PE A e faitau i faaupuga e lua o loo taʻua i luga, o lē fea faaupuga e faamatala ai le manatu o loo iā te oe? O le toʻatele o tagata e faamāfanafanaina ma fiafia i upu a Saulo o Taso, po o le aposetolo o Paulo. (Galuega 17:26, 27) O loo iai i le Tusi Paia isi foʻi faamautinoaga faapena. O se faaaʻoaʻoga, sa faia e Iesu se tatalo o loo aofia ai ma se faamautinoaga faamāfanafanaloto e faapea, e mafai e ona soo ona iloa le Atua ma maua lana faamanuiaga.—Ioane 17:3.

Peitaʻi, e ese le manatu o faifilosofia e pei o Philo. E latou te manatu e matuā lē mafai ona tatou iloa le Atua, ona e lē mafai ona tatou malamalama iā te ia. O lē fea la e saʻo?

O loo taʻu saʻo mai i le Tusi Paia e iai nisi o mea e faatatau i le Atua e faigatā ona malamalama i ai tagata. O se faaaʻoaʻoga, e lē mafai ona fuaina le umi talu ona soifua Lē na foafoaina mea, ma e lē mafaatusalia le maoaʻe o ona manatu ma le loloto o lona atamai. E lē mafai ona malamalama tagata e faatatau i nei mea. Peitaʻi, e lē avea na vala ma itu e faigatā ai ona tatou iloa le Atua. Nai lo o lea, o le manatunatu loloto e faatatau i na mea e mafai ona fesoasoani iā i tatou e ʻmafuta vavalalata atu ai i le Atua.’ (Iakopo 4:8) Seʻi o tatou iloilo ni nai faaaʻoaʻoga o mea e lē mafai ona tatou malamalama i ai. Pe a uma, ona tatou iloilo lea o vala e faatatau i le Atua e mafai ona tatou malamalama i ai.

SOIFUA E FAAVAVAU LE ATUA: O loo aʻoaʻoina i le Tusi Paia na soifua le Atua “mai i le vavau e oo i le faavavau.” (Salamo 90:2) I nisi faaupuga, e leai se amataga ma se gataaga o le Atua. I le vaaiga faaletagata, ʻe lē masuʻesuʻeina le aofaʻiga o ona tausaga.’—Iopu 36:26.

Aogā mo oe: Ua folafola mai e le Atua e te maua le ola e faavavau pe afai e te iloa lelei o ia. (Ioane 17:3) E faapefea ona taunuu moni lenā folafolaga pe afai e lē soifua e faavavau le Atua? E na o le “Tupu o le vavau” e mafai ona faataunuuina lenā folafolaga.—1 Timoteo 1:17.

MANATU O LE ATUA: Ua aʻoaʻoina i le Tusi Paia ʻe lē masuʻesuʻeina le poto o le Atua,’ ona e sili atu ona maualuga ona manatu nai lo o i tatou. (Isaia 40:28; 55:9) Ua talafeagai ai la ona lāgā le fesili lenei i le Tusi Paia: “Po o ai e malamalama i manatu o le Atua, e na te faatonu ai o ia?”—1 Korinito 2:16, English Standard Version.

Aogā mo oe: E mafai ona faafofoga mai le Atua i le faitau miliona o tatalo a tagata, i le taimi e tasi. (Salamo 65:2) E na te silafia mai foʻi tamaʻi manulele uma e paʻuʻū i le eleele. Pe e iai se taimi e tele ai mea e manatunatu i ai le Atua, ma lē mafai ai ona ia mātauina mai oe ma faafofoga mai i au tatalo? E leai, auā e lē gata mai mea e na te manatuaina. A o le sili atu i lenā, “e sili atu ona tāua outou nai lo o tamaʻi manulele e tele.”—Mataio 10:29, 31.

ALA O LE ATUA: O loo aʻoaʻoina i le Tusi Paia e “suʻesuʻeina pea e tagata galuega a le Atua na ia faia mai i le amataga e oo i le iʻuga.” (Failauga 3:11) O lea, e lē mafai ona tatou iloa mea uma e faatatau i le Atua, ma e faaauau pea ona tatou suʻesuʻeina. ʻE lē mafai ona iloa’ le atamai o ala o le Atua. (Roma 11:33) Peitaʻi, ua finagalo le Atua e faailoa mai ona ala i ē e mananaʻo e faafiafia o ia.—Amosa 3:7.

Aogā mo oe: Pe afai e te faitau ma suʻesuʻeina le Tusi Paia, o le a lē gata mai mea fou e te aʻoaʻoina e faatatau i le Atua ma ona ala. O lea, o le a atili ai ona tatou mafuta vavalalata atu i lo tatou Tamā i le lagi e oo i le faavavau.

E lē faapea a lē mafai ona tatou malamalama i nisi o vala e faatatau i le Atua, ona manatu ai lea e matuā lē mafai ona tatou iloa o ia. O loo iai i le Tusi Paia le tele o faamatalaga e fesoasoani iā i tatou ina ia iloa lelei ai le Atua. Seʻi iloilo ni faaaʻoaʻoga.

