Na mao laʻu aa i le isu o si tama lea na ma taaalo i toleniga, ma na matuā tugā le lavea. Na ou lagona le nofosala, ma ou mafaufau ai pe tatau ona faaauau pea ona ou taalo i taaloga karate. Aiseā na avea ai lenei mea sesē, ma māfuaaga na ou fesiligia ai le taaloga na matuā ou fiafia i ai mo le tele o tausaga? Muamua, seʻi oʻu faamatalaina atu le māfuaaga na ou fiafia ai i le karate.

 Na ou ola aʻe i le vaipanoa e taʻua o Buffalo i le aai o Niu Ioka i le Iunaite Setete, i se siʻomaga toʻafilemu i se aiga lotu Katoliko. Na ou aʻoga i aʻoga a le lotu Katoliko, ma na avea aʻu ma tama tali Misasā. Na mananaʻo oʻu mātua ina ia manuia o ma olaga ma loʻu tuafafine. O lea, na la faataga ai aʻu ou te taalo i taaloga pe a uma le aʻoga pe galue faavaitaimi foʻi, pau lava le mea ia lelei oʻu maka i le aʻoga. O le māfuaaga lenā na ou atiaʻe ai le pulea totino a o oʻu laʻitiiti.

 Ina ua 17 oʻu tausaga, na amata ai ou aʻoaʻoina le karate. I le tele o tausaga, na ou toleni ai mo le tolu itula mo le ono aso i le vaiaso. I aso taʻitasi, ou te faaaluina foʻi le tele o itula e mafaufau ai i metotia, gaoioiga eseese ma matamata vitiō ina ia faaleleia ai loʻu tomai i le karate. Na ou fiafia tele e fai aʻu toleniga a o fusi oʻu mata, e oo lava foʻi i toleniga na faaaogā ai auupega. Na mafai ona gauia laupapa ma taʻei piliki i laʻu tuʻi. Na ou ausia tulaga maualuluga i le karate, ma na ou manumalo i tauvaga ma maua ai aʻu ipu. Na avea le karate ma mea e sili ona tāua i loʻu olaga.

 Na ou ausia mea na ou faapea o le auala lea e taulau manuia ai i le olaga, na matuā maualuluga togi na ou mauaina ina ua ou faauu mai i le iunivesite. Na ou faigaluega foʻi i se kamupani telē o se inisinia i mea tau komepiuta. Na ou mauaina le tele o faamanuiaga mai le kamupani, iai saʻu lava fale ma na iai foʻi saʻu uō teine. Na foliga atu na lelei mea uma i loʻu olaga, ae na iai ni aʻu fesili tāua e faatatau i le olaga na matuā ou lē mautonu ai.

 Ina ia maua tali o aʻu fesili, na amata ai ona ou auai faalua i le lotu i le vaiaso ma tatalo mo le fesoasoani a le Atua. Ae i se tasi aso na ma talanoa ai ma saʻu uō, ma o ina na suia ai loʻu olaga. Na ou fesili i ai: “Pe na e tomānatu po le ā le māfuaaga ua tatou ola ai i le lalolagi? Ua matuā tele faafitauli ma le lē faamasinotonu.” Na ia taʻu mai iā te aʻu na iai ni fesili faapea na ia fesili ai, ma na ia maua tali faamalieloto mai le Tusi Paia. Na ia aumaia iā te aʻu se tusi e taʻua, E Mafai Ona E Ola e Faavavau i Parataiso i le Lalolagi. a Na ia faamatala mai na ia suʻesuʻeina le Tusi Paia ma Molimau a Ieova. I le taimi muamua, na ou faatalatū ona na ou manatu e lē tatau ona ou faitauina lomiga mai i se isi lotu. Peitaʻi, o loʻu naunau e fia iloa tali o aʻu fesili, na ou manaʻo ai ou te fia iloa pe e iai se aogā o mea o loo aʻoaʻoina e Molimau a Ieova.

 Na matuā faateʻia aʻu i aʻoaʻoga moni a le Tusi Paia. Na ou aʻoaʻoina o le uluaʻi fuafuaga a le Atua mo tagata, ia ola e faavavau i se lalolagi parataiso ma e leʻi suia lenā fuafuaga a le Atua. Na matuā ou maofa ina ua ou faitau i le suafa o le Atua o Ieova i laʻu kopi o le Tusi Paia le faaliliuga o le King James, ma na ou iloa ai o le suafa lea e masani ona ou tatalo ai pe a ou taulotoina le tatalo a le Alii. (Salamo 83:18; Mataio 6:9) Na ou malamalama ai foʻi i le māfuaaga na faataga ai e le Atua mo sina taimi tagata e mafatia. Na matuā talafeagai lava mea uma na ou aʻoaʻoina. O lea, na matuā faatumulia ai aʻu i le fiafia.

 E lē mafai ona galo iā te aʻu oʻu faalogona i le taimi muamua na ou auai ai i sauniga a Molimau a Ieova. Na faaleuō tagata uma ma na latou fia iloa loʻu igoa. I laʻu sauniga muamua, na fai ai se lauga lautele e faatatau i tatalo e faafofogaina e le Atua. Na ou fiafia i lenā matua, ona sa ou tatalo i le Atua mo se fesoasoani. Na ou auai foʻi i le faamanatuina o le maliu o Iesu. Na matuā ou maofa lava i na sauniga, auā e oo lava i tamaiti e latou te mulimuli i le Tusi Paia a o faitauina mau. I le taimi muamua, ou te leʻi iloa suʻe mau o le Tusi Paia, ae na fesoasoani mai Molimau ma aʻoaʻo aʻu i le auala e faaaogā ai le Tusi Paia.

 A o faaauau pea ona ou auai i sauniga, na ou atiaʻe ai le talisapaia loloto o le maualuga o aʻoaʻoga a le Tusi Paia, e aʻoaʻoina e Molimau a Ieova i na sauniga. E tele mea na ou aʻoaʻoina mai i sauniga taʻitasi, ma o taimi uma ou te foʻi ai i le fale ou te lagona le faalaeiauina ma le faafouina. Na valaaulia foʻi aʻu e fai saʻu suʻesuʻega faale-Tusi Paia.

 Na ou vaaia le matuā eseese o Molimau a Ieova, ma mea e masani ona ou vaai ai i laʻu lotu. Na ou aʻoaʻoina ai o Molimau a Ieova o ni tagata e autasi ma faamaoni, ma o loo latou taumafai e fai le mea sili e faafiafia ai le Atua. Na ou mautinoa o loo faaalia e Molimau a Ieova le alofa o le tasi i le isi, le faailoga e iloa ai Kerisiano moni.—Ioane 13:35.

 O le tele lava na ou suʻesuʻeina ai le Tusi Paia, o le tele foʻi lenā o suiga na ou faia ina ia ou ola e tusa ai ma tapulaa o le Tusi Paia. Peitaʻi, na ou manatu e lē mafai ona tuua laʻu taaloga o le karate. Na matuā ou fiafia lava i toleniga ma auai i tauvaga. Ina ua ou faamatala atu i le Molimau na ma suʻesuʻe oʻu faalogona, na ia faamautinoa mai ma le agalelei iā te aʻu, “Ia fai pea lau suʻesuʻega, ou te iloa o le a e faia le filifiliga saʻo.” O le mea tonu lava lenā na ou fia faalogo i ai. A o faaauau pea laʻu suʻesuʻega o le tele foʻi lenā o loʻu manaʻo e faafiafia Ieova le Atua.

 Na suia loʻu mafaufau ina ua tupu le faalavelave lea na ou taʻua i le amataga, lea na mao ai laʻu aa i le isu o le tama lea na ma taaalo i toleniga. O lenā mea, na māfua ai ona ou mafaufau loloto pe mafai ona avea aʻu ma se soo filemu o Keriso, a o faaauau pea ona ou taalo i taaloga karate. Na ou aʻoaʻoina mai i le Isaia 2:3, 4 le valoaga e faatatau iā i latou e usitaʻia faatonuga a Ieova, e latou te lē “aʻoaʻo foʻi i taua.” Na aʻoaʻo foʻi e Iesu ona soo ina ia aua neʻi tali atu ma le sauā, e tusa lava pe latou te fesagaʻia ni faiga lē tonu. (Mataio 26:52) O lea, na ou tuua ai le taaloga na sili ona ou fiafia i ai.

 Mulimuli ane, na ou mulimuli ai i le fautuaga a le Tusi Paia ina ia “aʻoaʻo oe lava ia fai ma ou sini le faamaoni i le Atua.” (1 Timoteo 4:7) O taimi ma taumafaiga uma na ou faaaluina e aʻoaʻo ai le karate, ua ou faaaluina nei i mea faaleagaga. E leʻi talia e laʻu uō teine mea na ou aʻoaʻoina mai i le Tusi Paia, o lea na faauma ai le ma uō. Iā Ianuari 24, 1987, na ou papatiso ai o se tasi o Molimau a Ieova. E leʻi umi ae amata loa ona ou auauna o se faifeʻau faataimi atoa, ma ofo atu loʻu taimi e aʻoaʻo isi i le Tusi Paia. Talu mai lenā taimi seʻia oo mai i le taimi lenei, o loo oʻu auauna pea o se faifeʻau faataimi atoa, ma e iai foʻi se taimi na ou auauna ai i le ofisa ulu o Molimau a Ieova i Niu Ioka, i le Iunaite Setete.

 Ua ou maua nei le mea na misi i loʻu olaga, o le upu moni e faatatau i le Atua. E lē o toe iā te aʻu ni faalogona lē mautonu. Ae ua iai nei se fuafuaga o loʻu olaga, se faamoemoe mo le lumanaʻi, ma le fiafia moni. O loo oʻu fiafia pea e faamalositino e lē aunoa, ae ua lē toe avea toleniga faaletino ma mea e sili ona tāua i loʻu olaga. Ua faamuamua nei i loʻu olaga le auaunaga iā Ieova le Atua.

 A o oʻu toleni i le karate, na ou mataala i taimi uma i tagata e latalata mai iā te aʻu, ona na ou sauni e puipuia aʻu pe a osofaʻi mai se tasi. I aso nei, o loo oʻu mataala pea iā i latou e latalata mai iā te aʻu, ona ou te manaʻo e fesoasoani i ai. Ua fesoasoani le Tusi Paia iā te aʻu e avea o se tagata lotofesoasoani, ma se tane lelei mo si aʻu avā lalelei o Brenda.

 Na matuā ou fiafia lava i le karate. Peitaʻi, ua suia nei le mea na ou fiafia i ai i se mea e sili ona lelei. E matuā lelei le auala o loo faamatala ai e le Tusi Paia lenā mea: “E itiiti le aogā o le faamalositino, a o le faamaoni i le Atua e aogā lea i mea uma lava, auā o loo folafola mai ai le ola i le taimi nei ma le lumanaʻi.”—1 Timoteo 4:8.