Pe na e taumafai e faitau le Tusi Paia ae na taofia oe ona o faalogona e pei o loo taʻua i luga? O le toʻatele e foliga mai e faigatā ona latou faitauina le Tusi Paia. Ae faapefea pe a e iloaina e mafai ona fesoasoani le Tusi Paia iā te oe e maua ai se olaga fiafia ma faamalieina? E faapefea pe a e iloa ane e iai isi auala e mafai ona faitau ai le Tusi Paia i se auala e te fiafia ai? Po o le a e lotomalie e vaai i aogā e te mauaina mai i le Tusi Paia?

Seʻi manatu i faamatalaga a nisi na mauaina aogā ina ua amata ona latou faitauina le Tusi Paia.

Ua faapea mai Ezekiel ua silia teisi i le 20 ona tausaga: “I le taimi muamua sa pei aʻu o se tagata o loo aveina se taavale ae e lē iloa le mea o loo agaʻi i ai. Ae o le faitauina o le Tusi Paia ua fesoasoani iā te aʻu e maua ai se olaga e iai se uiga. O loo maua ai le tele o fautuaga aogā e mafai ona ou faaaogāina i aso uma.”

Ua faapea mai Frieda lea e silia i le 20 ona tausaga: “Sa masani ona ou maitaita. Ae o laʻu faitauga Tusi Paia ua mafai ai ona ou pulea aʻu lava. Ua faigofie ai ona ou faifaimea ma isi ma tele ai aʻu uō.”

O Eunice o se fafine ua silia ma le 50 ona tausaga. Ua ia faapea mai e faatatau i le Tusi Paia: “Ua mafai ona fesoasoani e faaleleia ai oʻu uiga, lea ua suia ai aʻu masaniga lē lelei.”

E pei o i latou na ma le faitau miliona o isi tagata, ua latou iloaina o le faitauina o le Tusi Paia e mafai ai foʻi ona e maua se olaga fiafia. (Isaia 48:17, 18) O nisi nei o vala e mafai ona fesoasoani ai le faitauina o le Tusi Paia iā te oe: faia ni filifiliga lelei, maua ni uō moni, taulimaina le popole, ma le vala e sili ai, o le aʻoaʻoina lea o le upu moni e faatatau i le Atua. O fautuaga o loo i le Tusi Paia e mai i le Atua, ma e te maua iʻuga lelei pe a e mulimuli i ai. E lē aumaia e le Atua ni fautuaga leaga iā i tatou.

O le mea tāua, ia amata lau faitauga Tusi Paia. O ā ni auala aogā e faigofie ona amata ma e maua ai le fiafia i lau faitauga Tusi Paia?