Na ou ola aʻe i Bilbao, o se nuu e lelei le tamaoaiga, lea e tū i le itu i mātū o Sepania. E toʻafā la matou fanauga, ma o aʻu e lona lua. E malolosi lo matou aiga i le lotu Katoliko, ma ou te auai i le Misasā i aso taʻitasi. Na avea aʻu o se faiaʻoga i le 23 o oʻu tausaga, o se galuega na ou fiafia i ai mo le 40 tausaga. O se isi mataupu sa ou fiafia e aʻoaʻoina, o le mataupu e faatatau i le lotu Katoliko. Pe a oo i le afiafi ou te galue o se faiaʻoga aso sā, e aʻoaʻoina teineiti mo la latou uluaʻi komenio.

Na maliu loʻu toʻalua ina ua mavae le 12 tausaga o le ma faaipoipoga fiafia, ae tuua na o aʻu ma le ma fanau teine e toʻafā! O le taimi lenā faatoʻā 33 oʻu tausaga. Na ou taumafai e saʻili se faamāfanafanaga mai i laʻu lotu, ae na iai pea fesili na oso aʻe i loʻu mafaufau. Na ou tuufesili: ʻAiseā ua faaauau ai ona maliliu tagata ae o lea ua uma ona togiolaina i tatou e Keriso? Aiseā e tatou te tatalo ai ina ia oo mai le Malo o le Atua, pe afai e ō tagata lelei i le lagi?’ E mai i na fesili uma, na ou naunau lava e fia iloa le tali o lenei fesili: ʻPe afai e faamasinoina i tatou e le Atua pe a tatou maliliu, aiseā la e manaʻomia ai ona tatou tuua le lagi, pulekatolio, po o le afi i seoli mo le faamasinoga mulimuli?’

Na ou fesiligia nisi o patele na ou feiloaʻi i ai i na fesili. Na tali mai se tasi o i latou: “Ou te lē iloa. Fesili i le epikopō. E iai se tāua o na fesili? O lenā e te talitonu i le Atua, a ea? Aua le popole ai fua!” Ae na faaauau pea ona ou saʻilia tali o aʻu fesili. Mulimuli ane, na ou auai ai i le lotu a tagata Jesuit, Penetekoso ma Gnostic. Peitaʻi, e leʻi iai lava se tasi na aumaia se tali faamalieloto.

Ina ua silia ma le 60 oʻu tausaga, na valaaulia ai aʻu e se teineitiiti e 7 ona tausaga ina ia auai i se tasi o sauniga a Molimau a Ieova. Na ou fiafia i le mea na ou vaai ma faalogo i ai i le sauniga, ae ona o loʻu pisi tele na lē toe maua ai sa matou fesootaʻiga ma Molimau a Ieova i lenā taimi. Ina ua mavae le lua tausaga, na asiasi mai ai se ulugalii Molimau a Ieova e suafa iā Juan ma Maite. E tolu masina na faia ai la matou talanoaga, lea na iʻu atu ai i le faia o saʻu suʻesuʻega faale-Tusi Paia.

 Na ou matuā naunau i taimi e faia ai aʻu suʻesuʻega! Na faia aʻu saʻiliʻiliga loloto e faaaogā ai faaliliuga e tolu o le Tusi Paia, ina ia faamautinoa o loo aʻoaʻoina e Molimau a Ieova le mea moni. E leʻi umi ae ou iloa le matuā sesē o loʻu talitonuga sa iai mo le tele o tausaga. Na lē mautonu loʻu mafaufau ona o le telē o le eseesega o loʻu talitonuga ma mea ua oʻu aʻoaʻoina mai le Tusi Paia. Na pei oʻu talitonuga o se laau mauaa, ae o lenei ua liaʻieseina.

Na maliu loʻu toʻalua lona lua mai se maʻi tigāina. O le taimi lava lenā na ou faamavae ai mai i laʻu galuega ma tuua ai Bilbao mo sina taimi. Na ō ese foʻi Juan ma Maite. Na ou lagona le faanoanoa ina ua ou taofia laʻu suʻesuʻega faale-Tusi Paia. Ae ui i lea, na ou iloaina lava ua ou maua le oloa tāua. Ou te leʻi faagaloina lava lenā oloa tāua!

