MATAUPU 37

Pe e Tatau Ona Ou Papatiso?

Ia faailoga manatu nei i le saʻo po o le sesē:

O le papatisoga o se mea e tatau i Kerisiano ona fai.

□ Saʻo

□ Sesē

O le fuafuaga autū o le papatisoga o se puipuiga mo oe mai le faia o le agasala.

□ Saʻo

□ Sesē

O le papatisoga e te maua ai le faaolataga.

□ Saʻo

□ Sesē

Pe afai e te leʻi papatiso, o le a lē mafai ona e tali atu i le Atua i au gaoioiga.

□Saʻo

□Sesē

Afai ua papatiso au uō, o lona uiga ua e sauni foʻi e te papatiso.

□ Saʻo

□ Sesē

PE AFAI o loo e usitaʻia tapulaa a le Atua, atiaʻe se faauōga ma ia, ma talanoa atu i isi e faatatau i ou talitonuga, o se mea masani la lou mafaufau e papatiso. Ae faapefea ona e iloa ua e sauni mo lena laasaga? Ina ia tali lena fesili, seʻi tatou iloilo manatu ua taʻua i luga.

● O le papatisoga o se mea e tatau i Kerisiano ona fai.

Saʻo. Na faatonuina e Iesu ona soo ina ia papatiso. (Mataio 28:19, 20) O le mea moni, sa naunau foʻi Iesu e papatiso. Ina ia mulimuli iā Keriso, e manaʻomia ona e papatiso pe afai ua e sauni ma o lou faanaunauga moni lena.

● O le fuafuaga autū o le papatisoga o se puipuiga mo oe mai le faia o le agasala.

Sesē. O le papatisoga o se faailoaga i luma o le lautele o lou tuuina atu iā Ieova. O lou tuuina atu e lē o se feagaiga faasāsā naʻuā e taofia ai oe mai le faia o mea e te ono fiafia e fai. Nai lo lea, e te tuuina atu lou ola iā Ieova ona e te manaʻo e ola e ōgatusa ma ana tapulaa.

● O le papatisoga e te maua ai le faaolataga.

Saʻo. Ua faapea mai le Tusi Paia o le papatisoga o se laasaga tāua mo le mauaina o le faaolataga. (1 Peteru 3:​21) E lē uiga atu lenei manatu o le papatisoga e tai pei o se inisiua lea e te totogi ina ia puipuia ai oe pe a aafia i se mala faafuaseʻi. E te papatiso ona e te alofa iā Ieova ma e te manaʻo e auauna iā te ia e faavavau, ma lou lotoatoa.​—Mareko 12:29, 30.

● Pe afai e te leʻi papatiso, o le a lē mafai ona e tali atu i le Atua i au gaoioiga.

Sesē. O loo taʻua i le Iakopo 4:​17: “Afai ua iloa e se tasi le mea sa‘o e ao ona fai, ae e lē faia, ua agasala ai o ia,” e tusa pe ua papatiso pe leai. O lea, afai ua e iloa le mea saʻo ma ua e sauni e iloilo le auala o loo e ola ai, atonu la o le taimi lenei e tatau ai ona talanoa faatasi ma ou mātua po o se isi Kerisiano taʻumatuaina e faatatau i lenā mataupu. O le faia faapea, o le a e aʻoaʻoina ai le auala e te agavaa ai mo le papatisoga.

● Afai ua papatiso au uō, o lona uiga ua e sauni foʻi e te papatiso.

Sesē. O le filifiliga e papatiso e tatau ona sau mai lou loto. (Salamo 110:3) E tatau ona e papatiso pe afai ua e malamalama atoatoa i mea e aofia ai i le avea ma Molimau a Ieova, ma ua e mautinoa ua e sauni e faataunuu lena tiute tauave.​—Failauga 5:​4, 5.

O se Laasaga e Suia ai le Olaga

O le papatisoga o se laasaga e suia ai lou olaga ma maua ai le tele o faamanuiaga. I le taimi e tasi, o loo aofia ai ma se tiute tauave tāua. O le ola lea e ōgatusa ma lou tuuina atu iā Ieova.

Pe ua e nofosauni mo lenā laasaga? Afai o lea, ua iai la se māfuaaga lelei e te fiafia ai. Ua iā te oe se faaeaga sili ona tāua, o le auauna ma le lotoatoa iā Ieova, ma ola i se auala e faaalia atu ai lou tuutoina moni atu iā te ia.​—Mataio 22:36, 37.

I LE ISI MATAUPU

Iloilo pe faapefea ona faatutū ni ou sini ina ia faaaogā lelei ai lou olaga.

MAU AUTŪ

“Ia tuuina atu o outou tino o le taulaga ola, e paia, ma e mālie i le Atua, ia faia le auaunaga paia ma lo outou mafaufau lelei.”​—Roma 12:1.

FESOASOANI

Faatasi ma le fesoasoani a ou mātua, ia saʻili se tasi i le faapotopotoga e mafai ona fesoasoani iā te oe ina ia agaʻigaʻi i luma faaleagaga.​—Galuega 16:​1-3.

E TE SILAFIA . . . ?

O le papatisoga, o se vaega tāua o le “faailoga” lea e faailoa atu ai ua e maua le ola e faavavau.​—Esekielu 9:​4-6.

LE AUALA E FAI AI!