SUAFA O LE ATUA: O loo aʻoaʻoina i le Tusi Paia e iai le suafa o le Atua. Na fetalai o ia: “O aʻu o Ieova. O loʻu igoa lea.” E pe ā ma le 7,000 taimi o loo aliaʻe mai ai le suafa o le Atua i le Tusi Paia, e sili atu i lo o se isi lava igoa.—Isaia 42:8.

Aogā mo oe: Na fetalai Iesu i lana tatalo faaaʻoaʻo: “Lo matou Tamā e o i le lagi, ia faapaiaina lou suafa.” (Mataio 6:9) Pe e mafai foʻi ona e faaaogā le suafa o le Atua i au tatalo? E finagalo Ieova ia faasaoina i latou uma lava e faatāuaina lona suafa.—Roma 10:13.

AFIOAGA O LE ATUA: O loo aʻoaʻoina i le Tusi Paia e lua ituaiga nofoaga. Muamua, o le nofoaga faitino, e aofia ai lo tatou lalolagi ma le vanimonimo. A o le isi nofoaga e faasino atu i le lagi lē vaaia lea e iai foafoaga agaga ma tino agaga. (Ioane 8:23; 1 Korinito 15:44) I le Tusi Paia, e masani ona faasino atu le upu “lagi” i le lagi lē vaaia, ma o le “lagi” lenā o loo iai le “afioaga tumau” o Lē na foafoaina mea.—1 Tupu 8:43.

Aogā mo oe: E te malamalama lelei ai, o le Atua e lē o se malosiaga lilo e iai i mea uma ma i so o se  nofoaga. O loo soifua moni lava Ieova ma e iai moni lava lona afioaga. Peitaʻi, “e leai foʻi se foafoaga e lilo i lana silafaga.”—Eperu 4:13.

UIGA O LE ATUA: O loo aʻoaʻoina i le Tusi Paia e iai uiga matagofie o Ieova. “O le Atua o le alofa lava ia.” (1 Ioane 4:8) E lē taitai ona tala pepelo o ia. (Tito 1:2) E lē faailoga tagata o ia, ae e alofa fua, alofa mutimutivale ma e telegese lona toʻasā. (Esoto 34:6; Galuega 10:34) E ono faateʻia foʻi le toʻatele i le iloaina, e finagalo Lē na foafoaina mea ia iai sana faauōga “vavalalata” ma i latou e faaaloalo iā te ia.—Salamo 25:14.

Aogā mo oe: E mafai ona avea oe ma uō a Ieova. (Iakopo 2:23) O lea, pe a e iloa lelei uiga o Ieova, o le a mafai ai ona e malamalama atili e faatatau i tala o loo i le Tusi Paia.

O loo faamatala mai ma le manino Ieova i le Tusi Paia. E mafai ona e malamalama e faatatau i Lē na foafoaina mea, ma e finagalo ia e iloa o ia. Ua folafola mai i Lana Afioga le Tusi Paia: “Afai e te saʻili iā te ia, ona e maua lea o ia.” (1 Nofoaiga a Tupu 28:9) O lea ina ia e iloa le Atua, e tatau ona e faitau ma manatunatu loloto i tala o loo i le Tusi Paia. Pe afai e te faia faapea, ua folafola mai i le Iakopo 4:8 ʻona mafuta vavalalata mai lea o le Atua iā te oe.’

Atonu e te taumānatu, ʻE faapefea la ona avea aʻu ma uō a Lē na foafoaina mea, ae e lē mafai ona ou malamalama i mea uma e faatatau iā te ia?’ Seʻi mātau le manatu lenei: Pe e manaʻomia ona iai se tikeri i mataupu faafomaʻi a le uō mamae a se fomaʻi e faia taotoga? E leai. Atonu e ese se tomai o le uō a le fomaʻi, ae o loo mafai pea ona iai sa laʻua faauōga māfana. O le mea tāua ia iloa e le uō uiga o le fomaʻi, ma mea e fiafia pe lē fiafia i ai. I se tulaga talitutusa, e mafai ona e iloa e ala mai i le Tusi Paia, le ituaiga Atua e iai Ieova, ma o le mea tonu lea e manaʻomia ona e iloa ina ia atiaʻe ai se faauōga ma ia.

O loo iai i le Tusi Paia faamatalaga manino ia e tatou te manaʻomia e faatatau i le Atua, ina ia iloa lelei ai o ia. Pe e te fia aʻoaʻoina atili nisi mea e faatatau iā Ieova le Atua? E faia e Molimau a Ieova se polokalame e suʻesuʻeina ai le Tusi Paia i lou aiga e aunoa ma se totogi. E matou te valaaulia oe e faafesootaʻi Molimau a Ieova i lou vaipanoa, pe tagaʻi i la matou upega tafaʻilagi o le www.isa4310.com/sm.