Ina ua mavae le 20 tausaga, na toe foʻi mai ai Juan ma Maite i Bilbao, ma asiasi mai iā te aʻu ina ua 82 oʻu tausaga. Na ou matuā lagona le fiafia ina ua ou toe feiloaʻi ma i laʻua! Na ou iloaina ai e leʻi faagaloina aʻu e Ieova, ma na toe faaauau ona faia laʻu suʻesuʻega faale-Tusi Paia. Na onosaʻi Juan ma Maite a o oʻu toe fesiligia i laʻua i fesili lava e tasi. Na ou naunau e faalogologo i manatu mai le Tusi Paia, ina ia mafai ona momotu ese ai oʻu talitonuga sa pele iā te aʻu. Na ou manaʻo foʻi e faaauupegaina aʻu ina ia mafai ona ou faamatalaina atu aʻoaʻoga moni o le Tusi Paia i aʻu uō ma tauaiga.

Na ou papatiso ina ua 87 oʻu tausaga, ma o le aso lea sa sili ona ou fiafia ai i loʻu olaga. Na faia le papatisoga i le taimi o le fonotaga a Molimau a Ieova. Na faia e se toeaina Kerisiano le lauga faale-Tusi Paia, lea e faatatau atu iā i matou o le a papatiso. Na maligi oʻu loimata a o faia le lauga, ona e pei o loo talanoa tuusaʻo mai Ieova iā te aʻu. Ina ua māeʻa le papatisoga, e toʻatele Molimau a Ieova na ō mai ma faafeiloaʻi aʻu, e ui o le toʻatele o i latou ou te leʻi feiloaʻi muamua i ai!

Na ou talitonu o Iesu Keriso “o le ala.” (Ioane 14:6) Ae na fesoasoani laʻu suʻesuʻega faale-Tusi Paia ou te iloa ai Ieova, o lē o loo taʻitaʻia ai e Iesu i tatou. Ua mafai nei ona ou tatalo atu i le Atua o se Tamā ma o se Uō pele. O le faitauina o le tusi Faalatalata Atu iā Ieova, * na matuā suia atoatoa ai loʻu olaga. E tasi le pō na ou faitauina atoa ai lenei tusi! Na matuā pāʻia loʻu loto i le iloaina o le alofa mutimutivale o Ieova.

Pe a ou toe mafaufau i le tele o taimi na ou saʻilia ai le tapuaʻiga moni, ou te manatua ai le fetalaiga a Iesu: “Ia talosaga atu pea, ona foaʻiina mai ai lea iā te outou. Ia saʻili atu pea, ona outou maua ai lea. Ia tuʻituʻi atu pea ona tatalaina mai ai lea iā te outou.” (Mataio 7:7) O lea ua ou maua tali o fesili ua leva ona ou saʻilia, ma ou te fiafia e taʻu atu i isi.

O lenei ua 90 oʻu tausaga, ma e tele pea mea e manaʻomia ona ou aʻoaʻoina e faatatau iā Ieova. Ou te faatāuaina sauniga uma a Molimau a Ieova ou te auai ai, e lē gata e fiafia faatasi ai ma uso ma tuafāfine, ae aʻoaʻoina mai ai foʻi le atamai tautele. Ou te naunau e toe avea aʻu ma faiaʻoga i le lalolagi Parataiso ua folafolaina mai. (Faaaliga 21:3, 4) Ou te tulimataʻia foʻi le taimi o le a toe faatutū mai ai i latou e pele iā te aʻu, ma maua ai le avanoa e aʻoaʻo ai i latou e faatatau i aʻoaʻoga moni o le Tusi Paia. (Galuega 24:15) Ou te moomoo e faamatala atu iā i latou le meaalofa tāua na tuuina mai e Ieova iā te aʻu, ina ua ou matua!