Ina ia ou agavaa mo le papatisoga, o le a ou faalolotoina loʻu malamalama i aʻoaʻoga nei a le Tusi Paia: ․․․․․

O le ā se mea ou te fia fesili ai i oʻu mātua e faatatau i lenei mataupu? ․․․․․

O LE Ā SOU MANATU?

● Aiseā e tāua ai le papatisoga?

● Aiseā e ono uunaʻia ai se talavou e vave ona papatiso?

● O le ā se māfuaaga atonu e taofia ai se talavou e tuuina atu ma papatisoina?

[Faamatalaga faaopoopo]

“O le papatisoga na fesoasoani iā te aʻu e faia ai filifiliga atamai, ma ʻalofia ai le uia o auala e ono taʻitaʻia atu ai i āuga leaga.”​—Holly

[Pusa/Ata]

Fesili e Masani Ona Fesili ai e Faatatau i le Papatisoga

O le ā e faaāta mai e le papatisoga? O le faatofu i le vai e faaāta mai ai le aveesea o ou faanaunauga mo lou oe lava lelei. O le toe ea aʻe i luga e faaāta mai ai o le a e ola e faia le finagalo o Ieova.

O le ā le uiga o le tuuina atu o lou ola iā Ieova? O lona uiga o le faailoa atu lea o le a pule o ia iā te oe, ma tautō atu o le a e faia le finagalo o le Atua nai lo mea e te manaʻo ai. (Mataio 16:24) E tatau ona e faia se tuuina atu iā Ieova e ala i le tatalo, a o leʻi oo i lou papatisoga.

O le ā le auala e tatau ona e ola ai ae e te leʻi papatiso? E tatau ona e ola e ōgatusa ma le Afioga a le Atua ma faailoa atu i isi ou talitonuga. E tatau ona e atiaʻe se faauōga ma le Atua e ala i le tatalo ma suʻesuʻe lana Afioga. E tatau ona e auauna iā Ieova ona ua e filifili e faia faapea, ae lē ona ua faamalosia oe e isi.

Pe e iai se tausaga patino e tatau ai ona e papatiso? E lē fua le papatisoga i tausaga. Ae e tatau ona lava lou matua, ma ia matua faaleagaga ina ia e malamalama ai i le uiga o le tuuina atu.

E faapefea pe afai ua e manaʻo e papatiso ae faapea atu ou mātua e faatali? Atonu o loo la mananaʻo ia e malamalama atili i le auala e tatau ona ola ai o se Kerisiano. Ia faatāua la laʻua fautuaga, ma faaaogā le taimi lena e faamalosia atili ai le lua faauōga ma Ieova.—1 Samuelu 2:26.

[Pusa]

Galuega Faatino

Po o E Mafaufau E te Papatiso?

Faaaogā fesili ma manatu o loo i lalo e iloilo ai po ua e agavaa. Ia faitau mau o loo iai a o leʻi tusia i lalo au tali.

O ā auala o loo faailoa atu ai lou maufaatuatuaina o Ieova?​—Salamo 71:5. ․․․․․

E faapefea ona e faailoa atu ua toleniina lelei lou tomai e mafaufau ai, ina ia iloa le mea saʻo mai i le mea sesē?​—Eperu 5:​14. ․․․․․

O le ā le tele e te tatalo ai? ․․․․․

Pe e patino au tatalo, ma o le ā ua faaalia ai e faatatau i lou alofa iā Ieova?​—Salamo 17:6. ․․․․․

Tusi i lalo ni sini e te manaʻo e ausia i le faaleleia o au tatalo? ․․․․․

Pe e faia e lē aunoa au suʻesuʻega o le Tusi Paia?​—Iosua 1:8. ․․․․․

O ā mea e te faaaofia i au suʻesuʻega? ․․․․․

Tusi i lalo ni sini e te manaʻo e ausia i le faaleleia o au suʻesuʻega. ․․․․․

Po o uigā lau faiva? (Faataʻitaʻiga: Pe mafai ona e faamatala i isi aʻoaʻoga faavae o le Tusi Paia? Pe e te toe asia i latou e faaalia le fiafia? Po o e taumafai e amata se suʻesuʻega faale-Tusi Paia?)

□ Ioe □ Leai

Pe e te alu i le talaʻiga tusa lava pe lē ō ou mātua?​—Galuega 5:​42.

□ Ioe □ Leai

Tusi i lalo ni sini e te manaʻo e ausia i le talaʻiga.​—2 Timoteo 2:​15. ․․․․․

Pe e te auai e lē aunoa i sauniga pe leai?​—Eperu 10:25. ․․․․․

O ā auala e faia ai sou sao i sauniga? ․․․․․

Pe e te auai i sauniga e tusa lava pe lē auai ou mātua (pe afai la te faataga oe e auai)?

□ Ioe □ Leai

Po o e fiafia moni lava i le faia o le finagalo o le Atua?​—Salamo 40:8.

□ Ioe □ Leai

Pe mafai ona e lisiina ni tulaga patino na e teena ai omiga mai aumea?​—Roma 12:2. ․․․․․

O le ā le auala o le a e faamalosia ai pea lou alofa mo Ieova?​—Iuta 20, 21. ․․․․․

Po o le a e auauna pea iā Ieova e tusa pe e lē toe auauna ou mātua ma au uō?​—Mataio 10:36, 37.

□ Ioe □ Leai

[Ata]

O le papatisoga e tai pei o le faaipoipoga. O se laasaga e suia ai le olaga, ma e lē tatau ona manatu māmā i ai