat e tij, Mihaili më siguronte se mendimet e mia nuk nënkuptonin se besimi im ishte i dobët. Ai shkruante: «Ka më shumë rëndësi çfarë bëjmë me mendimet a ndjenjat tona. Nëse, si Jobi, e lejojmë Jehovain të na ndreqë mënyrën si mendojmë, do të na ndihmojë ta rigjallërojmë besimin dhe t’i shikojmë gjërat nga pikëpamja e tij.» Ajo letër më dha vërtet shumë forcë.

Igor Popovi

Lindur: 1987 (Kazakistan)

Biografia: I ati i vdiq kur ishte 11 vjeç dhe është një nga 8 fëmijët

Ka punuar për finiturat e ambienteve të brendshme dhe si hidraulik

Pas vdekjes së të atit, mamaja dhe vëllai i madh filluan të studionin Biblën. Edhe Igori filloi të studionte dhe mori zemër veçanërisht kur mësoi për ringjalljen. Ai u pagëzua më 2006 bashkë me 7 pjesëtarë të tjerë të familjes

U martua me Mangirën në vitin 2013

Komente personale nga bashkëshortja e Igorit, Mangira d

Cilat vargje nga Bibla të kanë ndihmuar ty dhe bashkëshortin gjatë këtyre rrethanave të vështira?

Igorit i është dashur të rrijë gjatë në izolim. Në një nga letrat e tij, përmendte Psalmin 118:5, që thotë: «Kur isha në pikë të hallit, i thirra për ndihmë Jah; Jah m’u përgjigj e në një vend të sigurt më çoi.» Igori shkruante: «Ky vend i sigurt mund të përkthehet edhe ‘i hapur’. Kur ndiejmë se nuk dalim dot nga mendimet negative që po na mbysin, Jehovai u përgjigjet lutjeve tona dhe, në kuptimin e figurshëm, na çliron, pra na jep paqe mendore.» Gjatë gjithë kësaj situate, kemi mësuar vazhdimisht se Jehovai gjithnjë do ta gjejë një mënyrë si të na mbështetë dhe se nuk do të na braktisë kurrë, pavarësisht ku ndodhemi.

Denis Sarazhakovi

Lindur: 1988 (Sajanogorsk, Republika e Hakazisë)

Biografia: Ka punuar si agjent reklamash

Është rritur në një familje Dëshmitarësh të Jehovait. Prindërit e kanë ndihmuar që ta dojë Jehovain dhe të ketë miqësi të ngushtë me të. U bind për dobitë që sjell zbatimi i parimeve të Biblës, dhe u pagëzua më 2004.

U martua me Olesian në vitin 2007

Komente personale nga bashkëshortja e Denisit, Olesia e

Si ia ka dalë Denisi të të inkurajojë?

Me Denisin komunikoj kryesisht me anë të letrave. Na lejohet të flasim në telefon një herë në javë për rreth 5 minuta. Gjithashtu 2 herë në muaj mund të shkoj ta takoj personalisht, dhe vizita zgjat 1 orë. Flasim nëpërmjet telefonave dhe një mur xhami na ndan. Sa herë që flasim, Denisi më tregon diçka inkurajuese nga Bibla. Dhe më kujton se nuk duhet ta shohim veten si të pashpresë. Kemi shumë arsye për t’u ndier të gëzuar për gjërat që kemi arritur. Kjo situatë e vështirë nuk na ka thyer, përkundrazi na ka bërë më të fortë.

Aleksei Solneçni

Lindur: 1976 (Abakan, Territori i Krasnojarskut)

Biografia: Ka punuar si elektricist

Mamaja dhe motra e vogël filluan të studionin Biblën me Dëshmitarët e Jehovait kur Aleksei ishte ushtar. Kur u kthye në shtëpi, filloi të bëhej kurioz për Biblën dhe nisi një studim. U pagëzua më 2004

U martua me Aljonën në vitin 2011

Komente personale nga bashkëshortja e Alekseit, Aljona f

Çfarë e ka ndihmuar bashkëshortin tënd të mbajë një qëndrim pozitiv, edhe pse në burg?

Aleksei lutet vazhdimisht që të mos harrojë se Jehovai është krenar për të. Gjithashtu përpiqet të mbajë parasysh që autoritetet e burgut dhe gjykatësit thjesht po bëjnë punën e tyre. Kjo e ka ndihmuar të përqendrohet më shumë te privilegji që ka për të mbrojtur emrin e Jehovait, sesa te vetja dhe te vështirësitë e kësaj situate. Ndonëse e ka marrë malli për mua, familjen dhe miqtë, është ende optimist dhe e ka ruajtur ndjenjën e humorit.

Ndonëse përkohësisht të ndarë nga familjet e tyre, jemi të sigurt se asgjë nuk do t’i ndajë vëllezërit tanë të shtrenjtë nga dashuria e Perëndisë ngaqë qëndrojnë besnikë.—Romakëve 8:35-39.

Tabelë kronologjike

4 tetor 2021

Kontrollojnë shtëpi të Dëshmitarëve të Jehovait në Rajonin e Irkutskut. Ngrihet një çështje penale kundër Nikolait, Sergei Kostejevit, Jaroslavit, Mihailit, Alekseit, Andreit dhe Sergei Vasilijevit. Të 7 vëllezërit i arrestojnë
5 tetor 2021

Jaroslavin, Mihailin dhe Aleksein i çojnë në një qendër paraburgimi
6 tetor 2021

Sergei Kostejevin, Nikolain dhe Andrein i çojnë në një qendër paraburgimi. Sergei Vasilijevin e lirojnë nga burgu i përkohshëm dhe e kalojnë në arrest shtëpie
30 nëntor 2021

Kontrollojnë shtëpi të tjera. Denisin dhe Igorin i arrestojnë dhe i çojnë në Irkutsk, gati 1.500 kilometra larg
1 dhjetor 2021

Igorin e çojnë në një qendër paraburgimi
2 dhjetor 2021

Denisin e çojnë në një qendër paraburgimi
29 dhjetor 2022

Fillon procesi penal

a b c d e f Meqë vëllezërit Martinov, Kalin, Moish, Popov, Sarazhakov dhe Solneçni ishin në paraburgim, nuk mund të merrnim komente prej tyre.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME