O le ā le Finagalo o le Atua?
E finagalo le Atua ia tatou ola filemu ma fiafia e faavavau i se lalolagi parataiso!
Ae atonu e te taumānatu e faapea, ʻPe e mafai faapefea ona tupu lenā mea?’ O loo taʻua i le Tusi Paia o le a faataunuuina e le Malo o le Atua, ma o lona finagalo ia aʻoaʻo tagata uma e uiga i lenā Malo ma lona finagalo mo i tatou.
E finagalo le Atua ia tatou maua aogā.
E pei lava ona manaʻo se tamā alofa mo le mea e sili ona lelei mo lana fanau, e finagalo foʻi lo tatou Tamā i le lagi ia tatou olioli i le fiafiaga e faavavau. (Isaia 48:17, 18) Na ia folafola mai e faapea “o lē e faia le finagalo o le Atua e tumau e faavavau.”
E finagalo le Atua ia tatou savavali i ona ala.
O loo taʻua i le Tusi Paia e finagalo Lē na faia i tatou ia “aʻoaʻoina . . . i tatou i ona ala,” ina ia mafai ona tatou “savavali ai i ona ala.” (Isaia 2:2, 3) Ua ia faamaopoopoina “ni tagata mo lona suafa” ina ia faalauiloa atu lona finagalo i le lalolagi atoa.
E finagalo le Atua ia tatou autasi i le tapuaʻiga iā te ia.
Nai lo o le fevaevaeaʻi o tagata, o le tapuaʻiga mamā a Ieova ua autasia ai i latou uma i le alofa moni. (Ioane 13:35) O ai i aso nei o loo latou aʻoaʻoina tane ma fafine i so o se mea i le auala e auauna atu ai i le Atua i le autasi? E matou te valaaulia oe ia saʻili le tali e ala i lenei polosiua.